The Definitive Guide to Living in the Capital , Cairo , Egypt

عنوان يحمل دلالة فلسفية –ربما– أو عنوان يحمل شعر، هو
ده اللى أراده الشاعر سيد بشير –تقريبًا– فى القراءة الأولى للعنوان أنك تحس بطعم
الفلسفة فى الروح اللى هـ يحصل لها سكتة قلبية فهـ تقف أو تموت، لو وقفنا شوية على
فكرة موت الروح هـ نلاقى أنها معادل لموت كل حاجة مرتبطة بالخيال، لأن الروح فى
الشعر هى قلب الشعر، هى الإلهام اللى بـ يخلينا نكتب، وهى مصدر الحياة فى الجسد،
فلو ماتت هـ يموت الخيال، الإلهام، قلب الشعر.

ديوان سكتة قلبية للروح هو الديوان الأول للشاعر سيد
بشير فيه هـ تلاقى مجموعة كبيرة من بدايات المشاريع الشعرية، لكنها مشاريع ما كملتش،
لأن بشير كان بـ يدور على الأفضل دائمًا فكان بـ يسيب المشروع ويبدأ فى غيره علشان
يلاقى روح الشعر اللى تعرَّفه طريق الكتابة وتعالوا نشوف المشاريع.

المشروع الأول هو مشروع الشاعر الطفل وفيه بـ يتحول بشير
إلى طفل فى أولى أول بـ يكتب على السبورة ويحب بشوق عيل وقلب شاعر:

خطِك بالطباشير المايل

ع السبورة

نازل يشرب وش الحلم

وضفيرتك …

مجدولة سلالم

لأجل أطلع وأشوف الصبح

أما المشروع الثانى فهو مشروع “”sms
وهى مجموعة قصائد بسيطة ومكثفة لكنها محددة الهدف رايحة فى طريقها جدًا وبـ تقول
باختصار اللى عاوز يوصله الشاعر، وفى الغالب بـ يختمها بحكمة:

تطلق عيونك فى البعيد

تنده عليك

تروح رايح ولا يهمك هواجس خوفك

المنحوت على مرايتك.

المشروع الثالث هو المشروع التجميعى لقصائد الديوان بعيد
عن الرسايل والشاعر الطفل، هو مشروع فى الغالب رومانسى بكل ما تحمله الكلمة من شوق
ولهفة فى معناها القريب، وما تحمله من ملامح الحزن والانصهار فى العالم فى معناها
المدرسى البعيد، والقصائد بالفعل شايلة هم شاعر “بـ يحاول يعيد ذكريات الحب
الماضى وبـ يدور على الأنثى فى كل تجلياتها”:

فوق السطوح

غية حمام

غاوى الهوا

بس الهوا

مش غاوى رفرفة الحمام

الديوان مجموعة من القصائد اللى بـ تتكلم عن الشاعر
بحالاته المختلفة وهو حزين وهو فرحان وهو غاضب وهو بـ يحب، وشعر سيد بشير صادق
فكأنك بشعره تعرف أنك قريب من شخصيته الواضحة، فقط كل اللى عليك أنك تقرأ القصائد
اللى خلقت كتاب سكتة قلبية للروح وهى:

“”sms في المدرسة، مراكبى، “”sms،
سبنسة، برد، فرح، “”sms، تتصورى، طريق، “”sms،
هلاوس بردانة، مدد، جدى، تيمبو، محاولات للرجوع، برفان، سكة سفر، توازى، مصلوب
بشكل سريالى، تصادم، ألوان، كذاب، نسبية، ازدواج، أنتى، جواز سفر”.