The Definitive Guide to Living in the Capital , Cairo , Egypt

فرقة "إفتكاسات" من بدايتها بـ يقدموا مزيكا جديدة ومختلفة، وفي ألبوم "جرّ شَكَل" قدروا يستفيدوا من جماليات كل أنواع المزيكا، وعملوها في ميكس مع المزيكا الشرقي، وفي وسط كل ده بـ يبقى وفائهم لموسيقى الجاز، علشان بـ تبقى هي نواة كل المقطوعات، مهارة العزف واضحة، والتكنيك العالي واضح، وبرضه الحرية في تناول كل المقطوعات، والأهم أنهم بـ يعملوا المزيكا بمزاج عالي وبحرية تامة.

 

من أول تراك في الألبوم Saba Rakeb إفتكاسات بـ يفاجئونا بميكس غريب، الميلودي الأساسية للبُزُق سريعة، ومعمولة بتكنيك عزف صعب إلى حد كبير، الجملة بـ تفضل تعلى وتتكرر لحد دخول الرقّ، بـ تهدأ خالص على وقع ضربات الرق، وبـ ترجع نفس الجملة للظهور بتحويرات وعُرَب كثير، على خلفية مليانة بالباص جيتار وآلات إيقاعية كثير.

مع دخول الجيتار الإلكتريك بالـ Metal وHard Rock –اللي موجود بكثافة في الألبوم- بـ يحصل تغيير في الموود وفي الجملة اللحنية وبعد شوية بـ نفهم أن العلاقة بين العود والجيتار هي علاقة تكامل.

 

جملة القانون في بداية أغنية الهيد Gar Shakal من الماينور أو النهاوند حلوة وجديدة، هي الميلودي الأساسي اللي بـ يتكرر كثير، صولو الكمان شجي، وسلم الجملة بسهولة للجيتار الإلكتريك برشاقة، وبعدين بـ ترجع جملة القانون ثاني وفي الخلفية الجيتار الإلكتريك لحد القفلة من أعلى نقطة.

 

في Deep South Blues الميكس بين الشرقي والغربي كان على مستوى عميق، مش مجرد أن الآلات الغربي تشترك في عزف لحن شرقي أو على مستوى الهارموني بس، لكن اللي حصل هنا أن إفتكاسات لعبوا المزيكا الصعيدي –الشعبية المصرية جدًا– بطريقة مزيكا البلوز.

التقارب هنا كان على مستوى الروح، نفس الشجن والحزن، واختاروا من اللحن التراثي الجزء اللي ينفع يتلعب على الآلات الغربي، لأن التراث الصعيدي من البياتي اللي فيها ربع تون، إنما هما لعبوها من الكرد اللي هو شبه البياتي بالضبط بس من غير ربع تون.

صولو الكمان أجمل ما في التراك، ومن أقوي صولوهات الألبوم، لفت المزيكا ورجعت للبياتي، وقالت جملة مصرية جدًا من عمق الصعيد المصري.

 

Prayer for Hope من أجمل المقطوعات في الألبوم، بداية جملة القانون من مقام الكرد، مزيكا تعدي للقلب على طول، جملة حلوة وغالبًا جاءت من مرة واحدة من غير مجهود كبير.

جملة البيانو الرقيقة امتداد لجملة القانون، الـ Soft Jazz بكل براحة وشفافية، العزف هادي وثابت من غير استعراض عضلات، الارتجال واضح، وكمان الإحساس واضح. وبـ نرجع ثاني لجملة القانون –البيانو الشرقي- مع بعض الإضافات، كأن الجملة مع التكرار بـ تتكثف وبـ توضح.

 

فى Old Mountain اختيار التشيللو علشان يعزف الميلودي الرئيسية اختيار موفق، وزي كل التراكات بـ يبقى فيه حالة من الهدوء النسبي بين الميلودي الرئيسية في الأول وبين الأجزاء اللي بعد كده، بـ تبدأ جملة بيانو تبان كأنها ارتجال، العزف بـ يمتد لفترة طويلة نسبيًا، مع الدرامز في الخلفية.

بـ يدخل إيقاع أيوب -إيقاع الزار- مع فوكال في الخلفية بعيد جدًا، مع جملة كمان ألكتريك ملعوبة حلو ومليانة شجن خفيف، وبعدين بـ نرجع ثاني لجملة البيانو اللي اتقالت في الأول مع الكمان، علشان التراك يقفل زي ما بدأ.

 

السلام المربع الإسكندراني فى تراك Salam Eskandrani بـ يتقال بالأكورديون في حضرة الدرامز، وإفتكاسات أضافوا عليها جمال وزادوها خفة وشياكة، وعمرو صلاح عمل كام عُربة حلوين في جملة الأكورديون، دخول الكيبورد على طريقة عزف الحظوظ والأفراح البلدي كان مفاجأة، لكنه كان مناسب للجو، وبعدين الأكورديون بـ يعيد جملة السلام المربع ثاني علشان يقفل.

 

Story with no end في بدايتها حوار بين البيانو والكمان، الاثنين كانوا بين بُعد وقُرب، ساعات يقولوا نفس الجملة، وساعات يبقى الحوار بينهم زي سؤال وجواب، دخول الرق مع الوصول للميلودي الرئيسية والناي كان رائع وفي توقيت ممتاز.

وكالعادة بـ يبدأ ارتجال البيانو على طريقة الجاز، بـ يقول نفس الجملة اللي فاتت بس مع تنويعات وبـ تسلم بذكاء علشان توصل للميلودي الأصلي بس المرة دي بالبيانو بس من غير كمان، مع إيقاع الدرامز.

ومن ضمن مهرجان الصولوهات هـ نلاقي صولو كمان حزين، وبـ يتغير الإيقاع للرق بدل الدرامز، مع نغبشات خفيفة للبيانو في الخلفية، وبعدين اللحن بـ يرجع لسرعته الأصلية، وبـ نرجع للجملة الأصلية بالكمان والبيانو.

 

Horonista بدايتها مع الدرامز والأكورديون الفرنساوي في جملة خفيفة وشيك، والبيانو في الخلفية، ظهور صريح وقوي للكلارينيت للمرة الأولى، بـ تقول نفس الجملة اللي بـ يلعبها الأكورديون، المقطوعة كلها مستوحاة من مزيكا البلقان وشرق أوربا، وحتى نفس الإيقاع السريع، وإضافة الطبلة البلدي في الخلفية ممتازة ومناسبة جدًا، نفس الجملة بـ تتكرر كذا مرة، تأكيدًا لجمالياتها وعلشان العازفين ياخدوا براح ويضيفوا للجملة ويبينوا قدرتهم على الارتجال وعلى أداء تكنيكات صعبة.

 

ملحوظة أخيرة:

-الجيتار الإلكتريك في أوقات كثير وجوده ما كانش مناسب أبدًا، بل بالعكس قلل كثير من جمال تراكات كان أفضل لو كانت من غيره.

-الارتجال والإعادات الكثير زي ما بـ تفيد الجملة اللحنية والعازف زي ما بـ تضر وأوقات كثير بـ تبقى مملة، وده هـ نلاحظه في أن 4 تراكات من 8 زمنها أطول من 6 دقايق.

-مش لازم في كل تراك أحط كل الآلات الموجودة وكل العازفين يشتركوا، الزحمة دي عملت هيصة زيادة عن اللزوم في أغلب المقطوعات، كان ممكن بعدد أقل أوصل اللي عاوز أقوله وخاصة أن الميلودي في كل التراكات تقريبًا حلو ومختلف.