The Definitive Guide to Living in the Capital , Cairo , Egypt

في مطعم “أكلة خانة” فيه تحدي للأكيلة، أي حد ممكن ياكل أي عدد سندوتشات مهما كانت فقط بسعر 99 جنيه، وإحنا في كايرو 360 قبلنا التحدي وقررنا نروح نجرب الأكل ونتحدى المكان في إننا هناكل أكبر كم من السندوتشات.

وبعد ما وصلنا شارع الخمسين في المعادي ودورنا على المحل ووصلنا له، اكتشفنا أن التحدي الحقيقي اللي نجح فيه المطعم هو تقديم أكتر من نوع أكل مميز، سواء كان مشوي أو مكرونة وحتى التحابيش بتاعتهم كانت مميزة، ولذلك قررنا نلغي فكرة السندوتشات تمامًا ونتذوق أكبر قدر من الغموز والمكرونات.

بدأنا قعدتنا بإننا اخترنا سجق بالمكرونة، وكبدة مشوية، وسجق بصوص الكولا، وكبدة بصوص الكولا، وسجق بدبس الرومان، وكبدة فراخ بخل بلسميك، وداوود باشا بالصلصة، مع تحابيش، ومشروبات مختلفة لزوم الأكل.

ورغم تأخر الأكل في التجهيز، إلا أن حرص الشيف لخروج الأوردر كامل مرة واحدة بسطنا جدًا، وبدأت التحابيش تنزل “باذنجان، بطاطس، طماطم محبشة، سلطة خضراء، طحينة بالليمون معصفرة، وكان الطعم جميل جدًا ومميز، خاصة التحبيشة الخصوصي بتاعة المطعم، وأكلناها كلها وطلبنا تاني كمان.

أما غموز السجق والكبدة اللي بصوص الكولا، فكان طعمه جميل وشجعنا إننا لما نلقى حاجة مختلفة في أي مكان نجربها ومانخافش، علشان التجربة خير دليل على الانبساط من الطعم، وكمان السجق بدبس الرومان، خلانا منسجمين، خاصة إنه كان بيدوب، وفي رأينا أن السبايسي أحلى من العادي.

كبدة الفراخ بخل بلسميك ماكنتش قوية، والصوص بتاعها ما كنش أحسن حاجة، لكن كفتة داوود باشا كانت أكلة “بشوات” بجد، ومع خلطة تحس معاها بمزيج الصلصة مع بهارات قوية تحسسك بدوبان الطعم.

المطعم فعلًا يستحق التجربة ومش هتندم لما تروح، وبننصحك تقعد بره في الهواء الطلق، وما تقعدش جوه في التكييف، وإحنا بنتوقع أن شارع الخمسين في المعادي هيكون له شنة ورنة بعد مجموعة الافتتاحات اللي تمت فيه، وكمان هيفتح فيه مول كبير تابع لبنزينة وطنية. وتقدروا تشوفوا باقي أكلات المكان من الصفحة بتاعتهم هنا.