The Definitive Guide to Living in the Capital , Cairo , Egypt

مجموعة قصص قصيرة لكاتب واعد (بـ تتكون من 3 قصص قصيرة وما تخافوش مش كثيرة خالص علشان كل قصة عبارة عن ورقة أو اثنين تقريبًا) ومش بس كده لأ دي كمان قصص ممتعة وتسحرك، هـ تخلص قصة تدخل ع اللى وراها على طول حتى من أسمائها اللى منها “نملة، والشفق، وقطعة خبز، وشيزوفرنيا، وهمهمات، وفضفضة، وبطاقة عائلية، والمنادى، والغرزة، وتتبع، وبعدها بلحظة”.

“الشفق”.. فاكرين أبو رجل مسلوخة وحجرة الفئران؟ بالضبط هى دي الحكاية، طفل قاعد جنب جده على المصطبة والجدة بـ تحكى الأساطير عن السور اللى هناك والأشباح اللى بـ تطلع فى الظلام، بس الطفل بـ يشوف أصحابه “عدنان، وسالم، وخلود” بـ يرسموا على السور فـ يقرر أن الحل فى أنه يقول لجده أنه عاوز يلعب معاهم وجده عند رأيه هناك “المجون، والدم” بس يا جماعة فيه حاجة غريبة بـ تحصل أن أصحابه بـ يختفوا واحد واحد ويجرى الطفل على جده اللى بـ يضمه ويقرأ المعوذتين.
أما عن قصة “وبعدها بلحظة” فـ تقدر تقول أنه انتقل من الكتابة بالرمزية إلى الدخول فى منطقة “الغرابة”، القصة عادية جدًا عن واحد عايش فى قرية وبـ يسمع عن واحد مات فى القرية اللى جنبه أما التفاصيل هى اللى مش عادية لأن فيها بـ يظهر له شبح وبـ يسأله أسئلة وبـ يسمع صرخة الرجل اللى مات وبـ يعرف درويش بـ يحاول يعالجه من اللى هو فيه وده كله بـ يتم فى مشاهد متقاطعة من الصعب أنك تجمعها فى سياق واحد مع السرد الكامل للقصة.
المجموعة بـ تتميز بالدخول فى الموضوع مباشرة، وبـ تقترب من المهمشين والعامة والفقراء والتعبانين والمطحونين فى دائرة الرحلة الأبدية (على رأى منيب الله يرحمه).
المجموعة بـ تنقد الفساد وده فى وصف دقيق وجمل قصيرة وسريعة ومش هـ ننسى أن اللغة كانت محملة بتراكيب واعية لفكرة السرد وكمان فيه تنوع بين الحكى والحوار.