The Definitive Guide to Living in the Capital , Cairo , Egypt

فرسان العشق الإلهى

فرسان العشق الإلهى: أحبوا الله فأحبهم

  • تاريخ
  • من الآن
  • عربي عربي
  • 65 EGP
  • مكتبات وسط البلد وديوان و
written by
Ahmed Abd El Gawad
قيم
قيم الآن
فرسان العشق الإلهى: أحبوا الله فأحبهم

فرسان:

علشان هما حاربوا واتحاربوا، علشان هما رجال أفعال وأقوال، هنا سكنات وحركات، وهمسات وصرخات وتدبير وتفكير وتعبير، هنا فرسان بالفعل فى التاريخ الإسلامى.. قرر الكاتب أنه يصَّدَر أول كتابه بفرسان لأنهم جاهدوا نفسهم قبل أى حاجة فكان لازم يتسموا بفرسان المحبة والتسامح والزهد والمعرفة الربانية.. فرسان بحق دورت عن الحب وكانوا مش زى أى فرسان، كانت قلوبهم رقيقة ونفوسهم عالية، وروحهم بـ ترفرف فى كل مكان على الأرض وفى الملكوت مع الله، رضوا عن الله فرضى الله عنهم.

 

العشق:

إيه بقى الموضوع؟

يعنى هما بـ يحبوا بعض يعنى ولا بـ يحبوا الناس ولا بـ يحبوا بمعنى العشق اللى عارفينه.. وإيه علاقة ده بالله؟

أسئلة لازم تيجى فى ذهنك وأنت بـ تقرأ عن الصوفية.. أسئلة كثير قرر د. عمار على حسن أنه يحلها فى كتابه “فرسان العشق الإلهى” اللى كان مجموعة مقالات كثير جدًا وعلى فترات متفاوتة.. بـ يجمعها خيط واحد وهو الكلام عن الصوفية ورجال الصوفية.

 

الإلهى:

الكتاب إعادة لكتابة التاريخ الدينى الإسلامى والعربى.. بالكلام عن الصوفيين أفضل من تكلموا عن الحب الإلهى وعن حلاوة العلاقة مع الله.. وكانت لهم أحوال ومقامات، ومعرفة بالله هما ناس حبوا ربنا بالفعل فحبهم الله وكانت حياتهم كلها لله.

 

عنهم:

هـ تلاقى كلام عن النفرى الفيلسوف الكبير اللى ساب “المواقف والخطابات” مع الله، وعن ابن عربى الإمام الأكبر والخواص شاعر الصوفية المتوكل دومًا، الشيرازى الجسر بين الشرق والغرب، الشاذلى اللى خرجت من عبايته أغلب المناهج والطرق الصوفية، أبو الدرداء حكيم أهل الصُفة، الشبلى تاج الصوفية، النخشبى العارف المتوكل اللى شاف موته، الغزالى فقيه الصوفية، الحلاج اللى أهلكته شطحاته، الخراز لسان الصوفية اللى حاور إبليس، الدارانى ريحان القلوب وبندار الجائعين، أبو طالب المكى قوت القلوب، أبو عبد الله الجلاء الرجل اللى وهبه أبواه لله، أبو مدين الغوث أستاذ الألف شيخ، البسطامى المختَلَف على أحواله وأقواله، بشر الحافى اللص اللى بقى عبد ربانى، التسترى مفسر القرآن اللى انجذب، الرومى المتصوف الشاعر اللى أدهش الغرب، الجنيد طاووس العلماء وسيد الطائفة العاشقة، حاتم الأصم لقمان المتصوفة اللى عاش زى الطيور، الحارث المحاسبى اللى عبد الله كأنه يراه، الحسن البصرى رائد المتصوفين وسيد التابعين، داود الطائى الرجل البصير الراعى، ذو النون المصرى رائد التصوف اللى اختلف عليه الناس، رابعة العدوية شهيدة العشق الإلهى، السرى السقطى واسطة العقد بين قطبين من أقطاب الصوفية، السهروردى رجل الإشراق اللى قتلته أفكاره، البلخى الزاهد المجاهد اللى أبكى هارون الرشيد، الفضيل بن عياض أروع الناس وحجة أهل زمانه، القشيرى زين الإسلام والجامع بين أشتات العلم، الجيلانى صاحب الوصايا اللى ظلمه مريدوه، الجيلى اللى دور عن الإنسان الكامل، عبد الله بن المبارك سيد الزاهدين، عمر بن الفارض سلطان العاشقين، فريد الدين العطار صاحب منطق الطير، مالك بن دينار “كاتب المصاحف”،  الكرخى، العارف المتسامح، ويحى بن معاذ الواعظ الذكار.

عجبك ؟ جرب

"شجرة العابد" لنفس الكاتب.

عن الكاتب

عمار على حسن دكتور فى العلوم السياسية، صدر له نحو عشرين كتابًا فى السياسة والتصوف والنقد الأدبى وله عشرة أعمال روائية وقصصية منها: "شجرة العابد وسقوط الصمت" وحصل على العديد من الجوائز.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح