The Definitive Guide to Living in the Capital , Cairo , Egypt

أول حاجة شدتنا في الكتاب ده عنوانه.. “المنحلة تتزوج سريعًا” عنوان صادم وجرئ لكن أول ما شفناه توقعنا إنه الكتاب هيطلع شبه Why Men Marry Bitches والحقيقة إنه طلع كدة بالظبط. الكتاب ده هو الترجمة الخفيفة للكتاب الأجنبي الأشهر والأفضل مبيعًا للعلاقات، الميزة إنه اللي مش متعود يقرأ بالإنجليزي هيقرأ الكتاب ده ويوفر على نفسه قراءة الكتاب الأجنبي إلى حد مش بطال.

طبعًأ كان لازم الكاتب يعرّف مين هي الفتاة “المنحلة” بالظبط علشان الدنيا تكون واضحة، الكتاب ما يقصدش بالمنحلة الفتاة منعدمة الأخلاق

“الفتاة المنحلة هي التي أحلّت نفسها من التعقيدات والقوانين والأُطر، فكان عقلها هو مرجعها الخاص. فتاة اختارت أسلوبًا خاصًا في ترتيب أولوياتها، خرجت عن المألوف وأحلّت نفسها من كل المفاهيم القديمة والمسلمات، فكان أهم ما يشغلها أن تعيش كل يوم إلى أقصى حد ممكن، فلم يعد الاتكال على رجل كي يحقق لها الأمان ويحميها ويأذن لها بالسعادة معنى مفهوم، كما لا ترى الوحدة سُبة أو نقيصة يجب التخلص منها بل هي فرصة لاختبار الحياة بمرونة أكبر ومدى أوسع”.

رغم إن الكتاب موضوعه شيق ومفيد فعلًا إلا إنه للأسف فيه “استسهال” واضح وكان نفسنا يبقى منظم أكتر من كده. أولًا الكتاب مافيهوش مراجعة لغوية من أي نوع للأسف، كمية رهيبة من الأخطاء الإملائية في كل فقرات الكتاب لدرجة تخلي القارئ الملم بأبسط قواعد اللغة العربية منزعج وهو بيقرأ، إحنا قلبنا الترويسة علشان نشوف مين إللي مصحح الكتاب ده لغويًأ وزي ما توقعنا ما لاقيناش اسم للمصحح. الفكرة التانية المزعجة بالنسبة لنا عدم الإشارة لأي مصادر أو قراءات ساعدت الكاتب في كتابة الكتاب.. من الحاجات المهة في كتب العلاقات والتنمية الذاتية وجود مصطلحات باللغة الإنجليزية أو مراجع ومصادر علشان القارئ إللي عايز يستفيد فعلًا بقدر يرجع ليها ويستزيد أكتر بالبحث أو على الأقل يبقى متاكد من صحة المعلومات المكتوبة وكأنها مسلمات.

فيه فصلين في الكتاب بعنوان “الجنس بدون خسائر” و “في السرير” مشكلتهم إنهم مترجمين ترجمة شبه حرفية من كتاب Why men marry bitches بشكل مافيهوش مراعاة لقارئ الكتاب المصري إللي هيشوف معظم المكتوب غير متناسب معانا تمامًا اللهم إلا في فئة قليلة جدًا من المجتمع متحررة.. يعني أغلب القارئات إللي هيمشوا ورا المكتوب في الفصلين دول فيما يتعلق بالجنس هيروحوا في علاقاتهم ورا الشمس في الغالب! الكلام ده مش متماشي تمامًا مع العقلية الشرقية التقليدية إللي هي أغلب الجمهور المستهدف للكتاب ده فكان لازم يتعمل تمصير ومعالجة قوية للجزئية دي علشان فعلًا تكون مفيدة.. الكاتب حاول يوظف فقرة في الكتاب للجزء لكن في رأينا ماكانتش كفاية إنها تناسب القارئ ومعتقداته.

“في شعوبنا العربية، وثقافتنا ذات المرجعية الدينية يعتبر الجنس جريمة، أو على أقل تقدير فهو أمر خاطئ يحتاج المرء بعده إلى وقفة، تبرير، تحديد مواقف، إلخ فهو مفترق طرق تنكسر عليه كثير من أبعاد العلاقة ومستوياتها كالاحترام المتبادل أو الصورة التي عملنا على إرسالها لأنفسنا في نظر الطرف الآخر وقد تنهار الكثير من التوقعات ومن المؤسف أن يكون الجنس سببا لتحطيم العلاقة بدلا من تقويتها وتدعيمها وإرسائها”.

الكتاب باختصار رسالة لكل ست إنها تكون نفسها وتبني حياتها الأول وتتعلم تعيش لوحدها وتقف على رجلها ويبقى ليها شخصيتها المستقلة وساعتها بس هتكون أفضل مشروع مناسب للزواج بالنسبة للراجل الناضج السوي إللي بيدور على ست تكمله ويشاركها حياته وفي صفحات الكتاب الستات هتشوف طرق مختلفة وتكنيكات للوصول ده وساعتها هتكون كسبت نفسها وحياتها بغض النظر الجواز جه أو ما جاش!

كتاب خفيف مفيد في مكتبة كل بنت وست ومناسب للقارئات الجداد المهتمات بالقراءة في مجال العلاقات.