The Definitive Guide to Living in the Capital , Cairo , Egypt

مسجل بعلم الوصول

مسجل بعلم الوصول: جوابات عن الحياة والحب

  • ديوان شعر
  • من الآن
  • عربي عربي
  • 20 EGP
  • مكتبات ألف ، فكرة، والمكتبات الكُبرى
تم التقييم بواسطة
Ahmed Abd El Gawad
قيم
قيم الآن
مسجل بعلم الوصول: جوابات عن الحياة والحب

هو إيه اللي مسجل؟ سؤال نط فجأة قدامي، ليه اختار مروان صبحي العنوان ده؟ لو أنت مهتم قوي أن الجواب يوصل لشخص بعينه، تبعت له جواب مسجل بعلم الوصول، علشان مايوصلش غير للشخص ده بالتحديد.. طب إيه الجوابات اللي عايز مروان يوصلها بالظبط لناسها؟ (سؤال أول)

لو أنت شاعر تبعت ليه جواب؟ (سؤال تاني)

مين أهم حد عندك عايز تبعت له جواب؟ (سؤال تالت)

يا ترى الجواب وصل ولا لأ؟ (سؤال رابع)

الإجابة:

علشان نجاوب على الأسئلة اللي فاتت لازم نعرف أن مروان صبحي شاعر شاب، عايش حياته للشعر وبس، بيهتم بكل تفاصيله، بيقول الشعر في الشارع والجامعات والندوات والملتقيات، نفسه شعره يوصل لكل الناس، وبالفعل هو بيحقق ده، والدليل الجمهور الكبير اللي بقى يسمعه دلوقتي، وخلونا نحاول نجاوب على أسئلة الديوان..

الجوابات اللي عايز مروان يوصلها هي باختصار للدايرة الصغيرة اللي بيحبها (والدته ووالده وأخوه وأصحابه) وبتوصل الجوابات كمان كل المحترمين والمحترمات، وبتوصل للذروة وهو بيبعت رسايله لربنا وسيدنا النبي.. باختصار مروان ماسابش حد..

أما ليه اختار النمط ده في الكتابة، من وجهة نظرنا علشان هو بجد بيجيد الاختيار، يعني عارف إيه الشكل اللي هيعلق مع عين القارئ، وكمان مع سمعه، لغة الجوابات لغة أبدية ماينفعش تختفي، صيغة الجوابات واخدة صيغة السر اللي عايز أقوله لك لوحدك، علشان كده الديوان لازم ينجح لأن كل واحد هياخد الديوان ده كأنه مكتوب له هو بس، مش لحد غيره.

أما عن أهم حد عندك عايز تبعت له جواب، فده سؤال حضرتك بعد ما تخلص قراية تقعد تفكر وتكتب (جواب – رسالة – إيميل) أي حاجة وتبعتها للشخص اللي يستحق.

وإجابة السؤال الرابع هى باختصار أن مروان بالفعل وصل للناس، والدليل زي ما قولنا لقاءاته وانتشاره الذكي بين الشباب.

 بعلم الوصول:

طريقة مروان في الكتابة بتقولنا إننا قدام  شاعر حقيقي ومكتمل ومتحقق كمان، وعامل مشروع كامل بيهتم فيه بالتفاصيل وبيلعب على الوجدان.

وهنسيبكم مع يسلم يد بيد لحبيبنا النبي عليه الصلاة والسلام..

قبل ما أنسى آخر حاجة

مش عارف أكتب عنوان

وأنا خايف أبعته ما يجيش

فأنا هادخل دلوقتي أنام

ويا ريت لو أشوفك في منام

ويا عالم بكرة مين هيعيش

مش يمكن ربك يتوفاني

وأقوم وألقاني فى الجنة هناك

ويا ريت ما تسيبني هناك وحدي

أنت أكتر حد أكيد عارف

لو كل الناس نامت بالليل

كنت أفضل صاحي وبستناك

وجوابي في إيدي ومش باعته

أنا واثق إنى في يوم هاقراه

في الجنة معاك

عجبك ؟ جرب

ديوان فلوماستر أبيض للشاعر محمد إبراهيم.

عن الكاتب

مروان صبحي، شاعر عامية وفصحى، حصل على المركز الأول بجامعة عين شمس سنتين متتاليتين عن كلية الآداب، والسنة الثالثة كان عضو لجنة التحكيم بنفس المسابقة، مَثّل جامعة عين شمس بمهرجان الشعوب أمام 13 دولة، واشتغل كمذيع إذاعي لمدة ثلاث سنوات.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح