The Definitive Guide to Living in the Capital , Cairo , Egypt

بنفرح لما نلاقي كتاب حلو في مكتبات القاهرة.. وسط زحمة الكتب السيئة.. ومؤخرًا انتهينا من قراءة كتاب للقتل اضغط واحد للمؤلف أحمد حسين أبو الرجال.. كتاب جميل.. شيق.. سريع.. هينقلك لعالم تاني من المغامرة والإثارة.

غلاف الكتاب نفسه مثير، اللون الأسود مسيطر عليه، واسم الرواية هو البطل.. وأكتر عنصر واضح في الغلاف. كأن المصمم بيقول لك أن الاسم نفسه يستحق كل الاهتمام لانه اسم مثير وغامض وغريب.

الرواية بتحكي عن شاب مصري زي ملايين من المصريين، اسمه أمير الريس، بيفقد عدد من أفراد أسرته، وبتنتقل حياته من مرفهة لحياة صعبة.. وعلشان يقدر يتحمل تكاليف الحياة، بيقرر يشتغل في كول سنتر لشركة اتصالات.

في أول جزء من الرواية بنشوف الصعوبات اللي بيواجهها أمير بعد ما حياته اتغيرت، وبنشوف الظروف القاسية اللي بيعيشها مع والدته بعد وفاة والده و أخته في حادثة، وإصابة والدته بداء باركنسون.

لكن الأمور بتزداد إثارة لما بيسمع أمير في مكالمة مع أحد العملاء صوت صريخ، وحد بيقول باللغة الإنجليزية.. هيلب.. لكن ما حدش بيصدقه، وبيلاقي نفسه لوحده في مواجهة شخص بيمارس أبشع الجرائم.

أسلوب الكتابة سريع جدًا وشيق، وهتلاقي نفسك مهتم تعرف إيه الجديد ومش قادر تسيب الرواية من إيدك.

يمكن كنا نتمنى الكاتب يتعمق في الشخصيات أكتر من كدة لأن بعضها كان سطحي شوية، لكن بصفة عامة الرواية حلوة والكاتب فعلًا موهوب ويستحق التشجيع. ليه؟ لأنه نجح يخلينا نحس أننا بنتفرج على فيلم سينما مش بنقرا رواية مكتوبة وخلاص.

الأحداث مثيرة جدًا وعاوزة تركيز شديد خصوصاً في نصفها الأخير.