The Definitive Guide to Living in the Capital , Cairo , Egypt

نبينا الزين

وائل جسار: نبينا الزين

  • وائل جسار
  • ديني
  • من الآن
  • أرابيكا ميوزك
  • معظم محلات الكاسيت، فيرجن ميجا ستورز
تم التقييم بواسطة
Shaimaa El Gammal
قيم
قيم الآن
وائل جسار: نبينا الزين

للمرة الثالثة على التوالي بـ يقدر
وائل جسار أنه يتألق في ألبوم ديني ويثبت أنه فنان مختلف.

بعد النجاح الكبير اللي حققته ألبوماته
الدينية اللي فاتت “في حضرة المحبوب” و”رباعيات في حب الله” قرر
وائل جسار أنه يقدم السنة دي الجزء الثاني من ألبوم في حضرة المحبوب، اللي صدر
الأيام اللي فاتت علشان يتواجد بقوة في شهر رمضان.

الألبوم مش مكتوب عليه بشكل صريح “ألبوم
ديني للأطفال”، لكن صورة الشجرة والطفلين اللي مرسومة على الغلاف وأسماء الأغنيات
بـ تتكلم عن نفسها، واسم الألبوم بـ يوضح أنه هـ يبقى فيه أغنيات كثير بـ تتكلم عن
النبي محمد عليه الصلاة والسلام وسيرته.

الألبوم فيه 10 أغنيات وأسمائهم
بالترتيب:” يا ملح دارنا”، “بسم الله”، “يمامة 3 يمامات”،
“نبينا الزين”، “فتاح يا عليم”، “ولادنا اتولدوا ع
الفطرة”، “حادي بادي وربنا هادي”، “حج حجيج”، “يا
طالع الشجرة”، “نام يا حمام”، وكلهم من كلمات الشاعر نبيل خلف وألحان
وليد سعد وتوزيع وميكساج أسامة الهندي، باستثناء أغنية يا “ملح دارنا” اللي
وزعها عادل عايش واللي فعلاً كان لها روح خاصة مختلفة عن باقي الألبوم.

الميزة في الشاعر العظيم نبيل خلف
أنه يقدر يضيف قيمة كبيرة ومعاني عميقة جدًا لأي أغنية يكتبها، علشان كده وبرغم أن
الألبوم موجه للأطفال هـ تحس أنك مستمتع وحاسس أن الأغنيات موجهة للكبار كمان،
والجميل أنها بـ تنقل قصص ومواقف إنسانية عن الرسول مش مجرد عرض لسيرة نبوية  أو قصص تاريخية.

بعض أغنيات الألبوم مش مناسبة للطفل
قوي، أو على الأقل لطفل أصغر من 10 سنوات لتعقيد بعض المعاني اللغوية أو بسبب
ألحان هادئة زيادة عن اللازم، ومن الملاحظ الاتجاه الصوفي الكبير في كلمات
الأغنيات وده ممكن نشوفه من خلال بعض التعبيرات زي: “سيدنا محمد له كرامات..
سيدنا محمد في الحلم زارنا.. سيدنا ونبينا اللي هادينا… سلم علينا وجبر خاطرنا..
في الأحلام أنا شايفك.. حياتي من غيره أيام بـ تتقضى.. ريق الرسول تمرة”.

الأغنية الأولى في الألبوم يا “ملح
دارنا” بـ يميزها كورال الأطفال واللحن المختلف اللي بـ يضفي روح بهجة في الأول
وبـ يخليك حابب تكمل الألبوم وده نتيجة الدويتو الجميل ما بين وليد سعد ووائل جسار
من الألبومين اللي فاتوا.

الأغنية الثانية “بسم الله”
بـ تحكي قصة سيدنا أنس وبـ تركز على قيمة كتمان السر وده عن طريق وصف علاقة الرسول
محمد عليه الصلاة والسلام بسيدنا أنس وإزاي كان بـ يأتمنه على الأسرار ودي واحدة
من أكثر الأغنيات اللي ألفاظها كانت مبسطة جدًا: “خبي السر يا قمحاية.. مهما
تزن النحلاية.. وما قالهوش للورداية.. والعصفور على الأشجار”.

أما الأغنية الثالثة “نبينا
الزين” فبـ تتكلم عن حب النبي للأطفال وبالذات الحسن والحسين باستخدام لحن
هادئ يشبه تمامًا ستايل ألحان وليد سعد في الألبومين اللي فاتوا. ونفس الكلام
بالنسبة للموسيقى بـ ينطبق على أغنية “ولادنا اتولدوا على الفطرة” و”حادي
بادي وربنا هادي”.

في آخر الألبوم هنسمع أغنية “نام
يا حمام” وعلى طريقة الـlullabies
 الأجنبية (تهويدة النوم للأطفال) هـ نلاقي أن
الرتم المستخدم هادئ جدًا ومناسب لنوم الأطفال واللي تقريبًا مافيهوش مزيكا تمامًا
باستثناء صوت الجيتار الخفيف.

بـ يميز الألبوم ده استخدام كثير
من الألفاظ اللي الأطفال عارفينها وبـ يقولوها زي “ننه هو” و”حج
حجيج” و”حادي بادي” و”يا فتاح يا عليم” .

التجربة راقية جدًا ومبذول فيها
مجهود وتستحق الاستماع لها خصوصًا في شهر رمضان.

عجبك ؟ جرب

"في حضرة المحبوب" و"رباعيات في حب الله" لوائل جسار، "أمهات المؤمنين" لأنغام.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح