The Definitive Guide to Living in the Capital , Cairo , Egypt

شارع البحر الأعظم يعتبر من الشوارع التجارية لكن كمية المطاعم وأماكن الخروج فيه قليلة لو هـ نقارنه بشارع زي الهرم أو البطل أحمد عبد العزيز، ولما فكرنا في السبب قولنا يمكن علشان أزمة البنزين اللي بـ تخلي الشارع مشلول مروريًا أو يمكن البلطجية اللي بـ يحتلوا الكورنيش حرفيًا وفكرة أنكم تتمشوا على الكورنيش أو حتى تركنوا عربيتكم تعتبر مغامرة غير محسوبة، نتمنى محافظة الجيزة “النشيطة” تهتم شوية بمستوى الأمن والنظافة في شارع رئيسي من شوارع الجيزة.

كأنكم رايحين على المنيب وبعد نفق كوبري عباس على اليمين هـ تلاقوا مطعم أسماك الحوراني اللي لازم هـ تأخذوا بالكم منه سواء كان بسبب رائحة الشواء الرائع أو الزحمة اللي بـ تكون مغطية المحل، المطعم مافيهوش مكان للأكل لكن بـ يوصل لمناطق الدقي والمنيل والجيزة، منيو المطعم كلاسيكية بالنسبة لأي مطعم سمك لكن بـ تبقى فيه أصناف جديدة بـ تضاف تقدروا تتابعوا كل جديد عنها من خلال صفحتهم على الفيسبوك بالإضافة إلى التخفيضات والمفاجآت الثانية.

كان فيه مقولة للفنان فريد شوقي في فيلم مش فاكرين اسمه بـ تقول “السمك ما ينفعش إلا في البيت” هي وجهة نظر أخذنا بها لأن المطعم زي ما قولنا لكم مافيهوش مكان للأكل، طلبنا من شخص محترم جدًا وودود على التليفون شوربة سي فود ( 15 جنيه) و4/1 كيلو جمبري مقلي (25 جنيه/ الكيلو 100 جنيه) مع 2/1 كيلو سمك بوري مشوي (18 جنيه/ الكيلو 36 جنيه) و1 سلطة طحينة و1 سلطة بابا غنوج ( 1.5 جنيه لكل واحدة)، تقدروا تحددوا إمتى الطلب ييجي لكم ودي حاجة لطيفة.

الطلب وصل بعد ساعة إلا ربع بالتمام والكمال، السمك رائحته كانت مفحفحة بمعنى الكلمة، بدأنا بالشوربة اللي كانت كميتها معقولة جدًا بالنسبة لثمنها عبارة عن سلطانية متوسطة مليانة بقطع الجمبري والسبيط وقطع من الكابوريا وقوام وطعم هائل للشوربة، ودخلنا على السمكة البوري المشوية (400 جرام) واللي كانت متبلة حلو قوي ومشوية كويس قوي، اللحم مش ناشف ولا مش مستوي يعني مشوي أصلي وكمان السمكة نفسها واضح أنها طازجة ومتبلة بالبصل والطماطم والجزر وبهارات السمك اللي تقدروا تجيبوها من أي عطار بس كانت حادقة شوية، أما الجمبري المقلي كان خطير واخد لون ذهبي جميل ومش مزيت وطازج وحجمه متوسط، مستمتعين بالسمك وسلاطة الطحينة الجامدة قوي وسلاطة البابا غنوج اللي كانت مشطشطة شوية واللي أضافت طعم هائل مع السمك المشوي والجمبري.

مطعم أسماك الحوراني رائع ودلوقت بس قدرنا نعرف ليه الناس بـ تبقى زحمة بطريقة مش طبيعية، وده بسبب أن فيه مطعم سمك بـ يعمل أكل بحري بمستوى جيد وفي نفس الوقت بأسعار معقولة في الوقت اللي ممكن تأكلوا نفس الأكل بجودة أقل في أماكن ثانية بأسعار غالية وغير منطقية، نتمنى أن مطعم الحوراني يحافظ على المستوى ده ونشوف لهم فروع في مناطق كثيرة بالقاهرة.