The Definitive Guide to Living in the Capital , Cairo , Egypt

مزيكا

“مصر كلها عارفة مين هو حسن شاكوش”.. 5 تصريحات لمطرب “بنت الجيران” نفهم منهم شخصيته

أغاني شعبية بت الجيران حسن شاكوش حمو بيكا عمر كمال مهرجانات
“مصر كلها عارفة مين هو حسن شاكوش”.. 5 تصريحات لمطرب “بنت الجيران” نفهم منهم شخصيته
    بواسطة
    Omar Abd-elmaqsoud

    سواء اتفقنا أو اختلفنا مع أغنية “بنت الجيران” أو “حسن شاكوش” و”عمر كمال” اللي قدموهالنا وبقينا بنسمعها بكثافة سواء في الشارع أو في الأماكن العامة أو حتى الخاصة، إلا إننا مش هنختلف على الصعود السريع والمفاجئ وغير المتوقع للأغنية، ووصولها للترند العالمي سواء على “اليوتيوب” أو على المواقع المتخصصة، واللي بالمناسبة قال عنه “شاكوش” إنه نجاح غير متوقع بالمرة.

    وفي وقت قصير جدًا، بقى “حسن شاكوش” ضيف على مجموعة كبيرة من القنوات التلفزيونية سواء المحلية أو الإقليمية، وبقت أغنيته “بنت الجيران” هي محور الكلام في معظم الحلقات اللي قدمها، وكانت معظم الأسئلة عن توقعات “شاكوش” للنجاح ده، وهيستغله إزاي، وإيه العقبات اللي واجهها، خصوصًا إن الأغنية فيها بعض الألفاظ اللي ممكن يعتبرها البعض “خادشة للحياء” أو “غير لائقة”، بالرغم من اعتذاره عن الكلمات وإصداره نسخه معدلة، محذوف منها الكلمات المثيرة للجدل.

    هنحاول النهارده نتعرف أكتر على شخصية “حسن شاكوش” من خلال تصريحاته اللي قالها في أكتر من مناسبة، وأكتر من حوار له، ونفهم منها مين هو “حسن شاكوش” صاحب الأغنية رقم (2) في العالم دلوقتي:

    “اللي بيعمل ربنا.. مافيش حد بيعمل حد.. ومصر كلها عارفة مين هو حسن شاكوش” ده كان تصريح خاص بـ “اليوم السابع” قاله “شاكوش” بمناسبة سؤاله عن “حمو بيكا” صديقه وزميله، واللي خرج قبل كده في تصريحات قال فيها إنه هو اللي عمل “حسن شاكوش”.

    “عندنا إخوات بنات، وحريصين على اختيار الكلمات اللي بتدخل بيوتنا، ومش هنسمح بألفاظ خارجة في أي أغنية”.. ده كان تاني تصريح لـ “شاكوش” قاله في مداخلة تليفونية على قناة صدى البلد، تعليقاً على كلمات “هشرب خمور وحشيش” في أغنيته “بنت الجيران”.. وقال بعد التصريح ده إنه فعلًا غير الكلمات دي في الأغنية.

    وفي سؤاله عن حياته الشخصية، شاكوش قال في حواره مع “أخبار اليوم” إنه كان متجوز لكن حاليًا بيدور على بنت الحلال –في إشارة إلى إنه مطلق – وعن مواصفات بنت الحلال قال: “تكون زوجة صالحة تقدّر مواعيد شغلى وظروفه، وتقدر تساعدنى على مصاعب الحياة اللى بنقابلها بشكل يومي، ووالدتى هى اللي  هتقوم بمهمة البحث عن العروسة المناسبة”.

    وفي تصريحات لـ”اليوم السابع” شاكوش رد بيها على تصريحات لزميله في الأغنية “عمر كمال” اللي شاركه في غناء أغنية “بنت الجيران” واتهمه فيها بإنه نسب نجاح الأغنية كله لنفسه، فرد عليه شاكوش وقال له: “ماعنديش مشاكل مع حد جوه الوسط الفني ولا برة”.

    “أنا مش بنافس رمضان، وهو أخ وصديق، ومافيش مجال للمقارنة، لإن كل فنان بيقدم لونه الخاص، وكلنا بنقدم فن، والنجاح رزق أتمناه للكل”.. دي كانت تصريحات “شاكوش” لـ”البوابة نيوز” لما اتسأل عن منافسته للفنان “محمد رمضان”.

    مقترح