The Definitive Guide to Living in the Capital , Cairo , Egypt

من برديات الوصايا:

“ما من أحد استطاع أن يصل إلى آخر حدود الفن، ولا يوجد فنان بلغ الكمال فى إجادته”

هى دى أول جملة هـ تقابلنا فى الرواية اللى اسمها بجد لازم يشدنا جدًا.. “عهر مقدس”.. وتقول يعنى إزاى يعنى عهر ومقدس مع بعض!.. ده اللى بـ نحاول نكتشفه مع بعض عن الرواية وعن العهر لما يبقى مقدس.

أهلاً بكم فى كيمى، وكيمى معناها الأرض السوداء.. والمقصود بها مصر الفرعونية.. وإحنا دلوقت بـ نتكلم فى زمن ثانى خالص وعالم ثانى خالص. إحنا فى حكم الأسرة (11) وطيبة هى العاصمة الرسمية لمصر و”أبيدوس” هى العاصمة الدينية لمصر والناس بـ تحج لها، واشتهرت أسطورة  “أوزوريس” المعروفة وإزاى أخوة “ست” قتله وزوجته “إيزيس” جمعت جثته ثانى علشان ييجى ابنه للدنيا وينتقم من قاتل أبيه.. وطبعًا اشتهر معاها كهنة معبد “آمون” وكان لهم نفوذ جامد جدًا.

فى الوقت ده بـ تدور أحداث الرواية اللى معانا ومع أن ناس كثير بطلت تكتب روايات تاريخية ومرتبطة بعصور فرعونية بالذات.. يمكن الروايات التاريخية بقيت بـ تعتمد على عصور ثانية زى مثلاً “عزازيل، قمر على سمرقند” لكن المهم إحنا عند الفراعنة وعندنا شخصيات عادية جدًا من الشعب المصرى الغلبان وكأنه مكتوب عليه الغلب من زمان زى “مانى” و”سنحوت” وأخوها “محب” وحبيبته “ددت” ووالديهما.

شخصيات كثير هـ تقابلكم فى الرواية وحكايات عن الفراعنة والكهنة واللى بـ يعملوه.. فى الأول هـ تحس أن أسماءهم صعبة عليك لكن “أميرة عز الدين” كاتبة الرواية بـ تعرف تأخذك لمناطق ثانية غير الأسماء.. طبعًا الموضوع كبير وبـ يعالج مشكلة ممكن تكون موجودة فى أى عصر.. ويمكن دى الحاجة الوحيدة اللى تخليك تتقبل فكرة الرواية عن الفراعنة فى زماننا دلوقت.

الرواية بـ تتكلم عن قصص الحب الطاهرة والناس الطيبة وعن الشخصيات الشريرة.. زى شخصية الكاهن الشاذ واللى دائمًا بـ يستغل منصبه وبـ يحب جدًا يؤذى بنات الناس.. وطبعًا مافيش حد يقدر يتكلم معاه لأنه كاهن.. ومن هنا بـ تيجى فكرة “العهر المقدس”، قصة الكاهن لما ينحرف ويستغل نفوذه.. وقد إيه ده ممكن يكون سبب فى ظلم ناس كثير خاصة لما يكونوا من الفقراء.

الرواية جيدة لها لغة مختلفة بـ تحاول فيها أميرة تنقلك للزمن الفرعونى فعلاً ويمكن ده أخذ منها جهد كبير فى الكتابة.. وإن كنا شايفين أنها كمان قدرت تعمل ده عن طريق الاستشهاد بنصوص فرعونية من كتب ثانية.. وبـ تدخلها جوه الرواية وكمان بـ تستفيد من الأساطير الفرعونية وعادتهم وتقاليدهم يعنى واضح أنها ذاكرت كويس.. فى النهاية بـ تلاقوا مفاجأة كبيرة مستنياكم.. يا ترى الموضوع كله كان حكاية وخلاص.. كان حلم.. كان حقيقة.. لازم تقرأوا علشان تعرفوا.