The Definitive Guide to Living in the Capital , Cairo , Egypt

أروما لاونج – Aroma Lounge

أروما لاونج: مطعم مناسب للعيلة في سيتي ستارز

تم التقييم بواسطة
Shaymaa El Gammal
قيم
قيم الآن
أروما لاونج: مطعم مناسب للعيلة في سيتي ستارز

وإحنا بـ نتمشى في سيتي ستارز فى المرحلة الأولى، عدينا على مطعم أروما لاونج – Aroma Lounge الموجود فى الدور الثالث، المكان شدنا من بره خصوصًا أننا بـ نحب ستايل الكراسي والديكور الـVintage  اللي بـ يدعو للروقان وهدوء الأعصاب فـ قررنا ندخل ونجرب المكان.

من الحاجات الحلوة في المكان وجود 3 مستويات مختلفة للقعدات: المستوى الأول هو الجزء الموجود جوه المول وده قعدته تقدر تعيش فيها أجواء سيتي ستارز زي درجة الحرارة فيه والدوشة على حسب فيه حفلة ولا لأ.. بعد كده بـ تدخل على مستوى وسط جوه شوية وفيه بانوراما زجاج كبيرة بعرض المكان كله ودى بـ تكون درجة حرارتها متوسطة وواسعة ومريحة، أما المستوى التالت فهو Open Air تمامًا وبـ تدخل له الشمس وبـ يفصلك تمامًا عن جو المول.

بصفة عامة الخدمة في المطعم كويسة، عدد العمالة مناسب، أول ما بـ تقعد المنيو بـ تنزل على طول، طلبك بـ يتاخد بدقة ومش بـ يتأخر والأكل بـ ييجي سخن والناس كانوا بـ يستجيبوا بسرعة كل ما بـ نطلبهم.

طلبنا Banana Berry Smoothie بـ (27 جنيه) وكان حلو جدًا مثلج وطعمه طازة وطبيعي ما حسيناش فيه بطعم النكهات الصناعية أو الألوان، والكريمة المخفوقة عليه كانت مضبوطة تمامًا ومش مسكرة قوي ودي مش دايمًا بـ تكون مضبوطة في الكافيهات.

وطلبنا كمان شوربة طماطم بالكريمة (30 جنيه) كانت حلوة برضه ومضبوطة.. وختمنا بطلب بيتزا مارجريتا (40 جنيه) ودي ما كانتش أحسن حاجة بسبب أن صوص الطماطم بتاعها كان قليل أوي مع أن المارجريتا أساسها الطماطم والجبنة.

المنيو كويسة جدًا وتفتح النفس بصراحة، التصميم بتاعها حلو ومنظمة والأكل متصور فيها بشكل محترف جدًا، وهما رافعين نسخة منها على صفحتهم على الفيسبوك فـ تقدروا تتفرجوا وتاخدوا فكرة قبل ما تروحوا المكان.

الأسعار مش رخيصة أوي تعتبر قريبة من أسعار مطعم تيدز – Ted's فى نفس المول واللي بـ نعتبرها عالية نسبيًا، لكن هما بـ يتبعوا سياسة استخدام المكونات الغالية والأصلية وده باين في طعم الأكل وبالذات الـBanana Berry Smoothie  على سبيل المثال.

من الحاجات اللي حبيناها في المكان ده السوشيال ميديا، أول ما اتصورنا في المكان وعملنا Check In رحبوا بنا على إنستجرام واتمنوا لنا يوم سعيد بعدها بدقيقة، كمان بـ يهتموا بالرد على عملائهم وتعليقاتهم على الفيسبوك.

نصيحة 360

جربوا تقعدوا تشتغلوا هناك المكان هادي.

أحسن حاجة

فيه أماكن خاصة للمدخنين بعيد عن العائلات.

أسوأ حاجة

فيه Minimum Charge أحيانًا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح