The Definitive Guide to Living in the Capital , Cairo , Egypt

آه والنعمة:

إحنا بـ نتكلم عن رواية ترجمت لـ 59 لغة، ولسه بـ تترجم ثانى.. يعنى ركز معانا لو سمحت، أيوه الأستاذ اللى بـ يقرأ وهو مش مركز، والأستاذ اللى كان بـ يدور غلط وجه هنا، والأستاذة اللى بـ تلعب فى الموبايل وجات لها عالم صوفى ممكن نركز علشان نفهم إيه العلاقة بين تاريخ الفلسفة والرواية وصوفى.

الديلى تلغراف:

(هذه الرواية مثل تسعينيات أليس فى بلاد العجائب، وجواب على أسئلة ستيفن هوكينج "موجز تاريخ الزمن")

التايمز:

(صيغت عالم صوفى لتكون كتابًا كلاسيكيًا شعبيًا فريدًا من نوعه، هى من ناحية لغز محير ومشوق، ومن ناحية أخرى هى مقدمة سهلة وواضحة إلى الفلسفة والفلاسفة).

صوفى:

فتاة شابة أبوها على طول مسافر وهو قبطان بحرى، وأمها بـ تشتغل لحد وقت متأخر، وهى فى الدراسة عايشة حياتها مع حيواناتها الأليفة (حياة عادية) لحد ما بـ تيجي لها رسالة بسيطة لكن معناها عميق (من أنت؟) استسهلت الموضوع فى أوله لكن لما قعدت تفكر صحيح (من أنت؟)

وقفة:

صحيح هنا لازم نقف كلنا مع نفسنا ونفكر أمام المراية (من أنت؟) مش مجرد اسمك وعنوانك وسنك وبـ تشتغل إيه.. لا الموضوع أكبر من أنت يا اللى بـ تقرأ الرواية أو اللى بـ يقرأ مقالنا على كايرو 360، هل فعلًا عارف أنت مين؟ بـ تفكر إزاى؟ إيه هو هدفك فى الحياة؟ وإيه هى معتقداتك وأفكارك؟ تقدر تجاوب على كل ده؟… أرجوك فكر قبل ما تجاوب، وجرب تكتب إجاباتك فى ورقة وتبص عليها وتعرف أنت مين بجد.

صوفى ثانى:

هنا لازم نقف على موضوع مختلف وشيق، فكرة الرواية قائمة على مجموعة رسائل لصوفى، بـ تشكل عالمها وبـ تيجى بشكل سرى هى ما تعرفش عنه حاجة، الرسايل دى بـ تشكل حياتها ووعيها وكمان بـ تديها تجربة كبيرة فى عالم الفلسفة، الرسايل دى بـ تحاول تجاوب على كل الأسئلة المحيرة اللى حولنا من خلال قراءة فى تاريخ الفلسفة، يعنى جوستاين تعب جدًا لحد ما قرأ تاريخ الفلسفة وبعدين لخص أفكاره وتطوره، وبعدين بسطه، وبعدين عمل الحبكة وبعدين دخل الموضوعات جوه الحبكة.

الحبكة:

لازم نقول أن حبكة الرواية عادية، بنت بـ تيجي لها مجموعة رسايل عن الفلسفة، لكن اللغة اللى كُتبت بها والسهولة والعمق فى نفس الوقت، والسهل الممتنع اللى بـ يشتغل عليه الكاتب وفكرة أنك تخلى تاريخ الفلسفة مجموعة حكايات هـ يخليك تفهم إيه الموضوع من أول الرجل اللى شاف الفلسفة شيء طبيعى وسؤال طبيعى فى حياة الإنسان لحد….

الفلسفة:

جنب التنوع والجمال واللغة البسيطة والمعرفة هـ نفهم حاجات كثير عن تصور الإله.. والأساطير اللى هى توازن هش بين قوى الخير والشر.. فلاسفة الطبيعة اللى قالوا لا شيء يولد من العدم… وديمقريطس ولعبته الأكثر عبقرية فى العالم.. وآثينا وأفلاطون وأرسطو وعصر النهضة وديكارت وسبينوزا وهيوم وبيركلى وعصور التنوير وكانط وهيجل وماركس وفرويد والنجوم.