The Definitive Guide to Living in the Capital , Cairo , Egypt

باراشوت

باراشوت: فصول من يوميات صحفى طائر

  • إبراهيم الجارحى
  • أدب ساخر
  • من الآن
  • عربي عربي
  • 20 جم
  • مكتبات وسط البلد
تم التقييم بواسطة
Ahmed Abd El Gawad
قيم
قيم الآن
باراشوت: فصول من يوميات صحفى طائر
إهداء:
إلى النسخة المختصرة لجيل جديد كامل من الكتاب العباقرة القادمين الذين ولدوا فى مطالع الثمانينيات وما زالوا فى رحم التجربة يتكونون.. إلى أحمد الدرينى كاتبى المفضل وقارئى المفضل أيضًا.
دى مقدمة كتاب “باراشوت” للصحفى إبراهيم الجارحى.. أو للساخر إبراهيم الجارحى.. أو للـ….. إبراهيم الجارحى.. نقول لك، حط وصف زى ما أنت عاوز، تعرف ليه؟ ده هـ تعرفه لما تقرأ الكتاب..

مدخل:
كان بـ يفكر بالمقلوب:
مش إحنا اللى بـ نقول كده، الجارحى هو اللى بـ يقول كده على نفسه فى بداية الكتاب لما بـ يتكلم عن فكرة السفر وعلاقته بالطيارة.. كان عاوز يسافر علشان يجرب إحساس الطيارة مش علشان فكرة السفر نفسها.. ولما كبر بدأ يعرف أن الطيارة مجرد وسيلة للسحر الأكبر والعالم الكبير والسبع فوائد للسفر.
رحلة:
أول رحلة بـ يحكى لنا عنها هى اختياره بشكل عشوائى من بين زمايله فى الوكالة الإخبارية المشهورة اللى كان شغال فيها علشان يبقى مراسل الوكالة فى دورة الألعاب العربية فى الجزائر، وبـ يحكى لنا قد إيه تم التعامل معاه باحترام واهتمام.. وبقى عنده تصور أن كل الرحلات هـ تبقى كده.
اكتشاف:
الاكتشاف الكبير فى رحلات الجارحى أن كل الرحلات اللى تمت بعد كده مش زى أول رحلة لأن ببساطة اسمه مشابه لاسم شخص ثانى على قوائم المطلوبين.. وفى كل مرة بـ يرجع فيها من السفر لازم ينتظر كثير لحد ما يتأكدوا أن إبراهيم الجارحى مش إبراهيم الجارحى.
رحلة:
إلى دارفور ساحة الحرب الأهلية هـ تقابلكم رحلة جديدة من رحلاته، إيه اللى حصل هناك؟ حكاوى كثير عن الجيش النظامى وعن المتمردين وعن مديرته “آنا ريتشاردسون”، عن الموت الجماعى والأوبئة والمجاعات.. معاناة حقيقية بـ يحكى لنا عنها ساعات بـ تضحك من سخريته.. لكنها سخرية فى كثير من الأحيان مريرة مر الواقع اللى عايشينه.
أطول رحلة فى التاريخ:

العجيب فى الأمر مش الفعل اللى قام به.. ولا إزاى كانت الرحلة.. العجيب هو قدرته على اقتناص الفكرة الإنسانية من تجارب حياتية ممكن تشوفها مملة أو صعب أنك تخرج منها بتجربة.. لكن مثلًا لما حد يحول فكرة الانتظار لموضوع إنسانى زى فكرة القرارات اللى بـ نتمسك بها لمجرد أننا بقى لنا فترة متمسكين بها حتى لو كانت الفترة دى قصيرة.. يبقى لازم نعرف أن الهدف من الكتاب هو…

الهدف:
مش الحكاية.. يعنى حضرتك مش فاضى أنك تقعد تسمع مجموعة حكايات عن حد بـ يسافر لشوية أماكن فـ يعرفك عليها وعلى المواقف الطريفة اللى حصلت له.
مش الضحك.. وكمان الهدف من الكتاب مش الضحك مع أن أسلوبه الساخر ممتع جدًا وبـ يخليك فى كثير من الفصول تضحك من مجرد سرد الحكاية وتعليقاته اللطيفة على المواقف.. وكمان اعتماده على كوميديا الموقف فى المقام الأول.. وقدرته على رسم المشهد بحرفية.
الهدف من الكتاب هو عمل خليط فى ذاكرة حضرتك ما بين الحكى التاريخى ومعرفة الناس وفكرة الرحلة ووصف البلاد والعباد علشان توصل فى النهاية للإنسان.. نعتقد أن الهدف من “الباراشوت” هو الإنسان واكتشافه من خلال الخليط اللى فات والملفوف بالعرض الساخر الشيق اللى اتبعه الجارحى فى “باراشوت”.

عجبك ؟ جرب

"ما فعله العيان بالميت" للساخر بلال فضل.

عن الكاتب

إبراهيم الجارحى صحفى وكاتب، عمل بمحطة "BBC" ويعمل الآن صحفيًا بوكالة رويترز للأخبار. يعتبر هذا الكتاب هو الثانى له بعد التجربة الروائية "حارة الضبعة"، كما أسس منذ ما يقارب الخمس سنوات أونلاين راديو يحمل اسم "تيت راديو".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح