The Definitive Guide to Living in the Capital , Cairo , Egypt

كتب
غزل البنات

غزل البنات: ديوان عن العشق والحياة

  • ديوان شعر
  • من الآن
  • عربي عربي
  • 20 EGP
  • مكتبات وسط البلد
تم التقييم بواسطة
Ahmed Abd El Gawad
قيم
قيم الآن
غزل البنات: ديوان عن العشق والحياة

اسم حلو مع أنه بـ يرجعك للفيلم القديم “غزل البنات” اللى أُنتج سنة 1949 وكان آخر فيلم لنجيب الريحانى.. وليلى مراد.. وأنور وجدى.. ومحمد عبد الوهاب.. يعنى اسم بـ يلعب فى الذاكرة جدًا.. ديوان “غزل البنات” لأسامة عادل مُقسم 9 مقاطع كبيرة تعالوا نتعرف عليها:

 

فرحة وأمل:

افرح كل الفرحة فى وطنك

اعمل من أفراحك قصر

واحزن بره حدودك جدًا

علشان تحزن جمع وقصر

باين أنه بـ يقول لك أول معلومة على الفرحة والأمل لازم تفرح بالحياة والدنيا حتى ساعة الحزن افرح ولا يهمك.. لازم تلملم كوم أحزانك فى شنطة وترميه فى النهر لازم تعيش الحياة وتطمن وتضحك ويبقى عندك أمل، دى الرسالة الأولى.

 

دنيا:

الشعر الأبيض بـ يعلم

أن الدنيا عليك بـ تسلم

فبلاش تحزن أو تتألم

بين الموت والعيشة ثوانى

ها؟ هـ تتغر بالدنيا والحياة وهـ تتعلم طعم الموت علشان تفهم الدنيا ولا ناوى تعمل إيه؟ ودى الرسالة الثانية.

 

حبيبة:

بحبك لما تتمايلى على الدنيا بخفة دم

وأحبك لما تتحايلى على الدمعة وكل الهم

وأحبك لما تخزى العين وأحب الحمرة ع الخدين

وأقول لك كلمتين حلوين تقولى ببسمتك إتلم

عن الحبيبة والحب والضحكة الجميلة والبنت الحلوة والكتابة عليها تكون الرسالة الثالثة.

 

نضال:

سمعت صوت الآذان والرصاص والجرس

وسمعت كدب الدقون.. ويا دب الحرس

وجنة مش مكتوب عليها ده حزب إيه

مكتوب عليها أنه مصرى وقطع النفس

يا ترى النضال آخرته إيه؟ هـ ننزل الميدان ولا هـ نتعلم من أخطاءنا عن القدس ومصر والميدان؟ دى الرسالة الرابعة.

 

حرية:

الحرية مش حرام، والوحدة والصمت واللهفة مش حرام.. الحرام أنك تعيش من غير حرية.. ودى الرسالة الخامسة.

 

رحيل:

من الرسائل المهمة فى الديوان هى رسالة الموت وطالما كله هـ يموت يبقى لازم تسيب أثر فى الحياة وتسيب حاجة للى جاى بعدك:

لما أموت

اوعوا تيجوا على قبرى

وتبكوا على الرفات

اوعوا تبكوا على اللى فات

ابكوا على الحى الجعان ع الجبان..

ودى الرسالة السادسة..

 

رضا وإيمان:

ما تنامش مزعل روحك نهائيًا

نام راضى وكله أكيد هيهون

الروح بـ تهاجر للسما يوميًا

ورجوعها ما هواش شيء مضمون

أنك تكون راضى ومرتاح وكلك إيمان وعندك روح طايرة رغم الجاذبية وسايب ذكرى حلوة وبـ تدعى للناس، والناس بـ تدعى لك.. هى دى الرسالة السابعة.

 

دعاء:

ادعوا لى بظهر الغيب

علشان لو مرة هـ أغيب

ما أبكيش الذكرى الحلوة

والجرح ف قلبى يطيب

المباشرة فى الدعاء للغير ولنفسك على الرغم من الجروح الكثير والنفس اللوامة، هى دى الرسالة الثامنة..

 

شجن الرسالة التاسعة:

أنا روحى اتخبطت فى الزحمة

مش لاقى ف قلبى براح

ألاقيش كده وياك يا صديقى

نمرة سمكرى أرواح

 

ذات آخر رسالة:

يوم خمسة مارس

فى السنة الثانية بعد التسعين

زاد واحد أحلامه زيادة

ع البنى آدمين

الديوان مباشر جدًا والحليات اللى بـ تلعب على أوتار المشاعر مش على اللغة والصور زى أجزاء كثير فى الديوان.. هى اللى باينة فى طريقة الكتابة.. وفيه بعض الكسور فى الوزن.. لكنه صادق برضه جدًا.

عجبك ؟ جرب

بانادورا للشاعر ميسرة صلاح الدين.

عن الكاتب

أسامة عادل، شاعر شاب من مواليد الشرقية، يحب الغناء وله العديد من الأغانى المنفردة من كلماته.. حاصل على بكالوريوس الصيدلة، ويعتبر ديوان "غزل البنات" أول دواوينه.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح