The Definitive Guide to Living in the Capital , Cairo , Egypt

كلامنا هيكون عن واحد من المطاعم القليلة في قلب مول توين بلازا القاهرة الجديدة وهو "أسباراجوس – Asparagus"، لما عرفنا أن المكان مملوك لواحد من ملاك ستيك آوت السابقين، توقعنا نشوف حاجة جديدة مختلفة، واللي أقنعنا أكثر كان لوجو المكان اللي لما تشوفه هتفتكر أنك في انتظار تجربة أكل جديدة ومبتكرة، اللي هـ تشوفه فعلاً هناك أجواء هادئة ممكن تقول أنها أجواء "رومانسية"، بإضاءة خافتة وأرضيات وحوائط من الخشب البني مع أثاث لونه أبيض كريمي أضاف لمسة راقية للمكان.

رحبوا بنا بعصير ليمون بالنعناع عليه شوية صودا، وبعيدًا عن لونه الأخضر الفضائي، طعمه كان مسكّر ولذيذ وكان هو الدافع أننا نجرب المشروبات الثانية وهي صن شاين كوكتيل (17.99 جنيه) وكوكتيل أسبارجس (24.99 جنيه) المكون من برتقال وخوخ وجوافة.

بعدها أخذنا جولة في المنيو اللي تشمل أطباق عالمية متنوعة، وطلبنا منها طبق بط مشوي (49.99 جنيه) من المقبلات وبالنسبة للأطباق الرئيسية اختارنا كانتري تشيكن (86.99 جنيه) وريب آي ستيك (159.99 جنيه).

أول ملحوظة هـ نتكلم عنها هي وصول الأكل متأخر 20 دقيقة، وصحيح البطة قُدمت على طبق كبير، بس المشكلة أنها كانت مسلوقة مش مشوية، وبالتالي كانت صعبة المضغ، إضافة الكاتشب كمان كانت غريبة ومالهاش أي لزوم.

أكيد البداية كانت مش على المستوى، بس اللي جاي أحلى، الريب آي ستيك وعليه بصّل مسكّر كان روعة، قطعة البيف الأسترالية المعمولة باحترافية وتتبيلتها الخارقة كانت مالهاش حل، ومن كثر حلاوتها نسينا الأطباق الجانبية اللي معاها، البطاطس المهروسة كانت لذيذة وتتبيلتها ممتازة ومتغطية بمرقة غنية هايلة، أما الأرز فكان مضاف له نكهة القرفة اللي عملت طعم هايل مع صوص المشروم البني اللي على الستيك.

الكانتري تشيكن مقرمشة من بره وطرية من جوه، ده غير أن قوامها كان هايل، وصوص المشروم البني والصوص الأبيض كانوا إضافة هايلة وعملوا نكهة حادقة لذيذة للطبق، الأرز الأبيض والبطاطس المهروسة برضه كانوا كويسين وتتبيلتهم مناسبة.

خلصت الحكاية مع طبق حلو المطعم المخصوص "أسباراجوس" (34.99 جنيه)، وفعلاً الموضوع طلع كبير، الطبق كان عبارة عن كمثرى مسلوقة مسكّرة غرقانة في صوص فانيليا دسم؛ الموضوع شكله بسيط إحنا معاكم، بس التوازن بين مكونات الطبق ما بين طعم الكمثرى ونكهة الفانيليا المسكّرة اللذيذة كانت حكاية.

لو تغاضينا عن طبق المقبلات الضعيف، الأطباق الرئيسية اللي جربناها عند أسباراجوس كانت تحفة وواضح فيها خبرات واحد من صناع ستيك أوت، والسؤال دلوقت: هل أسباراجوس هو العملاق المنتظر؟ غالبًا لأ، بس ما عندناش مشكلة يكون رأينا غلط ومش هنتردد في الرجوع هناك في زيارة ثانية.