The Definitive Guide to Living in the Capital , Cairo , Egypt

المعادي، مين فينا ما وقعش في غرامها وما حبش مطاعمها الكثيرة اللي بـ تقدم عشرات من المطابخ العالمية من كل أنحاء العالم، طلعت في دماغنا نأكل حاجة آسيوي، ومن هنا قررنا نروح آشيان كورنر – Asian Corner المطعم الهادي اللي عنده تشكيلة هايلة من أكلات القارة الآسيوية.

آشيان كورنر موجود فوق روستري على شارع 18، ويتميز بديكورات أنيقة من كراسي وترابيزات خشب مع إضاءة هادئة بـ تخلق أجواء مريحة، الفرع ده بالتحديد مختلف عن باقي فروع آشيان كورنر الموجودة في المولات، لأن المنيو هناك فيها تنوع أكبر وكمان عندهم منيو سوشي.

بدأنا مع شوربة هوت أند ساور (25 جنيه) وبالنسبة للمقبلات طلبنا جولدن باجز (24 جنيه) وتشيكن سبرينج رولز (15 جنيه) وشاندونج مقلية بالخضروات fried Shandong Vegetables بـ (15 جنيه).

نروح على الأطباق الرئيسية، وهدفنا كان أكلة تجمع بين الهندي والصيني، فطلبناMurg Makhani  بـ (44 جنيه) وبيف سيشوان Beef Szechuan بـ (42 جنيه) مع أرز بالبخار، الشوربة كانت طازجة وساخنة جدًا وتستحق لقب أحسن شوربة هوت أند ساور من وجهة نظرنا، خصوصًا مع نكهة الثوم والزنجبيل المميزة مع قطع الخضروات وشرائح الفراخ.

كل أطباق المقبلات وصلت في نفس الوقت وكانت هايلة، السبرينج رولز كانت عبارة عن 5 قطع رول كبار فيهم خضروات وفراخ مفرومة، وطبعًا لازم نتكلم عن جمال وروعة صوص السويت أند ساور اللي أضاف نكهة مميزة للرولات، الجولدن باجز كانت مقرمشة من بره وطرية من جوه ومحشية فراخ وذرة حلوة، أما الشاندونج بالخضروات فكان أبرز طبق وهو عبارة عن قطع صغيرة من الكوسة المقلية بطبقة مقرمشة وعليها صوص ثوم سبايسي.

نروح على طبقMurgh Makhani  اللي بـ يقدم أطرى قطع فراخ شوفناها وعليها صوص أحمر لذيذ، صحيح ده مش الشكل الأصلي للطبق الهندي، بس عمومًا طعمه كان لذيذ ومميز، أما البيف سيشوان فكان عبارة عن شرائح رفيعة من اللحم الطري المقلي مع فلفل ألوان وبصل وعليهم صوص السيشوان السبايسي والمسكر في نفس الوقت، الطبقين في الحقيقة كانوا ممتازين ومعاهم أرز أبيض حافظ على نكهة الطبق الرائع.

صحيح آشيان كورنر مش الراعي الرسمي للأكل الآسيوي الأصلي في المعادي، بس أكيد هـ تمشي من هناك ومحفظتك محافظة على نفسها، عمومًا، تجربتنا هناك كانت هايلة وأكيد هـ نرجع مرة ثانية علشان نجرب أطباق آسيوية ثانية وندلّع نفسنا.