The Definitive Guide to Living in the Capital , Cairo , Egypt

أجمل ليالى عمرى

رامى صبرى: أجمل ليالى عمرى

  • رامى صبرى
  • بوببوب أوروبي
  • من الآن
  • Mazzika
تم التقييم بواسطة
Mustafa Abd Rabu
قيم
قيم الآن
رامى صبرى: أجمل ليالى عمرى

رامي صبري فنان طموح بـ يحاول يقدم نفسه في أفضل شكل ممكن، وبعد نجاحات ممتازة لألبوماته السابقة بـ يقدم السنة دي ألبوم "أجمل ليالي عمري" كخطوة جديدة في مشواره الفني، فتعالوا نشوف رامي صبري حقق إيه في التجربة دي.

 

أظن أننا أول ما نسمع أغنية أجمل ليالي عمري هـ نفتكر –تلقائيًا– عمرو دياب، يمكن لأن الموزع طارق توكل اعتمد على مزيكا الـ Latin Pop بكل مفرداته من أكورديون وترومبيت وجيتار أسباني، وده اللي عمرو دياب بـ يعمله في أغلب أغانيه! أو لأن تكنيك الغُنا والعُرَب والإضافات فيها كثير من طريقة عمرو دياب!

من الذكاء البعُد تمامًا عن المنطقة دي، ولو عاوز تعمل نفس المزيكا –لأنها مش احتكار لحد معين– يبقى تعملها بطريقتك وتضيف عليها، مش تنقلها زي ما هي، والأهم الأغنية دي ضمن موضة أغاني الأفراح اللي انتشرت الفترة الأخيرة، علشان نجاحها شبه مضمون.

 

أغنية تعالي مثال ممتاز على مسلسل نحت الأغاني التركي واليوناني، الأغنية الأصلية لمغنية يونانية اسمها Despina Vandi وبعدين خدها مطرب تركي اسمه Mustafa Sandal وغناها دويتو مع مغنية يونانية اسمها Natalia.

رامي صبري نقل الأغنية بالحرف، الإضافة بس كانت جملة البُزُق (آلة شبه العود برقبة طويلة) في الأول، الأغنية دي مش أول مرة تتنحت، فضل شاكر عملها قبل كده في أغنية اسمها "ضحكت الدنيا"، وده لينك الأغنية اليونانية الأصلية لـ Despina Vandi.

 

أغنية نفسها تشوفني بـ ترجع الاتزان للألبوم بدرجة كبيرة، مع أن رامي صبري كملحن بـ يدخل فيها منطقة مش جديدة عليه، عامة هو عارف حدود صوته كويس، وعلشان كده اللحن ركز على المنطقة الأحلى وما حاولش يعلى كثير، هارموني الناي والعود في الخلفية عملها الموزع طارق توكل بشكل كويس، وكمان جملة الفاصل كانت خفيفة ومناسبة.

 

مدين بـ يقدم لحن حيوي خفيف في أغنية إيه اللي يمنع، جملة الفاصل أحلى ما في الأغنية وتحسب فعلاً للموزع طارق توكل اللي له نصيب الأسد في توزيع الألبوم، كلمات أحمد الجندي عادية جدًا وقيلت قبل كده كثير، وعامة مستوى الكلمات في الألبوم قليل جدًا، ومافيهوش أي محاولات للتجديد.

في أغنية ما صدقت اتقابلنا الموزع أحمد إبراهيم بـ يسلم الغُنا لرامي صبري بسلاسة، جملة البداية بالجيتارات والكمانجات حلوة، لحن شادي حسن مليان دفء، ورامي صبري استفاد من الجزء ده وقال الأغنية ببساطة وإحساس عالي.

 

أغنية وصلت لإيه من الأغاني القليلة اللي بـ تبدأ بالغُنا على طول من غير مقدمة، وبداية الغُنا بـ تفكرنا ببداية أغنية "كان طيب" لعمرو دياب، الشاعر تامر حسين بـ يجسد حالة الشماتة في أسئلة زي "وصلت لإيه في حياتك من يوم ما سيبنا بعض.. لسه واقف مكانك ما خدتش خطوة جد".

هـ نلاحظ الضعف في الجملة اللحنية عند شادي حسن عند "هاتلي أي حاجة مهمة بعدي عملتها" و"زعلان عليك لكن ده ما كانش باديا.. ونصيحة لك حاول تنسى لياليا"، الضعف هنا في إضافة حرف ألف لكلمة لكن والمطّ فيها، وده علشان الجملة اللحنية تبقى ماشية بالمسطرة لكلمة حاول اللي قصادها الناحية الثانية.

دخول إيقاع المقسوم بقوة في الأغنية مش موفق أبدًا، وخاصة أن الأغنية بـ تعبر عن اللوم والعتاب -أو خلينا نقول بصراحة أكثر بـ تعبر عن الشماتة- بس الغريب أن رامي صبري ما قالش هو نفسه وصل لإيه في حياته، أو إيه هو الإنجاز اللي عمله علشان تكمل حالة الشماتة بكل أركانها.

 

طارق مدكور بـ يتدخل في أغنية يوم ما اتقابلنا بكل قوته، وغالبًا نجح في تغيير شكل الأغنية تمامًا، لكن لو سمعنا الأغنية من غير توزيع نظن هـ تفرق كثير أو تحديدًا هـ تقل كثير. الميكس الجميل بين مزيكا السامبا والجيتار الإلكتريك خلى طعم الأغنية أحلى، لحن إيهاب طلبة إلى حد ما أفضل من ألحان كثير في الألبوم.

ثاني لحن لرامي صبري في أغنية وعد مني، الأغنية من ضمن الأغاني اللي نجاحها يعتبر مضمون، أغنيةSlow  بإيقاع بطئ ثابت، بـ تعبر عن حالة الفراق بين حبيبين، الشاعر أحمد علي موسى حاول أنه يقرب من مساحة الحكمة لما قال: "كل حاجة لها وقت وتنتهي"، تطويل المدّ في كلمة "تنتهي" كان زيادة عن اللزوم وده واضح في صوت رامي.

الجمل اللحنية لرامي صبري كان ممكن تبقى أحلى من كده، ودايمًا بـ نحس أن رامي صبري كملحن يقدر يقدم ألحان أجمل من كده بكثير لكنه متقيد مش عارفين ليه. إحساسه كمطرب في الأغنية عالي جدًا وعمل إضافة حلوة عند "مافيش أي حاجة بيننا هـ ترجعني" وده إثبات أن رامي يقدر يقدم أكثر كمطرب وكملحن.

طارق توكل بـ يرفع اللحن نُص تون (بـ ينقل من الصباع الأبيض للصباع الأسود على البيانو) بعد "ولما أبعد أنا عنك أكيد هـ أرتاح"، نقلة مفاجئة وغيرت مود الأغنية، وخاصة بعد دخول جملة الكمانجات الجميلة اللي ما كانتش واضحة من الأول.

 

فكرة كلمات أغنية سهل الكلام للشاعر وائل توفيق زي أغنية "الكلام كله عادي" لرامي صبري في ألبوم "كلمة"، يمكن النجاح الكبير للأغنية أغرى رامي صبري أنه يعيد نفس الفكرة، وإن كان الشكل مش مختلف والتنفيذ من ناحية الكلام واللحن والتوزيع أقل كثير.

 

بداية أغنية معاك ملفتة ومختلفة، الغُنا والتوزيع كانوا محتارين بين الكرد والبياتي، تغيير الإيقاع في بداية الغُنا عند "فيه حاجة فيك غير كل الناس"، واختيار إيقاع الملفوف عمل ارتباك، وده تغيير غير مفهوم، جملة الفاصل جميلة وبسيطة وخاصة عزف الناي.

 

طارق توكل بدأ بداية ممتازة ومبشرة جدًا في أغنية في كل مكان مع تآلفات الكمانجات والناي والجيتار، لحن شادي حسن عكس حالة الحنين اللي كتبها تامر حسين بإحساس عالي، غُنا رامي صبري مستقر وهادي، وعامة صوته أفضل في المنطقة الوسط الدافية، صولو الكمانجة في جملة الفاصل معمولة بحرفية وجمال، ودخول الناي والجيتار مؤثر جدًا ومهم علشان أكد على حالة الحنين والحزن في الأغنية، وخاصة عند "خلينا بس أشوفك لو كل فين وفين".

 

وكملحوظة أخيرة:

مش من الذكاء أن أي مطرب يقف في نفس منطقة مطرب ثاني، وخاصة لو كان ميجا سوبر ستار، حتى لو من غير قصد أو من باب التأثر بحب، لازم أي مطرب يكون له شخصية مختلفة وجديدة، ما حدش بـ يبقى خليفة حد.

عجبك ؟ جرب

ألبوم نوال الزغبي "مش مسامحة".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح