The Definitive Guide to Living in the Capital , Cairo , Egypt

لكل اللى بـ يقول أن الكتابة لازم تكون معقدة.. لكل اللى فاكر أنك لما تكتب لازم تحط عصارة دماغك.. لكل اللى بـ يختار كل كلمة بعناية.. لكل اللى فاكر نفسه بـ يكتب من واقع التجربة.. نهدى إليكم هذه القراءة عن "الغطا والحلة".

الغطا:

طبعًا كان لازم أول حاجة نحللها العنوان (اللى هو حلو) لكن رحاب هانى مؤلفة الكتاب قررت توفر علينا المجهود صراحة وتفسر هى الموضوع.. هى شايفة أن حضرتك لما تقف أمام الكتاب هـ تحس أن فيه حاجة غلط.. وهـ تقول لنفسك: إزاى أشترى كتاب اسمه الغطا والحلة؟

ولا تزعل نفسك يا سيدى أنت بس ركز كده شوية وهـ تعرف أن فيه "فلسفة" فى الموضوع وهى ببساطة أن علاقتنا القريبة من الناس القريبين مننا.. زى علاقة الغطا والحلة.. ما يقدروش يستغنوا عن بعض وبرضه فيه ناس ما نقدرش نستغنى عنهم.

الحلة:

الحلة بقى موضوعها موضوع.. هى العلاقات ذات نفسها –آه والنعمة زى ما بـ نقول لك كده– علاقتنا بكل اللى حولنا من أصحاب وقرايب وناس بـ تتكلم عننا وناس بـ تحبنا وناس بـ تكرهنا وناس مرتبطة وناس نفسها تتجوز وخلاص وناس بـ تحب وناس وناس… أشكال كثير من العلاقات بـ تحكى لنا عليها رحاب هانى فى كتابها "الغطا والحلة" وبـ تحاول تفسر مبررات العلاقات دى بأساليب مختلفة.. وعلشان كده الكتاب نجح.. المهم خلينا نقول لكم جزء من طريقتها وبعدين نقول له هى نجحت.

"كنت أزعل لو حد ما سألش، ما اهتمش أو ضربنى إسفين وتكلم علىَّ من ورايا.. أقعد اسأل نفسى ليه طيب؟ يعنى أنا مش أحسن واحدة فى العلاقات الإنسانية بس أنا باخد بالى من الناس.. هما مهمين فى حياتى يبقى ليه هما كده! الفكرة بقى أنى ضيعت وقت طويل وأنا باحاول أجاوب على السؤال ده.. المهم بطلت اسأل.

سياسة تكبير الدماغ سياسة ناجحة جدًا هى فى النهاية لا تنم عن عدم اهتمام –إطلاقًا– لكنها تشير أن فيه حاجات ثانية فى الكوكب العظيم ده أهم".

ها.. يا ترى عرفتوا ليه الكتاب نجح.. عمومًا لو لسه ما عرفتوش هـ نقول مع بعض بسرعة الأسباب:

أنها بـ تكتب بعامية سهلة وبسيطة كأنها بـ تكلمك، وبـ تستخدم أكثر من أسلوب زى: "الحوار، مقابلة بين شخصين، وصف مشاهد، تحليل، قراءة لحاجات بنعيشها، عرض وجهات نظر"، الكتابة بسيطة وطالعة من قلب تجارب كثير، واختيار موضوعات مرتبطة بالشباب، واختيار مضمون قليل اللى بـ يكتب فيه.