The Definitive Guide to Living in the Capital , Cairo , Egypt

مجموعة قصصية للقاص محمد على إبراهيم تضم 12 قصة قصيرة منها: “تأريخ لا يروق لكم، تدوير، اشتباك آخر، سقيفة بنى ساعدة…” تحمل كثير من الجرأة فى الكتابة، بـ ترصد الواقع الإنسانى بشكل عام والسياسى بشكل خاص، لا يعتمد الكاتب فى المجموعة على السرد التقليدى فى تتابع الأحداث بل العكس الكاتب بـ يرسم خط سير الأحداث بشكل جاذب للقارئ لكن لا يسمح له أنه يتوقع النهاية لأن كل نهاياته بـ تجعل للقصة بُعد جديد يخليك تستمتع وتندهش من جمال الكتابة، وأجمل حاجة فى المجموعة أن الكاتب بـ يشرك القارىء فى تخيل الحدث وممكن نلاحظ ده جدًا فى قصة “تدوير” اللى بـ يقول فيها: “الوصول إلى نقطة العزاء، الحكم يوقف المباراة، دقيقة حداد، الزيتون ينزّ قهرًا، العزاء كان ثقيلاً، اللقاء الأول، شريط للذكريات، وزير الداخلية أعلن أنه سيعاقب قائد العربة، المدير خصم من كمال 3 أيام علشان يفوق”، هنا الكاتب بـ يخلينا أمام وحدة سردية بـ تتداخل فيها الأحداث بشكل مختزل وسريع وده بـ يشغل تفكيرنا لأنه مش بـ يقول كل حاجة وبالتالى ده بـ يدفعنا أن إحنا اللى نكمل الحدث حسب تخيل كل قارئ. ولو بصينا على الأبطال فى المجموعة هـ نلاقى كل القصص تخلصت من سلطة البطل الواحد اللى بـ يتحكم فى سير الأحداث وده طبعًا بـ يزيد من تنوع السرد وممكن نلاحظ ده فى قصة “ثلاثة شوارع قد تصبح شارعًا واحدًا” واللى بـ ترمز للصراع بين التيارات السياسية مثل الشيوعية والرأسمالية والإسلامية وأن بطلها بـ ينحاز إلى الاشتراكية لكن الكاتب ما صرحش بشكل واضح ورمز للبطل ده بالشوارع وده طبعًا ذكاء من الكاتب لأنه صور تماهى الإنسان مع المكان وكشف بُعد جمالى للمكان ودوره فى صنع المناخ الثقافى، وعلى مدار القصة يغيب البطل الواحد لتكون الفكرة هى البطل وصراع الأفكار هو الحدث الأساسى اللى بـ تدور حوله القصة من غير وقوع فى نمطية السرد.