The Definitive Guide to Living in the Capital , Cairo , Egypt

افريكانو – Africano

أفريكانو: مكان جميل ينقصه الاهتمام في أرض الجولف

  • 10 شارع محمد المهدي
  • عالمي
  • 0224147078,01003619255
  • 11 صباحاً - 2 صباحاً
تم التقييم بواسطة
Waleed Abuarab
قيم
قيم الآن
أفريكانو: مكان جميل ينقصه الاهتمام في أرض الجولف

في شارع متفرع من شارع نبيل الوقاد الرئيسي في منطقة أرض
الجولف في مصر الجديدة، هـ تلاقي مطعم وكافيه «أفريكانو» واخد ركن والرسومات
والزخارف الأفريقية المميزة مزيناه من بره، ومبدئيًا الشارع ضيق جدًا يعني ممكن
تعاني في ركنة العربية والتاكسي مش هـ يعرف يدخل الشارع بسهولة، بس مش مشكلة قوي
علشان شارع نبيل الوقاد نفسه قريب من المكان فممكن تركن أو تنزل هناك وتتمشى مسافة
صغيرة.

المحل من الداخل واضح أنه كان تحفة فنية من حيث التصميم
والديكور، وبـ نقول “كان” لأن الإهمال تمكن من المكان وخلى كل حاجة مش
في أفضل حالة لها، الخشب عايز يتلمع، فيه بعض آثار دخان أسود على الجدران،
التكييفات مش كلها شغالة وصوتها عالي، الأرضيات كمان محتاجة تنظف أكثر من كده، من
الآخر المكان محتاج عملية تجديد وبعض الترميمات. الديكور طبعًا واخد الطابع
الأفريقي بأرضيات خشبية وزجاجية على شكل غابات ومجرى نهري في وسطها، وفيه مجموعة
من الأقنعة والطواطم معلقة على الجدران وبعض اللوحات الفنية اللي بـ تصور الطقوس
الأفريقية، والكراسي كلها مغطاة بقماش على شكل جلد الجاموس الأبيض في أسود،
والقعدات كلها مريحة والمكان واسع وهادئ وفيه شاشة تليفزيون في الدور الأرضي،
والدور العلوي مخصص للحفلات. وفيه ركن ألعاب ومراجيح للأطفال كمان.

تقريبًا كنا لوحدنا في المكان، حتى ساعة الأفطار (بما
أننا في رمضان) توقعنا أن المكان يزدحم إنما ما حصلش، يمكن علشان التليفون الأرضي
في المحل عطلان وما حدش عارف يحجز، لكن إحنا رحنا مباشرة من غير حجز أو اتصال، ودي
كانت ميزة أن المكان كان رايق وهادئ على الآخر، وبمجرد ما قعدنا قام الجرسون وولع
بخور في المكان، علشان يغطي رائحة حاجة ثانية مش عارفينها! وبدأنا نتفرج على
المنيو.

المنيو عادي زي أي مطبخ عالمي، أطباق رئيسية من اللحوم
والفراخ؛ ستيك وبيكاتا وفيليه بوافر وفيليه بأربع أنواع جبنة (كواترو فورماج)
وفيليه الدجاج ورولز الدجاج، وفيه أطباق أسماك وجمبري على الطريقة الأفريقية زي
طبق الـ «بايلا» وهو عبارة عن أرز بالتوابل الأفريقية بالجمبري بالكاليماري وده
أغلى طبق في المطعم (75 جنيه). ويوم ما رحنا ما كانش فيه بيتزا مع أنها من الحاجات
المهمة في منيو «أفريكانو» وأسعارها من 27 لـ 45 جنيه الواحدة وتكفي فرد واحد. بدأنا
بطبق مقبلات اسمه (واحة أفريكانو) سعره 50 جنيه، وهو عبارة عن أصابع جمبري كبير
مشوية ومقلية ورولز الفراخ المقلية وكرات بطاطس بيوريه محمرة من بره وعيش الثوم
المحمص بالموتزاريلا وصوصات المايونيز وجبنة الناتشو، المشهيات في أفريكانو تفتح
النفس بجد، بس الكميات كانت قليلة شوية على 50 جنيه في الطبق ده. طلبنا فيليه
اللحم بصوص المشروم (اسمه في المنيو كاليمنجارو) وسعره 61 جنيه وكان لذيذ واللحمة
مستوية كويس وفريش، ونزل معاه أرز بالتوابل وسوتيه وبطاطس محمرة، وجربنا طبق من
أطباق الدجاج اسمه (كوكو سمسم) أه والله اسمه كده في المنيو! سعره 50 جنيه وهو
فيليه دجاج عادي جدًا محشو بالبيف البقري ومغطى بالسمسم؛ شبه الكوردون بلو كثير وكان
معاه صوص حار بقطع البصل كان لذيذ قوي، ومعاه كمان السوتيه والأرز والبطاطس. الأكل
حلو جدًا لكن مالوش نكهة مميزة، أو شخصية المكان مش طاغية على الطعم زي ما توقعنا،
واضح أن موضوع الإهمال طال المطبخ كمان.

المنيو فيه كمان شوربات وساندويتشات أسعارها بـ تتراوح
بين 27 لـ 33 جنيه وكلها لحوم ودجاج عادية، وفيه كوكتيلات فواكة خاصة الاستوائية،
وعجبنا كوكتيل التفاح بالصودا وقطع التفاح (16 جنيه) والكوكتيلات أسعارها كلها من
12 لـ 26 جنيه، وعلشان كنا في رمضان طلبنا كركديه (10 جنيه) وكان فريش ومثلج. وبعد
الأكل طلبنا براونيز (نينو) بصوص الشيكولاتة والآيس كريم (25 جنيه) لكن للأسف
جالنا من غير آيس كريم، رغم أنه مكتوب أنه فيه في المنيو! وما كانش حلو قوي
عمومًا.

الخدمة جيدة لكن يعيبها بعض البطء، لكن حصل معانا موقف
يأكد أن العاملين يتسموا بالأمانة الشديدة، لأننا نسينا الموبايل في المطعم ومشينا
وبعدين اتصلنا علي تليفوننا المفقود ورد أحد العاملين وقال أن التليفون موجود في
المحل تقدروا تيجوا تأخذوه، وفعلًا رجعنا بعدها بشوية وشكرناه بشدة.

جرب «أفريكانو» مع أصحابك أو في قعدة رومانسية أو خروجة
عائلية، ينفع في كل المناسبات، وأكله ظريف وكوكتيلاته أظرف.

نصيحة 360

لو بـ تفكر تحجز أو تستعلم عن حاجة استخدم رقم الموبايل علشان التليفون الأرضي بـ يعطل هناك.

أحسن حاجة

ديكور الغابات الأفريقية والإكسسوارات المعلقة.

أسوأ حاجة

الإهمال اللي جعل شكل المكان مش في أحسن حالاته.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح