The Definitive Guide to Living in the Capital , Cairo , Egypt

رواية رائحة مولانا واحدة من روايات السرد المختلف، عالم
واحد كبير بـ تدخل فيه ومن الصعب أنك تخرج منه، عالم القرية والبيت الكبير وعالم
مولانا، طريقة كتابة جيدة هى اللى بـ تبعتك للعوالم دى بـ توديك لحد القرية مجهولة
الاسم علشان تتعرف على الشيخ والناس والحرامية والبلطجية والأغنياء والكبراء و
“مولانا”.

الكاتب بـ يستخدم فكرة السرد المتوازى بمعنى أنه بـ يحكى
فى أول الرواية عن مولانا الرجل القوى كبير القرية، واللى الكل بـ يخاف منه وبـ يعمل
له ألف حساب، وبعدين فجأة يأتى خبر موت مولانا فى الفصل الأول، علشان تبدأ تعيش مع
الروائى الجميل “أحمد عبد المنعم رمضان” رحلة “فلاش باك” بـ تحكى
عن قصة حياته وإزاى وصل من شيال إلى كبير القرية.

الرحلة بجد طويلة لكنها مسلية والرحلة مليانة بالروائح،
ومن هنا كانت تسمية الرواية “رائحة مولانا” لأن مولانا تقريبًا كده عنده
رائحة سحرية ممزوجة بروائح كثيرة لدرجة أنك ما تقدرش تحدد هل هى رائحة جميلة ولا سيئة،
وفى وسط الروائح دى بـ تلاقى أفكار كثيرة جديدة بـ تدخلك جوه الأحداث من خلال
الروائح، بـ تلاقى روائح “الفانيليا، والقهوة، والقرنفل، والبهائم، والموت، والعرق،
والخوف، والغضب وروائح ثانية كثير بـ توصلك أنك تعيش فى عالم جديد عليك عالم
الروائح اللى بـ تصنع سرد.

الرواية نقدر نصنفها أنها رواية واقعية سحرية، بـ تحكي لك
عن عالم القرية والظلم والقهر، وإزاى شخص واحد بـ يقدر يملك قلوب الناس وخوفهم
لأنه عنده المقدرة على الخوف، لدرجة أن الناس تضعه فى مرتبة الإله، الخوف أحيانًا
يوصل للكفر، وفى وسط العالم المادى والواقعى جدًا بـ تلاقى الأفكار السحرية
المثيرة، أو نكهة الرواية اللى بـ تصنع عرق مسموم ورجال بـ تحكى للشجر، ورائحة
للخوف، وحكايات مثيرة غير منطقية.

من الأشياء الجيدة فى الرواية اهتمام الكاتب بفكرة سردية
لطيفة كأنها جرس إنذار من وقت لآخر ينبهك لمفهوم محدد الروائى عاوز يوصله فى الوقت
ده والفكرة هى “القواعد” فى وسط السرد هـ تلاقى مجموعة من القواعد اللى
بـ يقولها الراوى العليم فى “رائحة مولانا” زى القاعدة الأولى: “لا
تعبث مع مولانا”، القاعدة الثانية: “مولانا يموت أحيانًا”، القاعدة
الثالثة: “اختر حصانك جيدًا”، القاعدة الرابعة: “التوقيت”،
القاعدة الخامسة: “سوء الظن من حسن الفطن”.

مجموعة قواعد تحتاج إلى تجميعها مع بعض وربطها بالرواية
هـ تلاقيها بـ تصنع لك نص ثانى موازى للنص الأصل للرواية، نص بـ يحكى عن فكرة
الفرعون والطاغية والدين والسلطة والحياة والشعب.. فقط ركز مع مولانا.