The Definitive Guide to Living in the Capital , Cairo , Egypt

أنا الموقع أدناه

يورى مرقدي: أنا الموقع أدناه

  • يورى مرقدي
  • بوب
  • من الآن
  • مزيكا
تم التقييم بواسطة
Mustafa Abd Rabu
قيم
قيم الآن
يورى مرقدي: أنا الموقع أدناه

بعد غياب 10 سنين راجع يوري مرقدي بألبوم "أنا الموقع أدناه"، يوري بـ يحاول يهرب من كلمات الأغاني اللي بقيت مستهلكة بأنه يكتب بالفصحى، وبـ يحاول كمان يقدم مزيكا مختلفة حسب رؤيته الخاصة، تعالوا نشوف قدر يعمل ده ولا لأ.

 

أغنية أنا الموقع أدناه بـ تبدأ ببيت شعر للمتنبي "أغركِ مني أن حبك قاتلي"، يوري كشاعر كان متأثر بدرجة كبيرة جدًا بنزار قباني، وهـ نشوف ده في حاجات زي "وافتخر بهزيمتي معك يا سيدة النساء".

جملة القانون في البداية جسدت ومهدت لحالة الفرحة المنتشرة في الأغنية كلها، وكملت الحالة مع المزمار البلدي والطبلة، الملاحظ في الأغنية دي -وفي الألبوم ككل- أن المزيكا أقوى وأهم بكثير من الكلام ومن صوت يوري نفسه، في الأغنية دي مثلًا هـ نسمع حاجة زي: "وها هي واقفة أجمل امرأة في الكون والكون فيها يذوب"، والسؤال اللي هـ يظهر تلقائيًا "يعني إيه؟"

 

الموزع بلال الزين عمل مقدمة جميلة وجذابة لأغنية لو سمحتِ، وكتب للوتريات جملة ممتازة، مقام الكرد مسيطر على الأغنية من الأول للآخر، يوري كملحن عمل جمل حلوة وبسيطة عند "هذا رقم هاتفي كلميني لو سمحتِ" ونقل من الكرد للبياتي عند "ألتف أنا حولكِ شمسي وقمري أنتِ".

وكالعادة الكلام هو الجزء الأضعف، هـ نلاقي تركيبات وجمل كثير مش مفهومة، أو تحديدًا صياغة الجمل ضعيفة جدًا وأقرب لخواطر الثانوي، والفرق بينها وبين طريقة الكتابة اللي بـ يهرب منها يوري أنه كتب بالفصحى وكلمات الأغاني الثانية باللهجات العامية.

يعني مثلاً هـ نلاقي "يقولون الشمس فوق" أو "يقولون الكون فوق" وباقي الجمل اللي شكلها، أو "لا تدعي الأيام تمر لا تقولي ربما يوم من الاثنين إلى الأحد".

 

في أغنية أقولها الآن الموزع هاري هيديشيان بـ يستقر على الشكل الغربي من البداية مع إضافة المقسوم بسرعة بطيئة نسبيًا، وخط كمانجات رقيق وخفيف في الخلفية، يوري كشاعر اختار أنه يوجه الكلام لشخص مذكر، مع أنها ما كانتش هـ تفرق كثير لو كتب أنتِ مكان أنتَ، وتحويل المذكر لمؤنث في كل الأغنية، التغيير هنا ما كانش هـ يفرق كثير في صُلب الأغنية ولا جوهرها وكان هـ يبقى مضبوط أكثر.

 

في أغنية أحلام كبيرة اختار يوري اللهجة اللبنانية علشان يقول لحبيبته أن كل اللي بـ يعمله في حياته مالوش أي لازمة طول ما هي مش موجودة معاه، ويحسب له كشاعر غنائي أنه اختار الزاوية دي علشان يعبر بها عن العلاقة بين الحبيبين.

أما عن يوري كملحن، فنقدر نقول أن الصياغة الموسيقية كانت ضعيفة إلى حد كبير، واللي أنقذ الأغنية إلى حد ما مزيكا التكنو اللي اختارها الموزع هاري هيديشيان وغلف بها الأغنية، وكمان جملة الساكس في البداية كانت مختلفة جدًا.

 

أغنية بعيد عنك كتب يوري كلماتها باللهجة المصرية، أغنية بسيطة في لحنها وفي توزيعها اللي اعتمد طوال الوقت على نغبشات الجيتار المصاحبة للغناء، الأغنية مافيهاش أي زخارف من أي نوع، حتى من غير إيقاع، وكمان يوري بـ يغني من طبقة أقرب لطبقة الكلام العادي، وده علشان يجسد حالة الحزن والكآبة.

واللي يحسب ليوري فعلاً أن الكلام من وجهة نظر الحبيب اللي اتسبب في جرح حبيبته، وبـ يطلب منها تعطي له فرصة ثانية، وبـ يعترف بغلطه ويندم، ومش معتاد أن الكلام يبقى من وجهة نظر الرجل -الطرف الأقوى دايمًا- لكن هنا بـ يطلب من حبيبته تسامحه.

 

أغنية يا قاهرة أهم أغنية في الألبوم، اللحن لعازف العود الكبير ممدوح الجبالي وتوزيع الموسيقار هشام نياز، يوري بـ يتكلم عن القاهرة من وجهة نظر المغترب، وللأسف الكلمات برضه كانت ضعيفة جدًا، وكان فيه صياغات أفضل للأغنية، هـ نلاقي تركيبات مش مفهومة زي: "ال نيل عينيك أم لشرقيته كوكبك".

البداية مع العود وتقريبًا العازف هو ممدوح الجبالي نفسه، وشوية وبـ تظهر الكمانجات اللي بـ تقول من نغمة عالية جدًا كل ده مع المارش اللي عمل حالة من القلق، كأن المزيكا هنا بـ تعبر عن معركة، لكن هنا دي معركة الزائر المغترب مع مدينة كبيرة قديمة لها نصيب كبير من اسمها، وآهات الكورال في البداية تجسيد لصرخات الجموع المهزومة وسط زحمة المدينة المليونية.

الغناء بـ يبدأ من طبقة القرار، وإن كان يوري كان بـ يغني من خارج الطبقة اللي استقر عليها العزف، كان بـ يغني من طبقة أقل، لكن خشونة صوته أضافت للأغنية، ومش  عارفين هل التأثير ده مقصود ولا لأ.

عند كلمة "آ لنيلِ عينيكِ" بـ يتغير المقام من كرد لبياتي علشان يعطي الإحساس بالروح الشعبية الشرقية اللي أشبه بطعم مدينة القاهرة نفسها، وبـ نرجع عند "عند المغيب" علشان نختم الأغنية بنفس المارش البطئ، ومع ترديد الكورال لـ "الدنيا مرت من هنا" بـ يقفل يورى الأغنية من أعلى نقطة.

 

الموزع هاري هيديشيان كان موفق تمامًا لما استخدم مزيكا الـ Latin في أغنية نافذتي وللمرة الثانية بـ ينقذ الأغنية من السقوط التام، المزيكا عملت حالة من البهجة الملائمة تمامًا لحالة الأغنية، لحن يوري ضعيف وبرضه الكلمات غريبة، لأن إحنا مش فاهمين يعني إيه "تتدلع" وإيه المقصود بـ "وقت الحسم".

 

أغنية واحشني بدأت بشكل ممتاز، والبداية دي تحسب ليوري كموزع ومعاه فيكن موشيليان وده أول ظهور قوي للمقسوم، في الأغنية دي يوري بـ يرجع للونه القديم ولطريقته المفضلة في الغناء، بـ يغني بصوته زي ما هو وبحرية تامة، كلمات خالد تاج الدين مافيهاش أي جديد، وكذلك باقي التوزيع واللحن.

 

الموزع ميشيل فاضل اعتمد من البداية في جملة البيانو على سلم الماينور لتجسيد الحزن في أغنية قليل، الملحن طارق أبو جودة بـ يكرر نفسه يمكن يلاقي نفس النجاح اللي عمله مع وائل كفوري في أغاني من النوع ده، النشاز من يوري كان واضح جدًا عند "مش حرام تعمل فينا هيك" وصوت الملحن طارق أبو جودة واضح في الخلفية مع الكورال.

 

لحن أغنية حدا مش أنا متماسك بالنسبة لباقي ألحان يوري، رغم الانتقال في البداية من حالة الحزن للفرح مرة واحدة من غير مقدمات، وبـ يوصل اللحن للذروة عند "ويصير اللي بقلبك حدا ثاني".

 

المقدمة القصيرة لأغنية سنين بـ تختفي تمامًا لصالح غناء يوري ولصالح إيقاع المقسوم، الانتقالات المفاجئة سمة غالبة في الألبوم بالذات في الأغاني اللي لحنها يوري، لحن طارق أبو جودة كان أفضل من الأغنية اللي فاتت، توزيع يوري اعتمد على المقسوم بس، لكن الجميل فعلاً الحوار بين الكمانجات والأكورديون.

 

ملحوظة أخيرة

محاولات يوري للاختلاف والكتابة بالفصحى محاولات كويسة، لكنها للأسف ما كانتش دايمًا حلوة، طوال الوقت مافيش تماسك والاستعجال وعدم الدقة واضحين جدًا، ولحد دلوقت مش واضح إيه الهدف من الكتابة بالطريقة دي، إيه الجديد؟ فين الاختلاف؟ لازم يوري يسأل نفسه السؤال ده وخاصة أن ده الألبوم الخامس.

عجبك ؟ جرب

ألبوم سميرة سعيد "عايزة أعيش".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح