The Definitive Guide to Living in the Capital , Cairo , Egypt

أحلام بريئة

أنغام: أحلام بريئة

  • أنغام
  • بوب
  • من الآن
  • روتانا
written by
Mustafa Abd Rabu
قيم
قيم الآن
أنغام: أحلام بريئة

أنغام طوال الوقت بـ تبين أن لسه عندها حاجات كثير تقدمها، لكن خطورة ألبوم "أحلام بريئة" أنه بعد غياب 5 سنين وأنه بعد تجربة ناجحة جدًا في ألبوم "محدش يحاسبني".

 

اختيار أغنية "أهي جت" علشان تبقى أول أغنية في الألبوم اختيار غريب فعلًا، كلمات كاترين معوض وألحان هشام بولس عادية جدًا، حتى طارق مدكور ما عملش أي إضافة للأغنية، صوت أنغام كان باهت ومرهق إلى حد كبير، وخاصة في جملة الإعادة عند "باين هـ يموت عليها والسكات قايل حاجات"، عند كلمة "السكات" المفروض أنغام توصل لنهاية الأوكتاف –توصل لأعلى نغمة– بس الانتقال هنا ما كانش ناجح.

 

أمير طعيمة عامل نسيج درامي وحدوتة حلوة في أغنية "اتجاه واحد" اللي مدتها 4 دقائق بس، الحبيبة بـ تكتشف حنين حبيبها لعلاقة قديمة فبـ تقرر تنهي العلاقة في لحظة، أمير بـ يجسد الصراع والقلق واللحظات اللي قبل الفراق بحرفية.

لحن رامي جمال هادي ومناسب لحالة العتاب النهائي قبل الفراق، وبـ يوصل للذروة عند "كان زمان عندي فرصة الاختيار" وهنا هـ نلاقي صوت أنغام بـ يلمع، إضافات أنغام للأغنية مذهلة سواء من ناحية الإحساس أو التكنيك.

الموزع أحمد إبراهيم أضاف للأغنية بخط الوتريات اللي في الخلفية، مع زخرفة الإيقاع ونغبشات البيركشن.

 

التعاون اللي استنيناه كثير بين محمد حماقي كملحن وأنغام في أغنية "بين البينين"، هنا بـ تظهر إمكانيات حماقي كملحن موهوب يقدر يعمل جملة لحنية حلوة تتحفظ بسرعة وفيها إحساس عالي وخاصة عند "وبتعدي السنين وأنا بين البينين".. الموزع والملحن الكبير خالد عز عامل جملة فاصل ممتازة وأضاف للأغنية كثير من إحساسه، وتعامله مع الكمانجات كان راقي جدًا رغم وجودها القليل.

 

فكرة أغنية "طول ما أنت بعيد" للشاعر عصام حسني جديدة وحلوة، وحالة الاستغلال العاطفي مكتوبة بشكل راقي، هـ نلاقيه بـ يقول مثلًا: "حتى ما باسألش إزيك.. على طول باسال مالَك".. لحن محمدي سلس وماشي من الأول للآخر من غير أي مطبات.

تسليم غُنا الكوبليه بالبيانو ممتازة عند "أنا لما بـ تحزن بابقى هاموت من خوفي عليك" وتحسب لمادي الموزع، وكمان تعامله مع المقسوم كان هادي، وإن كان الإيقاع المقسوم وجوده مش ضروري في أغنية زي دي.

خط الكمانجات في الخلفية ما كانش جديد، وغالبًا جملة الفاصل وصولو العود فكرة محمدي، وطبعًا مش محتاجين نقول أن إحساس أنغام كان عالي جدًا كالعادة.

 

كلمات أغنية "أكتبلك تعهد" لبهاء الدين محمد مباشرة وفيها حالة من الارتباك مش معروف سببها، حالة الارتباك وصلت للملحن إيهاب عبد الواحد، يمكن ما قدرش يتفاعل مع الكلمات بشكل كافي؟.. الموزع مادي استخدم الجيتار الكهربائي (الإلكتريك) في أغنية المفروض أنها Slow، ودي حاجة غريبة ومالهاش معنى.

 

في "حتة ناقصة" تقريبًا الغرض الأساسي من الأغنية ما كانش معروف، هـ نلاقي أنغام بـ تقول: "مشكلتي أنك حاجة أكبر من حبيبي.. لكن باحس أنك يا دوب حاببني" وبعد شوية بـ تقول: "لو حتى كنت باحس عندك حتة ناقصة من إمتى يعني في الدنيا دي حاجة كاملة" لحد الكوبليه اللي بعده، طيب كان إيه لازمته الكلام اللي في الأول؟

الأغنية دي داخلة في دائرة الأغاني المرتبكة وهي الثانية في الترتيب.. لحن عزيز الشافعي وإضافات أنغام انقذوا الأغنية من الضياع.

 

بطل أغنية "أحلام بريئة" هو الموزع أحمد رجب، الجاز على طول الأغنية معمول بشياكة وبساطة يمكن علشان الموزع عارف أن المستمع العربي مش متعود عليه أوي، اللعب على وتر الحنين للذكريات ولأيام الطفولة عمله أمير طعيمة بذكاء، لحن شريف بدر مافيهوش جديد وكان سريع شوية على نَفَس أنغام.

 

أغنية "فنجان النسيان" من أفضل أغاني الألبوم -رغم غرابة العنوان- وتحسب فعلاً للشاعر محمود صلاح، لحن محمد رحيم كله دفء، ولعب على المنطقة الأكثر جمالًا وتألقًا في صوت أنغام… والأغنية دي من أهم علامات التغيير في الألبوم ده.

 

أنغام لأول مرة بـ تغني باللهجة اللبنانية في "بكره الموسيقى"، الأغنية –كمحاولة أولى– في اللون ده ما كانتش ناجحة أوي ولكن مع التكرار أكيد هـ تقدم أغاني أحسن، ولحد دلوقت أداء أنغام في الأغاني الخليجي أفضل بكثير وكمان اختيارها للكلمات والألحان.

 

"صوت الطيور فوق الشجر مغنى".. أمير طعيمة بـ يقدم لون مختلف عليه شخصيًا في "بحب أغني" وبـ يخلينا نشوف أن "كل الحياة دندنة" وبـ تتحول الدنيا لأوركسترا كبيرة، ودي من أجمل الأفكار اللي اتعملت في أغنية في الكام سنة اللي فاتوا.

لحن محمد رحيم المرة دي معمول مخصوص لأنغام، الجمل اللحنية الجديدة والنقلة عند "عمره ما هـ يشوف الجمال" في مكانها بالضبط وأكدت على إحساس الأغنية ككل.

استخدام رحيم كموزع للناي في جملة الفاصل وفي الأغنية بشكل عام كان استخدام رائع ومختلف، محمد رحيم مع أنغام مختلف ومتجدد وبـ يقول كل اللي عنده.

 

شريف تاج صاحب أهم نجاحات في حياة أنغام الفنية (سيدي وصالك وعمري معاك) بـ يقدم أغنية "جنبك مكاني"، وكالعادة بـ يقدم شريف لحن ممتاز يليق بصوت أنغام ومكانتها.

بداية من الكوبليه أنغام بـ تغني من طبقة عالية إلى حد ما "اتعودت أعيش مع نفسي" الجملة اللحنية هنا جديدة، طارق مدكور استخدم كل أدواته وخبرته، وأضاف كثير على عكس الأغنية اللي فاتت.

 

أغنية "بقيت وحدي" واحدة من أهم المفاجآت اللي أنغام محضراها لجمهورها، الشاعر الكبير الراحل عصام عبد الله كان عنده قاموس مختلف إلى حد كبير عن أغلب شعراء الأغنية، هـ نلاقيه مثلاً بـ يقول هنا حاجة زي "صهيل البرد" أو "ما يمكن نجمك الأحلى في حاجات جاية" ورغم أن الأغنية بـ تتكلم عن آخر لحظات الفراق هـ نلاقي أنغام بـ تقول "هنقدر أو ما نقدرشي أنا مش خايفة ما تخافشي".. وكالعادة الملحن والموزع الكبير خالد عز بـ يقدم جمل لحنية مختلفة، وعند "أديك سامع" هـ نأخذ بالنا إزاي خالد عز أشبع النغمة وأظهر أجمل ما في المقام وأجمل ما في صوت أنغام.

عجبك ؟ جرب

أحمد جمال "يلا نعيش".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح