The Definitive Guide to Living in the Capital , Cairo , Egypt

عقدة سليمان

عقدة سليمان: رواية من الكآبة للمغامرة

  • روايات
  • من الآن
  • عربي عربي
  • 35 EGP
  • مكتبات وسط البلد
تم التقييم بواسطة
Rasha Zeidan
قيم
قيم الآن
عقدة سليمان: رواية من الكآبة للمغامرة

الرواية بـ تحكي عن مدحت القبطان اللي وُلد غني، وأبوه كان من المسؤولين المعروفين في البلد، لكن حياته ما كانتش لطيفة، يعني زوجته رفعت عليه قضية واتطلقت منه وحياته بقيت سخيفة وشرب الخمر وكان هـ يعمل مصيبة بالسفينة اللي هو قبطانها، وطردوه من الخدمة، وقرر أنه يبيع ممتلكات العيلة ويخلي الفلوس في البنك، لكن حياته روتينية جدًا ومش عارف يعمل حاجة جديدة يغير بها حياته، مافيش شغل ولا عيلة ولا زوجة ولا حتى ابنته سيرين اللى أخدتها أمها معاها لشرم الشيخ بحكم قضائي.

حياة كئيبة وعزلة مش عارف يخرج منها، شوية يعيش على ذكرياته وشوية يحاول يتفرج على التليفزيون اللى بـ ينقل له مشاهد كثير من الإعلام العجيب اللى بـ يتكلم عن حاجات عجيبة منها اللى بـ تحكي عن حاجات شخصية أو الشيخ اللى بـ يدعو الناس لترك الذنوب والبكا على الخطايا أو النساء اللى بـ تتكلم عن علاقتها أو البرامج اللى بـ تحكي عن الحيوانات والزراعة وغيرها وغيرها.. قرر يروح علشان يبيع شاليه العائلة في إسكندرية وهناك بـ تتغير الدنيا خالص.

هناك بـ يلاقي زجاجة غريبة ومقفولة وبـ يتعرف على فريدة الباحثة في مكتبة الإسكندرية وبـ يبدأ التعارف ما بينهم، شخصيته اللى بقيت منطوية وكئيبة، وفريدة المتفتحة على الآخر واللى متحررة وبـ تحب الحياة.

تفاصيل كثير في الرواية ومغامرات وشخصيات كمان كثيرة قوي بـ تدخل في الحياة، والكئيب ما بقاش كئيب لكن حياته تحولت وبقيت مجموعة من الأبحاث والمغامرات، والرواية شيقة صراحة وفيها تأثر بالتاريخ وفيها كمان مجموعة معلومات قيمة، لكن لغتها عادية مش تشدك قوي، كمان فيها مشكلة ثانية أن السرد كله من ناحية واحدة هو الراوي العليم اللى عارف كل حاجة وبـ يحكي لك، فـ تحس وأنت بـ تقرأ أن فيه حد بـ يحكي لك كل حاجة وده بـ يخلي مشاركتك في القراءة ضعيفة، وكمان فيه مشكلة ثانية في الحوار.

تعودنا من فترة طويلة أن الحوار يبقى بالعامية وده بـ يبسط الدنيا وبـ يخليك تعيش مع أبطال الرواية وكأنهم عايشين معاك أو جزء من مجتمعك أو تعرفهم، وطبعًا دي من الحاجات اللى بـ تنجح الرواية من وجهة نظرنا يعني، أما بقى أن الحوار يبقى بالفصحى ده هـ يخليك تحس أنها رواية مترجمة وأنها مش فى مصر ولا حاجة..

عمومًا أسئلة كثير هـ تحاول تدور عليها بعد ما تقرأ كلامنا ده، يا ترى الرسالة كان فيها إيه؟ وإيه الرسومات دي؟ وإيه المعلومات التاريخية؟ وإيه علاقة النبي سليمان بالموضوع؟ نقول لكم.. اقرأوا الرواية وأنتم تعرفوا.

عجبك ؟ جرب

"ظل الأفعى" ليوسف زيدان.

عن الكاتب

د. محمد عزب، أستاذ الأدب الإنجليزى بجامعة الإسكندرية، صدر له عدد كبير من الكتب والروايات منها رواية "صدفة"، و"خيوط القدر".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح