The Definitive Guide to Living in the Capital , Cairo , Egypt

اسم قدر يفرض نفسه بقوة على ساحة المطاعم المصرية المتميزة في آخر 10 سنوات، وفتح فروع كثير في القاهرة في مناطق المعادي ومصر الجديدة والمهندسين وطبعًا في سيتي ستارز اللي هـ نتكلم عنه النهارده. مطعم «أبو السيد» تخصص في المطبخ المصري الأصيل وقدر يخلي له طابع أو تيمة معينة للديكورات وشكل وتصميم المحل. في كل الفروع اللي دخلناها كان محافظ على الأجواء التراثية والشكل الفولكلوري للمكان بتابلوهات بـ تصور شوارع مصر في عصور مختلفة والنجف والشمعدان العملاق وصورة شخصية “أبو السيد” أو لوجو المكان اللي محطوط في تابلوهات كبيرة على الجدران، والسجاد العجمي على الأرض والإضاءة الخافتة اللي بـ تفكرك بالحسين وخان الخليلي وأخيرًا المزيكا القديمة اللي بـ يشغلوها، زي فريد الأطرش ومحمد قنديل وسعاد محمد. في النهاية حبينا قعدتنا في فرع «أبو السيد» اللي في الدور السادس من المرحلة الأولى في سيتي ستارز، وعجبنا فيه أكثر أنه معزول تمامًا عن أجواء سيتي ستارز الصاخبة والمودرن في الخارج، أنت هنا رجعت 50 سنة للوراء، وسهل تتوقع المنيو ممكن يكون فيه إيه.

حمام وفراخ ومحاشي وشركسية وفتة وريش وممبار وملوخية بالأرانب، دي الأطباق الرئيسية، وفيه منيو للمقبلات وأكلات الإفطار فيها فول وفلافل وبصارة وكبدة فراخ وأسياخ شيش كباب صغيرة وكبيبة وسلاطات، وطبعًا قائمة الحلويات لن تخلو من أم علي والمهلبية والقرع العسلي وفطير مشلتت بالعسل وفيه شوية عصائر فريش وعصير قصب كمان.

الكنبة كانت مريحة وكبيرة بزيادة، لدرجة أننا فردنا رجلينا عليها كأنها سرير وكبس علينا النوم، والرحرحة الزيادة بـ تبقى مثالية لما تأكل وجبة دسمة زي اللي طلبناها وهـ نقول لكم حالًا كانت مكونة من إيه.

صينية أبو السيد؛ دي في منيو المقبلات بـ يبقى فيها طبق بصارة وفول أو 3 أقراص طعمية بالسمسم وطحينة وورق عنب. سعر الطبق 59 جنيه! ما كناش مصدقين الرقم بالذات بعد ما شفنا الكميات القليلة في كل حاجة قُدمت فيه، صحيح البصارة والطعمية طعمهم حلو وكذلك الطحينة، لكن ورق العنب هو أسوأ محشي أكلناه في حياتنا بالمعنى الحرفي، كان محشي أرز ولحم مفروم لكن رائحة دهون غريبة طالعة منه وبقينا مش قادرين حتى نخليه أمامنا على الترابيزة، مهما كان حد بـ يحب الأكل دسم مستحيل يستحمل المحشي بالطعم أو الرائحة دي. تفادينا المحاشي تمامًا في أطباقنا الرئيسية وطلبنا شركسية الفراخ (55 جنيه) وهي بشهادة ناس كثير من أجمل الأطباق اللي ممكن تأكلها هنا، وده حقيقي بصراحة، عبارة عن أرز أبيض وعليه شرائح فراخ مسلوقة ومغطاة بصوص كريمة بالمكسرات. طبق خفيف والكمية فيه معقولة وحسينا بمذاق كل مكوناته اللي كانت فريش لحد كبير. رجعنا ثاني للمفاجآت غير السارة، مع طبق الستيك فيليه بصوص الفلفل البني ومعاه الخضار السوتيه (78 جنيه) وتجربة مريرة مع شرائح السوتيه اللي كانت مركونة أيام أو أسابيع في الفريزر لدرجة أن حبات الفاصوليا كانت لها رائحة أقرب للحمضان! وبطاطس مش مستوية أساسًا، تجنبنا السوتيه تمامًا وأكلنا قطعة الفيليه اللي كانت معقولة وتسويتها جيدة لكن لا تزال دون المستوى ومش أحسن حاجة ممكن تأكلها من عند «أبو السيد».

بعد الأكل جربنا عصير القصب (12 جنيه) وكان كويس بس فريش زي بتاع الشارع طبعًا ولحسن الحظ كانت الخاتمة جيدة مع طبق المهلبية بالمكسرات (22 جنيه) وأخذنا بعضنا ومشينا لأن ساعتها كان فيه قلق في سيتي ستارز وبدأنا نسمع تكسير وصراخ وعرفنا أن فيه خناقة في الدور الأول، وأكيد كلكم سمعتوا عنها في وقتها، إحنا بقى كنا في قلب الحدث، وعيشنا لحظات الذعر اللي كتبوا عنها في الصحف، بس مش هـ نبالغ قوي لأن الموضوع ما كانش كبير، ومافيش مانع من شوية أكشن في الخروجة علشان نكسر الملل. بس علشان تعرفوا قد إيه فريق كايرو 360 بـ يعرض نفسه للمخاطر علشان يجيب لكم الأخبار والمقالات النقدية (لا شكر على واجب) ونتمنى أن دي ما تبقاش آخر مغامرة لنا وإحنا بـ نحضر لكم موضوعاتنا.

هنا مكان جيد لو عاوز تعزم أصحابك الأجانب اللي عاوزين يجربوا أكلات ومشروبات مصرية لكن عاوزين يعملوا ده في مكان 5 نجوم وفيه خدمة مميزة، بس تفادى الأطباق اللي قولنا عليها أو حدد لهم بالضبط أنت عاوز إيه في وجبتك علشان يراعوا الدقة والجودة اللي إحنا افتقدناها. «أبو السيد» كويس بس محتاج شوية تضبيط.