The Definitive Guide to Living in the Capital , Cairo , Egypt

كل المهتمين بالأدب الساخر أكيد سمع عن «شكلها باظت»
الكتاب اللي باع كثير وعمل ضجه كبيرة بين المهتمين بالنوع ده من الأدب.

و«زملكاوي» هو الكتاب اللي صدر مؤخرًا لنفس المؤلف بمناسبة
مئوية النادي الملكي، الكتاب مكون من أكثر من 12 فصل و بـ يعبر بأسلوب بسيط ومشوق
عن إنجازات وتاريخ نادي الزمالك، وبـ يتكلم عن “ألبوم مئوية الجماهير”.

 بـ يحاول يبعد عن وجهة النظر الرسمية
للنادي والتأكيد علي عدم اقتصار الكتاب على جمهور الزمالك وحده وأنه ممكن أي حد بـ
يشجع نادي ثاني يقراه وهـ يعجبه المضمون. وبالرغم من أن الكتاب فيه شوية كلام ممكن
تعتبره سخرية من الزمالك أو يضايق الزملكاوية المتعصبين لكن حتي ده مكتوب بشكل
محترم وما خرجش عن إطار الروح الرياضية.

عمر طاهر بـ يأكد على حبه للنادي وبـ يخاطب القارئ بطريقة “هم
يبكي وهم يضحك”، والكتاب عمومًا بـ يحاول يفسر ليه الزملكاوي بـ يتمسك بتشجيع
النادي بتاعه رغم أنه كثير بـ يكسفه وإزاي المشجع الزملكاوي متميز عن غيره من
مشجعين الفرق الثانية كونه عاطفي بالفطرة، وبـ ينحاز للبسطاء وسريع التسامح وصوته
عالي في الحق.. وغيرها من الصفات المتحيزة للزملكاوية.

الكتاب فيه تفسيرات تاريخية واجتماعية وفنية لعثرات
الزمالك، وفيه فصول تانية بـ ترصد تاريخ النادى بالتوازي مع تاريخ مصر، وتاريخ
اضطهاد الزمالك ومكانه اللي استقر فى ميت عقبة علشان يكون كل ما يطلع من
“عقبة” يدخل على “عقبة” أكبر، وعامل بحث في تقسيم الشعبية بين
الأحمر والأبيض وكمان سر الخطين الحُمر على فانلة النادى.
قدم “طاهر” فى الكتاب أهم مائة هتاف من مدرجات الألتراس الزملكاوى وعدد
من الصور النادرة من أرشيف النادى.

حتى لو ما كنتش زملكاوى هـ تلاقى فى الكتاب معلومات وأفكار
تستحق القراءة.