The Definitive Guide to Living in the Capital , Cairo , Egypt

محال

محال: رواية جديدة ليوسف زيدان

  • يوسف زيدان
  • روايات
  • من الآن
  • عربي عربي
  • 25 جم
  • دار الشروق، مكتبة أ، عمر بوك ستور، فيرجن
تم التقييم بواسطة
Bassem Abou Arab
قيم
قيم الآن
محال: رواية جديدة ليوسف زيدان

“مُحال”.. رواية جديدة للكاتب يوسف زيدان وهي الرابعة فى مؤلفاته القصصية، الرواية بـ تدور أحداثها فى التسعينيات وبـ تحكي عن شاب سوداني فى العشرينات من عمره بـ يدرس في السودان إنما بـ يعيش فى أسوان فى فترة أجازته و بـ يشتغل مرشد سياحي. بـ يبدأ يحتك بالسائحين وبالتبعية بـ يقابل مغريات بحكم شغله زي أنه يتعرض عليه إقامة علاقات مع السائحات أو أنه يجلب مخدرات مقابل عروض مالية إلا أنه كان بـ يتعفف بمنتهى الوضوح لأنه شخص ملتزم ونشأ على تربية دينية وكان دائمًا يفكر نفسه بالحديث الشريف اللي بـ يتكلم عن “شاب ينشأ فى طاعة الله”. و رغم كده بـ تمر أيام شغله فى السياحة ومرور أفواج سياحية أشكال وألوان لغاية ما يقابل “نورا” الطالبة القادمة مع فوج طلبة جامعة، هو ونورا بـ يقربوا من بعض وبـ تنشأ بينهم علاقة حب قوية وملتهبة بـ يتخللها فواصل من الفراق والبعد بحكم اختلاف أماكن إقامتهم لغاية ما بـ تيجي لحظة الفراق النهائية بينهم نتيجة تصاعد الأحداث واللي ساعتها بـ تعمل صدمة لبطلنا –اللي لم يذكر اسمه طوال الأحداث- و بـ يقرر يسافر لفرصة عمل فى الخليج خصوصًا بعد الحادث الإرهابي اللي حصل فى الدير البحري وسبب أزمة ركود السياحة فى مصر فى الفترة دي.

بعد سفره للخليج وبُعده عن مجال السياحة بـ يشتغل فى مصنع لتعبئة منتجات الألبان ويبدأ يتطور ويكسب ثقة الرؤساء فى الشغل لغاية ما تيجي له الفرصة للترقي فى الشغل ويسافر يمثل فرع المصنع الجديد فى أوزباكستان، ثم يتغير مسار عمله بالكامل بأنه يشتغل كمصور فى أحد القنوات الفضائية اللي بـ تغطي أخبار قصف أمريكا لأفغانستان لغاية ما يتم اعتقاله ويبدأ التحقيق معاه لانتزاع اعترافات منه تخص مقابلة كانت تمت بينه وبين أسامة بن لادن من مدة كبيرة أيام لما كان فى السودان، وساعتها بـ تبدأ الأهوال اللي هـ يشوفها فى فترة اعتقاله.

الشيق فى الرواية هو دمج أحداث حقيقية بالسياق الروائي للقصة وتوضيح تأثير الأحداث دي على الأبطال بشكل درامي ومؤثر، ودي من الحاجات اللي بـ يتميز بها يوسف زيدان فى مؤلفاته عمومًا، ومن الحاجات الملفتة كمان أن ممكن القارئ يحس بتشابه بشكل أو بآخر بين بطل الرواية و بين “هيبا” بطل رواية عزازيل من ناحية أن الاثنين أشخاص ملتزمين ومحافظين لكن بـ ينخرطوا فى أحداث شاذة عن طبيعتهم المحافظة ورغم كده مش بـ تتبدل طبيعتهم مع فارق طبعًا أن أحداث عزازيل بـ تدور فى حقبة زمنية مختلفة تمامًا.

عجبك ؟ جرب

رواية "عزازيل" لنفس الكاتب.

عن الكاتب

يوسف زيدان كاتب وروائي وباحث متخصص فى التراث العربي، له مؤلفات عديدة فى الفكر الإسلامي والتصوف، من أشهر أعماله "النبطي" و"ظل الأفعى" و"عزازيل" الفائزة بالجائزة العالمية للرواية العربية فى 2009.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح