The Definitive Guide to Living in the Capital , Cairo , Egypt

ورق الجنة

ورق الجنة: لكل جواد كبوة

  • بهاء عبد المجيد
  • من الآن
  • عربي عربي
  • 15 جم
  • مكتبات وسط البلد، مكتبة ميريت
تم التقييم بواسطة
Rasha Zeidan
قيم
قيم الآن
ورق الجنة: لكل جواد كبوة
مجموعة قصصية بـ تحكى عن أخلاق وقيم ومبادئ كنا فاكرين أنها باتت فى طى النسيان يعنى ما بقتش موجودة كثير فى حياتنا لكن هى طلعت ونفضت من عليها التراب وده ظهر بوضوح فى ثورة 25 يناير اللى كان فيها المسيحى بـ يحمى المسلم وهو بـ يصلى، والكنيسة اللى ما كانتش بـ تسمح بدخول غير المسلمين للوضوء، والولد اللى رمى نفسه أمام عساكر الأمن المركزى علشان يحمى صديقته اللى وقعت ونزلوا عليه ضرب وسحلوه، ياااه.. فاكرين الأيام دى؟

من الآخر شبابنا فيه الخير وده اللى كاتبنا النهارده بـ يحاول يوصله من خلال المجموعة القصصية “ورق الجنة” واللى بـ تدور عن الأخلاق والمبادئ زى ما قولنا قبل كده وزى ما حضرتك هـ تحس وأنت بـ تقرأها، لكن يا ترى الأخلاق اللى تكلمت عنها المجموعة كانت عاملة إزاى؟ وهل قدر الكاتب على معالجتها بشكل جميل؟

“ورق الجنة” بـ تتكون من 12 قصة منها: “فتاة هيروشيما، ورق الجنة، ضوء القمر، يوم جديد، حصان عربى، أوراق نادين، حجر جهنم، دبلة زفاف، فتاة الميدان”، كل قصة فيهم بـ تتراوح بين 25 : 30 ورقة تقريبًا وبصراحة فيها حشو كثير شوية وده هـ تشوفه مثلاً وأنت بـ تقرأ “فتاة هيروشيما” واللى بـ تحكى عن … بصراحة القصة عاوزة تركيز وكوباية شاى هى حالة هـ نحاول نوضحها لكم.. هما 3 أصحاب: داليا، ووليد، وزياد.. بـ يشتغلوا مع بعض، زياد وداليا تزوجوا مع العلم أن كان فيه علاقة غير شرعية بين داليا ووليد بس هو كان صاحب مبادئ وأخلاق ورفض استمرار العلاقة بعد ما داليا تزوجت صاحبه.. وطبعًا الحكاية دى ما خلصتش … لأن فيه حكاية ثانية وهى حكاية الأستاذ مدحت المريض النفسى واللى لغاية ما بـ تخلص القصة ما بـ نعرفش إيه سبب مرضه، هو جار وليد بطل الحدوتة كان واضح قوى أن تصرفاته غريبة، زى مثلاً يقول لابنته اللى مش موجودة قولى باى لعمو وينزل يوصلها للباص اللى مش موجود … وهكذا لغاية ما يلاقوه مقتول فى شقته، ما تخافوش ما ماتش ولا حاجة هو بس فى المستشفى بـ يتعالج، الله.. أُمال إيه بقى حكاية هيروشيما؟ لازم توصل لآخر القصة وفى مذكرات الأساذ مدحت هـ نلاقيه كاتب عن قصة حب مع فتاة يابانية “ميكا” وهى دى فتاة هيروشيما واللى مش بـ تظهر غير فى آخر القصة وهـ نسيبكم بقى تقرأوها.
من ضمن القصص المتميزة اللى بـ تمس المشاعر قصة “ورق الجنة” واللى بـ تتكلم عن الخطيئة الأولى اللى وقعت ورق الجنة عندما أخطأ آدم وحواء، لكنه بـ يعمل إسقاط على الواقع بتاعنا على أى رجل وامرأة ممكن يبقوا آدم وحواء، أخيرًا المجموعة حالة حلوة هـ تندمج فيها وتشدك لها هى بس طويلة شوية، لكن لغتها جيدة وصورها فيها استرسال، والراوى العليم اللى موجود فى أغلب المجموعة لازم يأخذك فى عالم مختلف كل قصة وبلغة سرد مختلفة.

عجبك ؟ جرب

رواية "خمارة المعبد" لنفس الكاتب.

عن الكاتب

د. بهاء عبد المجيد مدرس الأدب الإنجليزى بجامعة عين شمس، له أعمال كثيرة منها: البيانو الأسود، وسانت تريزا، والنوم مع الغرباء.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح