The Definitive Guide to Living in the Capital , Cairo , Egypt

الإهداء فى أول الرواية “إلى أمى رغبة فى وجود دائم”.. يبقى إحنا بـ نتكلم على كاتب رومانسى بـ يحب والدته ومرتبط بها جدًا علشان كده عمل الإهداء ده وبعته لها فى روايته اللى مش الأولى ولا حاجة لكنه عاوز يقول حاجة من الإهداء علشان بـ يقول برضه:

“إلى من كانت هى العالم ثم..” يعنى برضه الموضوع مرتبط بالرومانسية.. تعالوا بقى نشوف إيه حكاية سانت تريزا.

الحكاية بـ تبدأ مع “بدور” وبـ تشدنا من أولها عن العائلة العجيبة دى اللى كانت عايشة فى قرية “الصيادين” جنب بحيرة قارون وهى عائلة مسيحية، الجد قرر يدور على كنز قارون فمات غريق.. والعم قرر يغطس يجيب إكسير الحياة اللى حول به قارون التراب لذهب.. وبرضه العم ماظهرش.. إيه الموضوع العجيب ده؟

لازم نقف شوية علشان نبص على العائلة دى من فوق وعلى لغة د/ بهاء عبد المجيد فى وصف الرواية اللى داخلة مع الأسطورة فى المنطقة دى.. فـ نلاقيه بـ يقول:

“أذاعوا فى القرية أن هذه العائلة ملعونة، وأنه يجب على الجدة أن تدخل القصر وتستسمح الجن والشياطين سكانه أن يرفعوا عنها وعن عائلتها هذا البلاء، ولكن الجدة لم تعد كما دخلت، فأخذت تصعد إلى سطح المنزل وتتحدث إلى القمر ليلًا وإلى الشمس نهارًا وأحيانًا تجر نحو انعكاس ضوء القمر على مياه البحيرة… وتفرد شعرها وتقول لهم: “هيا إلى مائدة السماء”.

المهم الناس قالت أن العائلة دى كلها ملعونة زى ما قرأنا فى الجزء اللى فات، وده بـ يبين قد إيه امتلاك اللغة عند د/ بهاء واضح وقد إيه متأثر بالثقافة المسيحية وبـ يجيب أجزاء من الإنجيل والتوراة ويستشهد بها علشان الحالة العامة للرواية تبقى متناسقة، وشفنا كمان أن عنده لمحة أسطورية ظهرت فى الكلام عن الشمس والقمر والبحيرة والجدة اللى دخلت قصر العفاريت، بس يا ترى إيه اللى حصل لها وليه قررت تمشى ناحية الهرم، وليه لما ماتت حطوا الصليب على صدرها والشيطان حرق عشتهم فاضطروا يروحوا يقعدوا جنب الكنيسة؟ الكنيسة اللى تم تسمية الرواية على اسمها “سانت تريزا”.

أسلوب الكاتب صراحة جميل وطريقته فى الحكاية ممتعة يعنى بـ يخليك تركز معاه وكأنه قاعد بـ يحكى معاك، هو مش بـ يستخدم أسلوب الكتاب الكبار ويقعد يجيب الصورةمن بعيد ويركز فى كل الجماليات وتركيب الصورة.. لا هو بـ يطبخ طبخة روائية ثانية خالص، السهل الممتنع.. يعنى أسلوب سهل وفيه حاجات غريبة، وفيه حاجات تشدك، وفيه لغة سهلة وممتعة وأنت بـ تقرأ.