The Definitive Guide to Living in the Capital , Cairo , Egypt

مبدئيًا كتاب اللامكترث من الكتب القليلة اللي هتاخد خمس نجوم على تقييمات كايرو360، لإننا حقيقي طول فترة قراءة الكتاب وإحنا بنسأل نفسنا، هو إزاي الكتاب اتكتب وخرج بالشكل ده؟ يعني إزاي الكاتب خطرت على باله فكرة صعبة وعميقة بالشكل ده، فكتب فيها 200 صفحة بالسلاسة دي؟

اللامكترث هو الكتاب الثالث للمؤلف كيرلس بهجت، بعد كتابين: “التجربة الفكرية لروح أمه”، اللي يعتبر من الكتب الأعلى مبيعًا. وكتاب “بيضة مان”.

الحقيقة إنه كيرلس وعلى الرغم من إنه طبيب جراح، إلا إنه مهتم بشكل كبير بعلم النفس والعلاقات الإنسانية والفن والأدب والفلسفة. وظهر حبه الكبير وثقافته للعلوم المختلفة دي في كتابه الأخير. لدرجة إنك وأنت بتقرأ مش هتبقى عارف إيه تصنيف الكتاب ده. هل هو علم نفس، ولا تطوير ذات، ولا تذوق أدبي، ولا فلسفة؟ والحقيقة إنه الكتاب يعتبر وجبة كاملة دسمة، خلطت الحاجات دي كلها بانسيابية غريبة، وبمهارة ولغة عربية راقية جدًا وعذبة.

بعد قراءة الكتاب كله هتبقى عايز برضه تعرف مين هو بالظبط اللامكترث؟.. لكن أنت مش هتلاقي تعريف واضح ومباشر وصريح. لإن اللااكتراثية هي حالة إنسانية على بعضها. لمّا تقرأ الكتاب كويس قوي هتفهمها، وهتلاقي أفكار منها بتدخل جواك وبتأثر في رؤيتك لحاجات كتير من غير ما تحس.

في مقدمة الكتاب الكاتب ذكر إن اللامكترث إللي بيتكلم عنه له كتير من المسميات. كولن ولسن سماه اللامنتمي، ألبير كامو سماه المتمرد، كارل يونج سماه الانطوائي. وظهر كمان في الأدب وديستوفيسكي سماه الإنسان والصرصار.

وفي النهاية كيرلس بيتكلم عن “مفهوم اللاكتراثية” علشان يُوجز كلامه فبيقول:

“هل يمكن أن تكون اللاكتراثية تيارًا؟ هل يمكن أن تكون أيديولوجية عامة ينتهجها شريحة واسعة من الناس؟ فيكون هناك إمكان لقاء لللامكترثين يتشاركون فيه أفكارهم وخبراتهم؟ فاللاكتراثية يمكن أن تتجسد في تيار نفسي فكري. ولكن لا يمكن أن تنحصر في كونها موضة عابرة، تبحث عن سبق صحفي أو نمط محدود بمكان أو زمان منتظر موته بتجديد أو تحديث. بل هي أسلوب حياتي كامل يعيش في اللامكترث، وليس مجرد يعيشه اللامكترث، يعيش في أعماق زوايا روحه ويتعلق في قاع أفكاره وتخيلاته”.

من مميزات الكتاب ده إنه تفاصيله كويسة جدًا، وحاول فريق عمله بأشكال مختلفة إنهم يخرّجوا كتاب مريح للقاريء ولعينه. علشان كدة لازم نعدي على فريق العمل شخص شخص:

التصحيح اللغوي السليم إلى حد كبير لسارة صلاح، دكتور طارق رزق اللي راجع محتوى الكتاب. الإخراج الداخلي المريح جدًا للعين من رشا عبد الله. هتلاقي الكتاب فيه رسومات رائعة متنسّقة بشكل حلو قوي مع المحتوى، اللي يشمل كلام كيرلس وكتير من الأقوال المأثورة، إللي اترصت بعناية داخل المحتوى. واللي مكنتش هتستمتع بيها من غير الإخراج الداخلي المريح اللي أبرزها. وأخيرا الاكتشاف الجديد في عالم الكتب الرسام الجميل سليمان. اللي عرف يقدم محتوى بصري من الرسومات مناسب جدًا للنصوص المكتوبة. وإللي من غير وجودها القارئ كان هيفقد جزء كبير من متعة الكتاب.

الكتاب بيتضمن 7 فصول كل واحد منهم بيتكلم في جزئية محددة عن اللامكترث: صناعة اللامكترث، اللامكترث نفسيًا، اللامكترث عاطفيًا، اللامكترث فكريًا، اللامكترث دينيًا، وأخيرا خاتمة الكتاب.

اللامكترث – صادر عن دار تويا للنشر والتوزيع – مناسب للقارئ المثقف، المختلف، اللي بيحب يحلل كل حاجة بتحصل حواليه. وبيبص للدنيا دايمًا من منظور مختلف، ويعيش على الطريقة “البرنسية”. وهو فعلًا واحد من الكتب القوية اللي صدرت في 2018. وبننصح بقراءته.