The Definitive Guide to Living in the Capital , Cairo , Egypt

الشعر:

أول ما مسكنا الكتاب علشان نقرأه -وهو للشاعرة اللى حصدت مجموعة من الجوائز على مر السنين اللى فاتت- كان لازم نقف أمام كل كلمة.. لأن الشاعر لما يكسب أكثر من جايزة من المهم أنك تقف عند كلامه وتشوف يقصد إيه.. والقصد والنية في "علبة دبابيس" هي "شكة شعر".

 

شكة شعر:

قعدنا نفكر في العلاقة بين علبة دبابيس والكتابة بالعامية.. ولما خلصنا الديوان عرفنا العلاقة، ألا وهي شكة شعر، وهو مصطلح لو ينفع نستخدمه هـ يبقى المعبر الأقوى عن الديوان.. في كل نص فيه شكة ما بـ تحاول عبير تشكها للقارئ علشان يتفاعل معاها وهو بـ يقرأ وتعالوا نشوف الدبابيس المختلفة.

 

شكات مختلفة:

شكة الذكريات هـ تلاقوها في

جوه الكراتين

أحلام وسنين

كوباية إزاز

وشفايف محطوطة في برواز

وشكة الثورة هـ تلاقوها في عمر مكرم وريحة الشهيد..

والوقفة قدام الرصاص الحي

تشبه كتير الوقفة ورا تمثال

عمر مكرم

وشكة الإنسان هـ تلاقوها في الوجع..

ما بقاش فيه حاجة تشتهى

ولا فيه طريق

أصبح بـ يفرق عن طريق

وفي الخوف من المجهول وخوف الحبيب والمجهول والمستقبل..

لسه شايف سوري عالي

لسه خايف من جناني

لسه واقف عند باب قلبي

وبـ تفكر تخبط مرة تاني…

لحد ما توصل لحافة العشق وتقول:

نفسى أتلاشى في كيانك

نفسي تهزم خوفي وتزلزل كياني

الزمن في قلبي واقف

لما تعرف

لما تفهم

لما تدخل دنيتي

يبدأ زماني

 

أما شكة الحزن ودي اللى فيها نفس شعري طويل ومسيطر على أغلب الديوان هـ نلاقيها في موضوعات كثير بـ تحاول فيها عبير فوزي الخضوع للحزن مرة ومقاومته مرة ثانية.

يا قبضة العتمة يا ريت تسيبيني

الحلم فوق الشمس مستنيني

اوعى تخاف يا حلم أنا جاي لك

……..

يلا تعالوا واشهدوا

هزيمة آخر الفرسان

السيف بـ يسقط في التراب

وبـ يطحنه خطو الزمن

…….

كنت باتألم وباكتم

قولت بكرة ييجي بكرة

واشتكي منك ولك

 

علبة دبابيس:

القصيدة اللى موجودة على ظهر الديوان هي تميمة عشق.. وهي قصيدة فارقة فعلًا عن العشق والحياة عن التميمة اللى بـ تتقري.. عن الحصان اللى في خيالها واللى مش زي أي حصان، هو حصان الخيال الجموح، حصان الحزن عن الطلاسم المقرية، والحلم اللى بـ تتمناه والفارس اللى ضاع حلمه فمات على حصانه واتنسى في كتب التاريخ، عن ملخص حياة البشر بـ تقول:

تميمة عشق منسية

حروف من الأصل مكتوبة

حصان مش زي أي حصان

وسيف مخطوط عليه بالنور

طلاسم بس مقرية

عيون وكفوف

وحلم ما داقش طعم الخوف

وفارس مات على حصانه

وعاش على صفحة مطوية