The Definitive Guide to Living in the Capital , Cairo , Egypt

مطاعم
Asmak – أسماك

أسماك: أكلة سمك معتبرة في مول مزار الشيخ زايد

مطاعم، أسماك، الشيخ زايد،
تم التقييم بواسطة
Angie El Batrawy
قيم
قيم الآن
أسماك: أكلة سمك معتبرة في مول مزار الشيخ زايد

لو سألت أي حد قبل كده على الحى الـ 16 في الشيخ زايد هتلاقيه مش من الأماكن المفضلة لأنه مافيهوش أماكن للخروج أو كافيهات ومطاعم كتيرة، لكن بعد افتتاح مول مزار من فترة وفتح جواه سوبر ماركت سبينيز ومحل “أبو الخير” للمنتجات السورية اللي كتبنا لكم عنه قبل كده، دبت فيه الحياة وبقت الرجل عليه أكتر وبقى على قايمة الناس لما بتخرج في الويك إند، ومن الأماكن اللي هناك مطعم أسماك – Asmak اللي شدنا نوره المبهج من بعيد.

 

المكان مختلف من قبل ما تدخله، قبل المدخل هتلاقي مكان الـ Waiting list عاملين كراسيه على شكل قوارب صيد، وفيه زينة منورة حلوة أوي، دخلنا وما كانش فيه مكان تحط رجلك من الزحمة، انتظرنا شوية عقبال ما فضيت ترابيزة، وبدأت زيارتنا.  

ديكور المكان شيك جدًا وكلاسي، فيه إضاءات كتيرة جدًا في المكان مكررة ورا بعض عاملة شكل abstract حلو جدًا وفيه لوحات على الحوائط لهيكل عظمي لأسماك شكلها لطيف وجديد، مش من عادة مطاعم الأسماك أن يبقى فيها كنب مش كراسي لكن “أسماك” واخد طابع مميز له وبيخاطب فئة مختلفة، فيه منطقتين للقعود واحدة مقفولة أول ما تدخل، والتانية مفتوحة في آخر المطعم بتروح لها من مدخل تاني.

مافيش منيو مطبوع لمطعم أسماك لكن الجرسون بيقول لك على الأصناف، فيه عندهم طواجن بحريات مشكلة بتختاره بصوص أبيض أو أحمر، طلبنا طبقين أرز سمك، والسلاطات بيجيب لك صينية عليها تشكيلة وأنت بتختار اللي حابه، منها ثومية ووطحينة وبابا غنوج وبنجر وكافيار أو مخلل ومحمرة، اختارنا بابا غنوج (15 جنيه) وسألناهم على سلاطة خضراء (15 جنيه) لأنها ما كانتش على الصينية وطلبناها من غير بصل.

زي أي مطعم سمك لازم بتروح تختار نوع السمك اللي عاوزه وطريقة التسوية بتاعته، لازم نقول لكم أن الجزء اللي فيه أنواع السمك والمأكولات البحرية لوحده قطعة فنية تفتح نِفس اللي مش جعان، طريقة رص السمك وألوانهم ولمعانهم جميلة، ده غير أن إضاءة المكان الساطعة مخلية الموضوع مبهج جدًا.

 

 

من الأصناف الموجودة طلبنا سمك بوري واختارناه يتعمل سنجارى (الكيلو بـ 120)، وكمان سمك فيليه قشر بياض (الكيلو بـ 190) فضلنا أننا ناكله مشوي مش مقلي، الجمبري نوعين فيه الكيلو بـ 400 وفيه بـ 500 جنيه، أخذنا من الأول ربع كيلو، تسوية الجمبري إما يتعمل مشوي بالخلطة الإسكندراني (مع بصل وفلفل ألوان) أو يتعمل باترفلاي Butterfly بالزبدة، فاختارنا الطريقة الأولى.

 

 

أول حاجة بتنزل لك سلة من العيش الأبيض، طعمه حلو جدًا وخفيف وفريش، الجرسونات خلية نحل في المكان، وتجهيز الأكل أخذ وقت معقول، أول حاجة وصلت كانت الفيليه قشر بياض، بالنسبة لنا منظر علامات الجريل اللي كانت على السمك مغرية لوحدها، السمك متبل كويس وتقديمه كان كويس، طعم لحم السمك رائع ومتماسك (مش مهري) وهنا بتبان شطارة الشيف.

تاني حاجة جات البوري السنجاري، السمكة مافيهاش غلطة، التسوية والتقديم والتتبيل كله حلو جدًا، الأرز كان حلو جدًا برضه، البابا غنوج كانت لطيفة بس مش أحسن حاجة لأن طعم الطحينة كان غالب على طعم البتنجان المشوي فيها، السلاطة الخضراء كانت عادية عبارة عن خيار وطماطم مقطعين بحجم صغير جدًا ومعاهم كرنب أحمر، البرنس الكبير بقى الجمبري كان رائع، طعم الفلفل الألوان والبصل مع لحم الجمبري رائع، بجد أكلة معتبرة.

 

بعد الأكل عندهم مشروب واحد بس عصير ليمون (15 جنيه) كان حلو جدًا لدرجة ما كناش عاوزينه يخلص، كمية السكر مضبوطة وغالبًا مضاف له شوية لبن لأن لونه والتوازن في الطعم كان واضح، نهاية زيارتنا كانت مش لطيفة شوية علشان حصل لخبطة في الريسيت بتاعنا بس هما اعتذروا وكانوا ودودين جدًا.

أسماك لهم فرعين تانيين في كونكورد بلازا شارع التسعين في التجمع الخامس، وشارع النيل في الجيزة، وممكن تتابعهم على صفحة الفيسبوك.

 

نصيحة 360

اعمل حسابك روح بدري خاصة في الويك إند علشان الزحمة.

أحسن حاجة

التجربة كلها.

أسوأ حاجة

اللخبطة اللي حصلت.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح