The Definitive Guide to Living in the Capital , Cairo , Egypt

تقع وتقوم

مسار إجبارى: تقع وتقوم

  • مسار إجباري
  • منوعات
  • من الآن
  • مسار إجباري
تم التقييم بواسطة
Karim Khalid
قيم
قيم الآن
مسار إجبارى: تقع وتقوم

"تقع وتقوم".. ثانى ألبوم لمسار إجبارى بعد ألبوم "إقرا الخبر"، مسار إجبارى فرقة روك سكندرية ذات طابع خاص، الألبوم ده بـ يؤكد لنا فكرة أن أحسن موسيقى روك بـ تتلعب فى مصر لازم يكون مصدرها الإسكندرية، إيه العلاقة بين الإسكندرية والروك لغاية دلوقت ما عرفناش، بس نوعدكم أننا نحاول نعرف السر.

"مسار إجبارى" من أهم الفرق المصرية، وبالنسبة لنا هى أحسن فرقة روك عربى فى مصر، دائمًا بـ يعطونا أمل فى فكرة أن مجموعة من الصحاب يتجمعوا على لعب المزيكا ومع الوقت يتطوروا ويقدروا يطلعوا حاجة زى "تقع وتقوم".

 

الألبوم معمول بعناية تامة وتحس بالاهتمام فى كل تفاصيله، من أول اختيار المشاركين بالعزف لغاية تصميم الغلاف اللى اتعمل بالاشتراك بين المصور الفوتوغرافى كريم صالح ومصمم التيبوجرافى إبراهيم حمدى ومصمم الجرافيك أحمد عماد الدين، والأخير هو نفس الشخص اللى صمم غلاف الألبوم الأخير لفرقة "بينك فلويد" الشهيرة.

الألبوم من إنتاج الفرقة ومكون من ١١ أغنية، ميكساج وتسجيل مهندس الصوت حسين سامى، واتعمل الماستر فى أمريكا، أغنيات الألبوم كله من تلحين هاني الدقاق وتوزيع الفرقة، وده يودينا لأول أغنية "مقدمة" الألبوم، وهى عبارة عن لحن مكون من رتم وصولو جيتار، بس الجديد أنه ملعوب بجيتار  fretlessوكمان بـE-bow  (الـ E-bow ده جهاز بـ يتمسك فى الأيد مكان الـpick  وأنت بـ تلعب جيتار وبدل ما تلمس الأوتار الجهاز بـ يطلع مجال مغناطيسى بـ تحس به pickups الجيتار وبـ يطلع النغمة المستمرة زى اللى بـ تطلع من الكمان والكولة والناى)، والصولو ده يعتبر أول واحد من نوعه فى مصر وفكرنا بعزف موسيقار الچاز العالمى تركى الجنسية أركان أجور، وده لينك للى حابب يسمعه وهو بـ يستخدم نفس التكنيك.

بـ تبدأ "أوقات" بـDrum beat  مميز وبعدها ميلودى بسيطة من الكيبورد ويغنى هانى ويشرح مواضيع كثيرة منها الحكم من المنظر الخارجى اللي بـ يبقى بنسبة كبيرة مش صح، وأن الحياة والظروف بـ يحطونا فى مواقف بـ تخلينا نكتشف حاجات ما كناش نعرفها، صولو الجيتار بسيط وحلو أوى وفى مكانه، الأغنية هادئة وتعتبر Indie rock، الأغنية من كلمات آمار مصطفى.

بـriff  روك قوى بـ يفكرك بأغانى فرق الروك الأمريكية فى فترة الثمانينات بـ تبدأ أغنية "بتقولى"، وعلى الرغم من أن المزيكا روك صافى لكن هانى بـ يغنى بستايل شرقى، وده مخلى الأغنية أحلى أكثر ومقربها مننا، الأغنية من كلمات "توسى" درامر الفريق وبـ يوصف فيها حالنا وقصتنا كلنا مع الدنيا لكن بـ يقول لنا أننا لازم نتحداها ونغلب ظروفنا، حتى التحدى واضح فى المزيكا خصوصًا أنها مليانة قوة.

بالنسبة لنا "لسه الدنيا" أقوى أغنية فى الألبوم وأكثرهم تكامل، وفيها كل عناصر أغنية الروك الناجحة، وبـ يبان فيها قد إيه هانى اشتغل على صوته وطور من نفسه، كلمات محمد السيد قوية أوى خصوصًا أنه بـ يستخدم الكلمة وعكسها فى نفس الجملة، فى الدقيقة ١:٤٧ بـ يبدأ صولو جيتار مكون من نفس الجملة اللى فى المقدمة بكل تفاصيلها اللى قولناها، الأغنية بـ تخلص بصولو ثانى مميز بـ يبان فيه تكنيك هانى الدقاق، بس كان نفسنا أنه يكون مختلف أكثر عن أول صولو.

بميلودى ورتم شرقى بـ تبدأ "صباحِك"، بـ يتغزل فيها هانى بمحبوبته وساعدته كلمات محمد إبراهيم الجميلة أنه يعبر بها عن إحساسه، أغنية بسيطة وعلى الرغم من أن رتمها ثابت لكن مافيش فيها رتابة تمامًا وده بسبب التوزيع الجميل.

ونوصل لأغنية الألبوم "تقع وتقوم"، بـ تبدأ بـrhythm  أكوستك جيتار ويغنى عليه هانى، وأول ما ييجي لك إحساس أن الأغنية هـ تبقى Country Style تلاقيها تحولت لـSwing  من غير ما تحس، دعاء عبد الوهاب واصفة حالنا كلنا اللى بـ يكون شوية فوق وشوية تحت، لكن بـ تقول أن لسه فيه فرصة للحلم والسعى لتحقيقه بتحدى الظروف، لكن نجمة الأغنية هى نانسى منير بلمساتها الرائعة على آلات الكمان والڤيولا والريكوردر.

محمد السواح بـ يبدأ "قلبك ده عنوانى" بصولو ترومبيت جميل وبـ يكمله أيمن مبروك بالرق فى خلفية الأغنية برتم شرقى، ويغنى الدقاق بصوته المميز بكلمات دعاء عبد الوهاب، الأغنية رومانسية ورقيقة، واللى حلاها صولو سواح الأخير على الترومبيت اللى فكرنا بستايل العازف إبراهيم معلوف.

وعلى طريقة الـPost Rock  لعبت مسار إجبارى "زيك أنا"، وهو نوع من الروك اللى غالبًا هادى وبـ يستخدم نوع من الـ Effects والمزيكا الإلكترونية فى الأغنية، دعاء عبد الوهاب تألقت فيها بكلماتها وخصوصًا فى تشبيهاتها ووصفها إزاي ممكن اثنين مختلفين عن بعض يكونوا متشابهين فى نفس الوقت، الأغنية بستايل مميز واختارها الفريق لتصوير الكليب.

أغنية "عطشان" بدأت بصولو ناى هائل لهانى البدرى فكرنا بصولوهاته مع فرقة "افتكاسات" وخصوصًا أغنية "مولد سيدى اللاتينى"، الأغنية شرقى صرف لكن فى الدقيقة ٢:٤٥ بـ يبان فيها الروك، وبكلمات رضا زايد بـ يشتكى هانى لمحبوبته مصر منها، الأغنية هـ تحسها ناس كثير خصوصًا أن الناي فيها مزود حالة الشجن.

"يا عم" فكرتنا بالأغانى القديمة لمسار إجبارى، الحرفية الشديدة فى دمج المزيكا الشرقية المصرية ومزيكا الروك دى ميزة من أهم مميزات مسار إجبارى، "يا عم" من كلمات حمدى زيدان، اللى بـ ينصح فيها كل اللى هـ يسمعوا الأغنية أنهم ما يهتموش بالمشاكل ويكملوا حياتهم وما يعكروش مزاجهم، الأغنية تعتبر من كلاسيكيات مسار إجبارى.

ممكن تكون سمعت أغنية "أنك تطير" قبل كده، لأنها كانت أغنية برنامج "المشروع"، إنما المرة دى التوزيع مختلف وتحس أن هانى بـ يغنى براحته أكثر، الأغنية دعوة عامة للأمل والتفاؤل وأنك تسعى وراء حلمك علشان تحققه، الأغنية من كلمات آمار مصطفى، صولو الجيتار اللى فى آخر الأغنية حلو فى مكانه ومكمل الأغنية.

"كانت هتفرق" هى الأغنية الأخيرة وهى من كلمات مصطفى إبراهيم عوض، سمعنا جزء منها قبل كده غناه الفنان أحمد مكى فى ألبوم "أصله عربى"، المرة دى ملعوبة psychedelic rock، الصولو اللى فى آخر الأغنية أكثر من رائع، والأغنية نهاية محترمة وقوية للألبوم.

الألبوم عبارة عن عمل فنى رائع وناضج بـ يعبر عن واقعنا ومتفق مع الحالة النفسية لكثير مننا، وهو تطور يضاف لمسار إجبارى نتيجة لمجهودهم الكبير، وفعلاً يستحق الاقتناء.

ملحوظة: مع احترامنا التام لصولوهات هانى المميزة اللى بـ نحبها، بس نفسنا صيام يأخذ فرصة أكبر فى الصولوهات، يعنى مافيش مشكلة أن الأغنية يبقى فيها اثنين صولو، أو صولو واحد بـ تردوا فيه على بعض، فى النهاية أنتم بـ تلعبوا روك.

عجبك ؟ جرب

ألبوم "كايروكي" السكة شمال.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح