The Definitive Guide to Living in the Capital , Cairo , Egypt

حكايات الجان

حكايات الجان: عمرك شفت جن قبل كده؟

  • واقعية
  • من الآن
  • عربي عربي
  • 3 EGP
  • مكتبات وسط البلد، ومع باعة الجرائد
تم التقييم بواسطة
Ahmed Abd El Gawad
قيم
قيم الآن
حكايات الجان: عمرك شفت جن قبل كده؟

الجن ذكر فى القرآن.. الجن موجود.. الجن ربنا خلقه لحكمة من عنده، كل دى أساسيات مفهومة ومعروفة فى صحيح الدين.. لكن مش هى دى المشكلة.. عارفين إيه المشكلة؟ أنك تشوف الجن.. عمرك شفت جن قبل كده؟

سؤال مهم بـ يحاول الكتاب اللى معانا النهارده يجاوب عليه.. بـ يجرى هنا وهناك وبـ يسافر فى أماكن بعيدة فى قرى مصر علشان يجمع حكايات الناس عن الجن.. الناس مؤمنة أن الجن مذكور فى القرآن لكن عندهم من الخيال والحكايات اللى بـ توصف ما هو أبعد، حكايات عاوزة تلمس المجتمع الغريب ده وتقرب منه.. معتقدات شعبية كثير قامت على فكرة الجن، معتقد ممكن يكون أساسه حدوتة قالها راوي فى مكان بعيد ونقلها الجد للحفيد والأب لابنه ولعب الخيال الفردى دوره، وبقت حكاية الجن.

فيه مساحات واسعة جدًا وأشكال مختلفة للحكايات فى الكتاب منها مثلًا أن الجن ممكن يتجوز من بنى الإنسان واللى بـ يعمل كده بـ يطلق عليه لقب “مخاوى” وهو مصطلح شعبى معناه أن الرجل ده أو الست دى بـ يعرفوا الجن وبـ يتعاملوا معاه وممكن كمان يكونوا متجوزين منه.. وساعات بـ يبعد الخيال لأكثر من كده ويتكلم عن حالات اختفاء الإنسان واللى فيها بـ تلعب الرحلة دور مهم لأنهم بـ يحكوا عن “فلان” اللى اختفى وراح لمملكة الجن وبـ يرجع إما مريض أو مجنون أو عنده قدرات عجيبة وبـ يحكى عن العالم الغريب.

إبراهيم سلامة هو الباحث النشيط جدًا واللى عمل الدراسة دى.. وهى دراسة فيها نظريات حديثة ومحاولة تطبيقها.. وفيها قدرة قوية على البحث والربط بين الحكايات والوضع الاجتماعى والثقافى للراوى والمجتمع اللى نشأت فيه الحكاية.. لكن جنب كل ده فيه حاجة مختلفة فى الكتاب وهى الحكايات نفسها واللى مش جاية من مراجع لكنها جاية من على لسان الناس.. من ناس قالت أنها شافت الجن وناس بـ تحكى عن ناس شافت الجن وزارتهم فى مملكتهم علشان كده الكتاب ده مختلف.

وخد عندك يا محترم الخيال العبقري اللى بـ يحكي عن تجارب من الحياة لناس قالت لك الجن ظهر لى على شكل النداهة وهى أنثى جميلة جدًا بـ تظهر عند الترع والمصارف وبـ تنده الناس وتغرَّقهم.. واللى يقول لك الجن بـ يظهر على شكل قطة أو سمكة أو أرانب وياه على حكايات الأرانب اللى بـ تظهر بالليل عند قضبان السكك الحديد وتلهى المواطن الغلبان لحد ما ييجي القطار ويصدمه ويموت الغلبان.. وفيه الجنية اللى بـ تتشكل على شكل حمار أو ذئب أو كلب كبير أو ماعز أو حتى إنسان بـ يمشى فى الأسواق.

المهم ما تخافش من كل اللى فات.. أنت كويس صح؟.. أنت كويس؟ رد عليا يا أستاذ.. يا محترم.. رد عليا أنت رحت فين؟ “ده كان أمام عينى واختفى”.. يا نهار راح فين بس.. وإيه الضلمة دي؟ ده أنا سامع صوت قطة جاى من بعيد بسم الله الحفيظ.

عجبك ؟ جرب

موسوعة التراث الشعبى "محمد الجوهرى".

عن الكاتب

إبراهيم سلامة باحث فى المجال الشعبى.. محب للسفر والمغامرات.. له قدرة عجيبة على الصبر فى الجمع وترتيب الحكايات.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح