The Definitive Guide to Living in the Capital , Cairo , Egypt

حجمها وسعرها كبير، غلافها مميز ويشد، والكاتبة واحدة ست، اسمها رشا سمير، هي دي أول أربع ملاحظات هـ تاخد بالك منها لما تمسك رواية الدكتورة رشا سمير "جواري العشق"، الرواية الصادرة عن الدار العربية للكتاب، خلينا نكون صرحاء مع نفسنا، أول لما تفتح الرواية وتبدأ أول فصل بعنوان "بداية ونهاية" هـ تحس بملل شديد وممكن ما تكملهاش، الفصل الأول هو الأسوأ في الرواية كلها، لذلك ننصحك لو عندك صبر كمله أو عديه لأنه مجرد فلاش باك هـ تفهمه لما توصل لنهاية الرواية.

طبعًا مش بـ نقول أنه ممل على سبيل الغلاسة، سر ملل الفصل ده هو الوصف الدقيق جدًا والطويل لسيدة مسنة متمسكة بصندوق ذكريات قديم بـ تحكي لحفيدتها عليه، أما الفصل الثاني وعنوانه "وطن وغربة" "1382-1517" فـ هنا بـ تبدأ بداية جذابة، جزء منها باللغة الفصحى وجزء بالعامية.

الرواية بـ تتكلم عن أجيال لسيدات، من عصر المماليك لحد العصر الحالي، خلينا نقول "شابو Chapeau" للروائية اللي قدرت تدخل قرائها عصر المماليك، قمر الجارية هي السيدة الأولى، والجدة، قصتها مع السلطان اللي بـ يحبها، والشاب اللي في القصر هي بـ تحبه، بمرور الفصول التشويق بـ يزيد، وبـ تثبت دكتورة رشا أنها قادرة تشدك تكمل الرواية رغم بساطة الأحداث وعدم تعقيدها، بـ تبدأ القصة الثانية بقصة "مهشيد" الطبيبة الشابة في عصر عبد الناصر والسادات، واللي بـ تقع في حب زميلها الدكتور خالد، بـ يتجوزوا وفجأة يتحول الزوج مع الوقت لشخص غريب، وتكتشف زوجته أنه انضم لجماعة الأخوان.

رغم كراهيتها للفكرة، لكنها علشان بـ تحبه بـ تحاول تنضم هي كمان وهنا بـ تبدأ رحلة طويلة مع أفكار الأخوان تجاه المرأة والمجتمع بشكل عام، بـ تقدمها الكاتبة، وفي النص بـ تحاول تناقش قضايا تخص البنات زي الختان والحجاب، والكتاب المهتمين بقضايا المرأة زي إحسان عبد القدوس، خلينا نقول أن نبرة الوعظ التقليدية عالية شوية، كل التفاصيل كأنها "معقمة" تقدر تتوقعها، كأنها تجميعة لتفاصيل كثيرة معروفة ومفهومة "كليشيهات".

ناس كثير من المنتمين لجماعة الأخوان ممكن ما يحبوش الرواية لأنها بـ تناقش جو الأخوات في الجماعة وشكل الطاعة العمياء، وإنجاب عدد كبير من الأطفال، وإزاي حسن البنا قصر دور المرأة في المطبخ والفراش، إزاي بـ يحصل اغتصاب زوجات، وارتداء للحجاب بدون إقناع، طبعًا الكلمتين دول خلوا ناس كثير تدخل تهاجم الكاتبة بصورة ضارية على مواقع مناقشة الكتاب.

الكاتبة كمان صورت مشاكل ثانية في المجتمع زي المعاملة السيئة من جهاز الشرطة للناس، لما بـ يتم حبس الطبيبة خمس سنين بدون تهمة، أكثر جزء عجبنا في الرواية لما صورت الكاتبة إزاي ناس كثير حياتها بـ تضيع وسط ناس وأوضاع هم مش راضيين عنها بدعوى أن ده النصيب وخلينا نحاول يمكن الظروف تتحسن، ويصحوا فجأة يلاقوا كل حاجة في حياتهم ضاعت وباظت!

"أيسل" هي الجيل الثالث، البنت اللي في عصر مبارك جيل الإنترنت والتكنولوجي، الجيل المستعجل اللي مش عاجبه حاجة، إزاي بـ يتم استعبادها بواسطة فكرة الحرية نفسها، إزاي بـ تقتنع في مرحلة من حياتها أن انعدام الأدب حرية والتظاهر بصدور عارية حرية والعلاقات بدون زواج برضه حرية.

"إحنا هـ نقوم بثورة على النظام، إحنا بقى لنا ثمانين سنة شغالين علشان اليوم ده"، "محتاجين دعم الشباب علشان نبقي شرعيين"، "أمريكا بقى لها سنين بـ تجهز شباب وبـ تدربهم وعدونا بالدعم الكامل".. الكام جملة دول كانوا كفيلين يخلوا ناس كثير تعلن ندمها على شراء الرواية، وأثارت جدل كثير حول الكاتبة اللي اتهموها بأنها فلول وأنها مع نظام مبارك، وخلى الجدل يزيد حول الرواية، وبـ تنتهي الرواية بالجيل الأخير الحفيدة اللي بـ تكمل مسيرة أسرتها من الستات وبـ تتأمل سيرتهم إزاي الحب حولهم لجواري وإزاي هي لازم تخرج عن الدائرة دي.