The Definitive Guide to Living in the Capital , Cairo , Egypt

كتب التنمية البشرية نوعين، الأول ساذج جدًا ومليان أكاذيب وإدعاء وده بنشوف منه كتب كتير خصوصًا اللي كاتبها ناس ماعندهاش أي خبرة في الحياة وكل شغلانتها أنها "مدرب تنمية بشرية" بدون مؤهلات، وفيه نوع ثاني من الكتب المهمة اللي مكتوبة بضمير وصاحبها مؤهل ينقل للناس خبرات، ودي للأسف أصبحت عملة نادرة، كتابنا النهارده بين يدي أستاذي واحد من النوع الثاني.

الكتاب من إصدار نهضة مصر، وعدد صفحاته أقل من 100 صفحة، ومن تأليف إيهاب فكري، وهو واحد من المهتمين بتنمية القدرات الإدارية للشباب في مصر، خلفيته الأكاديمية أهلته للكتابة في علوم الإدارة، حاصل علي بكالريوس إدارة الأعمال من جامعة عين شمس، ودرجتي الدبلوم والماجستير في إدارة الأعمال من الأكاديمية العربية للعلوم والتكنولوجيا، وكذلك درجة الدكتوراة في إستراتيجيات التسويق من الجامعة الأمريكية بلندن، واشتغل حوالي 20 سنة مع أكبر الشركات العالمية والمتعددة الجنسيات، يعني إحنا بنتكلم عن شخص مؤهل مش مجرد مدرب تنمية بشرية.

الغلاف ماعجبناش قوي، لونه أسود كئيب ومناسب أكثر لكتب السحر والخيال، لو سيبنا الغلاف ودخلنا على الكتاب هنلاقي أسلوب الكاتب بسيط جدًا وحسينا فيه ببعض الصوفية مش عارفين الكاتب قاصد ده ولا لأ، الكتاب هدفه يعلمك بطريقة بسيطة يعني إيه تفكير إبداعي خارج الصندوق، وده بيتم من خلال قصة لواحد بيتكلم مع أستاذه، وبيعرض 6 مباديء بتفتح لك باب التفكير خارج الصندوق.

وأول المبادئ دي أنك تدرس الواقع قبل التمرد عليه، وبعدها تفصل التفكير عن التنفيذ، وماتنساش أن أبسط الأفكار هي غالبًا أعظم الأفكار، وبعد كده لازم تتكلم مع نفسك وأفكارك لحد ما تخرج للنور، ولازم تجيد فن عرض الأفكار، وأخيرًا لازم تكون مستعد للحرب، (فأنها قادمة حتمًا من داخل الصندوق)، بحسب تعبير الكاتب.

الكتاب مناسب لأي إنسان بيدور على كتاب خفيف ةمش معقد، ومناسب للقراءة على الشاطئ أو في النادي، الأسلوب بسيط ومناسب حتى للناس اللي مابتحبش القراءة، كمان مركز جدًا وسريع، عدد صفحاته حوالي 85 صفحة بس، يعني تقدر تخلصه في قعدة واحدة.

الكتاب هيعلمك حاجات كثيرة جدًا عن التفكير غير التقليدي، وإزاي تشوف الأمور بطريقة مختلفة وماتبقاش زي القطيع.

ثمنه كمان مناسب للميزانية، عشرة جنيه بس، رغم طباعته الجيدة وتنسيقه المميز.