The Definitive Guide to Living in the Capital , Cairo , Egypt

عمره ما يغيب

محمد حماقي: عمره ما يغيب

  • محمد حماقى
  • بوب
  • من الآن
  • قنوات وNogom Records
تم التقييم بواسطة
Mustafa Abd Rabu
قيم
قيم الآن
محمد حماقي: عمره ما يغيب

"عمره ما يغيب".. ألبوم جديد في مسيرة حماقي الطموح، اللي دائمًا عاوز يقدم حاجة جديدة، 15 أغنية قدم فيهم أكثر من شكل موسيقي وتعاون مع فنانين كبار.

أول ما تسمع أغنية "أجمل يوم" هـ تعرف على طول مين اللي كاتب الكلام، هـ تسمع حماقي بـ يقول: "خلينا واضحين.. فرّق دائمًا بين حاجتين، بين وأنا عادي وهادي وبين وأنا ملهوف".. أيمن بهجت قمر كالعادة بـ يحرك الكلام برشاقة، ومرة واحدة يعطينا جملة مفاجأة ما حدش كان يتوقعها أبدًا زي "في حاجات تتقال.. وحاجات أحلى وهي خيال"،  لحن عمرو مصطفى مبهج وحيوي جدًا، وغربي جدًا كالعادة، بس ده ما يمنعش أنه جديد وحلو، وتقديرنا الشخصي أن اللحن اتعمل قبل الكلام.

"اعمل معروف، بطل تقلق بطل خوف، بـ تقول لي عيونك مكسوف، طب من مين".. الجزء ده مع كل إعادة بـ يظهر براق أكثر، وبـ يخلينا نأخذ بالنا من اختلاف الجملة اللحنية وجمالها، اللحن بـ يوصل للذروة لما حماقي بـ يقول: "يا نهار يا نهار".

توزيع تميم حكاية لوحده، تعامله مع الترومبيت في جمل الفواصل القصيرة جدًا بـ يظهر حرفية كبيرة، وأجمل حاجة في توزيع الأغنية استخدامه للكورال، خلاه جزء من نسيج اللحن مش ترديد وراء المغني، وأكد على جو الأغنية المبهج.

 

في أغنية "ما بلاش" بـ نحس أن حماقي مسيطر على صوته وإحساسه تمامًا، وبـ يغني وهو مرتاح، تامر علي ملحن موهوب، ونظن أن لحن الأغنية دي بالذات اتعمل على مرة واحدة، تامر ما فكرش كثير، وساب نفسه من أول الأغنية لآخرها، وده واضح في النقلات السلسة من الواطي للعالي، البداية بالكانتري ميوزيك، الجيتارات وطريقة عزف الكمنجة الجديدة على السمع الشرقي بـ توضح أن تميم هاضم المزيكا الغربي كويس وبـ يعرف يستغلها، وعمل نغبشات خافتة جدًا بالطبلة البلدي، كانت زخرفة شرقي ومختلفة في وسط جو  الأغنية الغربي، واستعمال الكمانجات كان مؤثر جدًا في الفواصل، زي ورق سوليفان شيك حول الأغنية.

 

في أغنية "مايني" أول ظهور واضح وقوي للمقسوم والأغنية البسيطة وجو التسعينيات، مع الثنائي عمرو مصطفى وأيمن بهجت قمر، ودائمًا كل ألبومات حماقي بـ يبقى فيها مكان لأغنية زي دي، وهنا بـ تظهر واحدة من أهم حيل أيمن بهجت قمر أنه يجيب كلمة جديدة أو غريبة على السمع شوية ويبني عليها الأغنية كلها، الموضوع مش سهل أبدًا ومحتاج شاعر موهوب زي أيمن، لحن عمرو مصطفى عادي جدًا، وهـ نحس بصوت حماقي مجهد علشان يوصل للنغمة في جملة الإعادة وهو بـ يقول: "أنا صابر عليكي وباقي.. أنساكي دي مش أخلاقي"، عند كلمة "أخلاقي" تحديدًا، النغمة كانت عالية عليه شوية، التوزيع زي ما قلنا في البداية عادي وبسيط. اعتمد توما على المقسوم الصارخ العالي على طول الخط، واعتمد في الفواصل على جملة أكورديون عادية جدًا.

 

أغنية "كانت هناك" كانت ماشية كويس، وخاصة مع الجيتارات والفلامنكو، غُنا حماقي كان ممتاز ومتناغم مع حالة الأغنية ككل، لحد لما وصل لـ "وابتديت اسمع جوايا حاجة"، حصل زي خلل أو مطب، وخرجت الأغنية عن الحالة اللي بدأت بها، يمكن ده لأن الأغنية اشترك في تلحينها حسام حبيب وإيهاب عبد الواحد؟ الحقيقة مش عارفين!

الشاعر الكبير أمير طعيمة قدر يجسد حالة الحب من أول نظرة بشكل ممتاز، وعمل مشهد فيه دراما وحركة، ظهرت في تردد حماقي وخوفه وشوقه المفاجئ، وفي الحوار بينه وبين صاحبه وبين البنت، والأجمل أنه ساب نهاية القصة مفتوحة "والليالي الحلوة اللي في خيالي.. الليلة دي أنا بيني وبينها خطوتين" وما قالش هل وصل للي هو عاوزه ولا لأ، مقام الكرد كان واضح هنا أكثر من أي أغنية ثانية، وموسيقى الفلامنكو والجيتارات كانت ملائمة للكلام والحالة أكثر من اللحن نفسه.

 

لما نسمع أغنية "نسيت" هـ نفتكر مايكل جاكسون في السبعينيات، وده بسبب  حاجتين: لحن عمرو مصطفى، وبالذات في الإعادة وحماقي بـ يقول "فيه سلام بـ يمر بسلام"، واستخدام توما للباص جيتار، وفي الميكساج لما خلى صوت حماقي مدبلر في جملة الإعادة.

 

حماقي دائمًا بـ يؤكد على التنوع في كل ألبوماته، في أغنية "صابر على حالي" بـ يخرج من اللون اللي مسيطر على أغلب الألبوم، وبـ يروح لسكة مختلفة شوية، هنا الأغنية فيها نفس شرقي إلى حد كبير، إيهاب عبد الواحد ملحن ممتاز، ومذاكر المزيكا الشرقي كويس، وعمل لحن رقيق، وهـ نحس أن حماقي كمان بـ يغني وهو مرتاح.

تميم استخدم المقسوم بخفة، واضح بس مش عالي، وطبعًا ما ينفعش المقسوم يبقى يروح ناحية الرقص هنا خالص، لأن الأغنية هادئة ورقيقة أو نقدر نقول حزايني شوية،  والكمانجات والجيتارات لعبت حلو، وسمعنا صوت الأكورديون الفرنساوي وراء الكمانجات في الفواصل بشكل خفيف جدًا، وإحنا شايفين أن الأكورديون الفرنساوي لو كان حضوره أقوى في الفواصل مع الكمانجات كان هـ يعطي للأغنية طعم أحلى كثير.

جمال كلمات أمير طعيمة أنها مش دائمًا بـ تبقى مباشرة، يعني مش بـ يعبر عن الحالة بفجاجة، سواء كانت حزن أو فرح، هنا هو بـ يعبر عن الانتظار والأمل في رجوع الحبيبة برقة وخفة زي ما تعودنا منه.

 

أغنية "نسمة شوق" بـ نعتبرها من أهم أغاني الألبوم، وشايفين أنها أغنية متكاملة، كلمات أمير طعيمة عذبة ورقيقة: "يا نسمة شوق في ليل محبة.. يا غنوة بـ تحلى حبة حبة" من أجمل الجمل اللي سمعناها في أغنية، وتعتبر مربط الفرس في الأغنية كلها، وإن كان لحن الأغنية قرّب كثير من جو محمد رحيم في بعض أغانيه.

 

عودة مرة ثانية للمقسوم بقوة في أغنية "ياللي زعلان" لحن بسيط وكلمات عادية لمحمد رحيم، أغنية مناسبة لجو المصايف والرحلات، الأجمل في الأغنية المقدمة والفواصل اللي عملها عازف الجيتار والملحن الكبير عمرو طنطاوي اللي للأسف بطّل تلحين واكتفى أنه يكون عازف جيتار في فرقة عمرو دياب.

 

بداية الجيتارات في أغنية "أنا سرها" (عنوان الأغنية جميل بالمناسبة) تقول أننا داخلين على أغنية زي "وافتكرت" بس بـ نتفاجئ بموود ثاني مختلف خالص، بـ نلاحظ من بداية الأغنية أن توزيع تميم عامل مهم ورئيسي، هـ نسمع في الخلفية -بعيد خالص- الوتريات بـ تظهر بنعومة وبـ تلعب جملة شيك، وعاملة هارموني ممتاز مع الناي اللي بـ يقول نفس الجملة اللحنية اللي بـ يقولها حماقي، وهـ نلاحظ كمان غياب الإيقاع من البداية للنهاية.

محمد يحيي عاوز يبين أنه ملحن شاطر، فعمل "غرزة" في أغنية مدتها دقيقتين ونصف – أقصر أغنية في الألبوم-: "أنا أول حب في حياتها.. أنا المشاعر.. أنا الحقيقة اللي مش بـ تقولها لحد" ونقل نقلة ممتازة من نهاوند لبياتي بوعي وحرفنة، وحماقي كمان قالها حلو.

الشاعر حسين محرم هو صاحب المفاجأة في الأغنية، بدأ وقال "أنا سرها" ممكن نفهم مثلاً أنه كاتم أسرارها، أو هو السر اللي حبيبته بـ تخبيه عن الناس علشان ما حدش يعرف بقصة حبهم، ودي التيمة اللي اتلعبت قبل كده كثير في "حبيبتي من تكون" لعبد الحليم حافظ، لكن بـ يفاجئنا لما حماقي بـ يقول وراها على طول "أنا أبقى نقطة ضعفها.. أنا الحاجة اللي مخبياها عن الناس كلها"، وإن كان حسين محرم ما قالش هي مخبية قصة حبهم ليه أو خايفة تحكيها ليه.

 

عمرو مصطفى قدر يعمل لحن جميل وحيوي في "الغالي ناسيني"، وإن كان عمل ألحان شكله كثير قبل كده يعني الأغنية دي ماركة مسجلة باسمه، وكمان اللحن مناسب لقدرات حماقي الصوتية.

الموزع شريف مكاوي (هو اللى غنّى "إزاي حبيتني" من حوالي 11 سنة)  المرة دي عامل توزيع حلو، وعامل هارموني بين الساكس والباص جيتار، بس يا ريت لو نسمع أغنية Tous Les Même بعد أغنية حماقي على طول.

 

"وأنا اللي حلمت وفاجئني في نص الحلم.. نهاية غريبة وما تنفعش حتى لفيلم".. من بداية أغنية "كان وكان" هـ نعرف كلمات أيمن بهجت قمر قد إيه مختلفة، وازاي قدر يعبر عن حالة الفراق باحترافية عالية، عمرو مصطفى قدم لحن من أفضل ألحان الألبوم، لحن بسيط إنما إحساسه واضح، وده اللي قدر يعمله حماقي بسهولة.

 

"عمره ما يغيب" هي أغنية الموزع الكبير طارق مدكور بلا منازع، من الأغاني اللي نقدر نعتبرها ماركة مسجلة لفنان بعينه، شخصية طارق مدكور طاغية على كل حاجة في الأغنية، وكمان هـ نلاحظ أنها راحت في مناطق كثير ناحية أغاني عمرو دياب في المرحلة اللي كان بـ يتعامل فيها كثير مع طارق مدكور، هـ نلاحظ الباص جيتار القوي في الخلفية والجيتارات الأسباني، والإيقاع الواضح اللي بـ يعطي مدى واسع ورحابة للأغنية، وكل دي سمات طارق مدكور المميزة، واللي نقدر نقول أنه غير شكل التوزيع في مصر، زي ما عمل حميد الشاعري في التسعينيات.

 

"بعدنا ليه" من الأغاني المميزة في الألبوم، حماقي بـ يغني بإحساس عالي جدًا، وأكيد أي حد هـ يسمع الأغنية هـ تلمَس معاه من أول مرة، وحماقي بـ يوصل لذروة إحساسه بالأغنية لما بـ يقول "علشان فاهمك وعارفك"، لحن محمدي بـ يبان ويلمع من أول "وأنا زيك برضه وأكثر"، لحن قوي ومتماسك وبـ يعبر عن الحالة ببراعة وثقة، الجملة اللحنية جديدة وحلوة، ونظن أن محمدي بذل مجهود كبير وفكر كثير علشان اللحن يطلع بالحلاوة دي.

عصام حسني له بصمته وصوته الخاص لما نسمع حاجة زي "ما لقيتش إجابة جيت لك.. ما أنا يمكن لو حكيت لك.. تقوليلي كسبنا إيه" وكمان "لكن كل اللي فاتك ممكن أحكي لك عليه.. أصعب أيام في عمري.. ما أقدرش أوصفها عمري".. والحاجة الموجعة في الأغنية فعلاً أن عصام حسني بـ يفترض طوال الوقت أن الطرف الثاني حاسس بنفس الوجع وعايش نفس الحالة اللي هو عايشها.

توما كموزع بـ يروح لسكة مختلفة عن اللي تعودنا عليه فيها، ولأول مرة بـ نسمع العود في الفواصل بـ يقول جملة راقية وشيك، وبـ يقولها معاه الناي، الجملة دي معمولة حلو ومناسبة تمامًا لحالة الأغنية.

 

في أغنية "أنت حبيبي" بـ يبان من البداية خالص أن التوزيع هو سيد الموقف! زي أغلب الأغاني في الألبوم، وهنا تميم استخدم التكنو بحرفنة، وبـ يوضح أنه يقدر يتحرك ضمن أشكال موسيقية كثير بحرية وثقة.

لحن الأغنية الخفيف بتاع حسام حبيب وإيهاب سمير وتوزيعها اتعملوا قبل الكلام، وجاء أمير طعيمة كتب الكلمات على اللحن، حماقي عمل إضافة بسيطة بس جميلة على اللحن وهو بـ يقول كلمة "حياة" استغل المد وعمل عُربة حلوة أصر عليها وقالها في كل الإعادات، ودي حاجة تحسب له طبعًا وهو عادة ما بـ يخرجش عن إطار اللحن كثير وما بـ يحاولش يعمل عُرب كثير.

 

اختيار أغنية "اللي اختاره قلبي" أنها تكون آخر أغنية في الألبوم اختيار موفق جدًا، وخاصة أن أول وأخر أغنية بـ يبقوا "عضم الألبوم"، برضه زي الأغنية اللي قبلها الكلام اتكتب على اللحن، "مش كل يوم بـ نلاقي حد يليق علينا ونليق عليه" كالعادة أيمن بهجت قمر بـ يفاجئنا بجملة حلوة، وبالنسبة للحن فياريت نسمع أغنية As long as you love me لـ Backstreet Boys.

 

الألبوم في مجمله جيد جدًا ومتنوع، وإن كنا شايفين أن 15 أغنية كثير على الألبوم، بس على كل حال هي تجربة مختلفة ومهمة في مسيرة حماقي وكل اللي اشتغلوا في الألبوم، ونتمنى دائمًا أن حماقي يكمل بنفس الشغف والرغبة في التجديد وتقديم موسيقى جيدة ومختلفة.

عجبك ؟ جرب

ألبوم عمرو دياب "شفت الأيام".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح