The Definitive Guide to Living in the Capital , Cairo , Egypt

أوليفيتو – Oliveto

أوليفيتو: بداية قوية لإفطار رمضان في ويست تاون هاب الشيخ زايد

تم التقييم بواسطة
Angie El Batrawy
قيم
قيم الآن
أوليفيتو: بداية قوية لإفطار رمضان في ويست تاون هاب الشيخ زايد

كل رمضان وأنتم طيبين.. أولى تجاربنا في الإفطار السنة دي لازم تكون جديدة.. فريش.. ويا سلام لو في مكان جديد، علشان كده رحنا لكم ويست تاون هاب.. مجمع المطاعم والكافيهات اللى فتح جديد ومن فترة مش كبيرة في الشيخ زايد قريب من كومبوند بيفرلي هيلز، فيه هناك أماكن كثيرة ممكن تروح تفطر وتتسحر فيها زي: دكان عزيز، تابلا لونا، كي لاونج، بلدينا، وغيرها كثير.. وقلنا نستفتح بمطعم "أوليفيتو – Oliveto".

المكان كله مزين بزينة رمضان وبـ يتوسطه نافورات صغيرة بـ تطلع من الأرض شكلها بـ يكون حلو أوي مع الإضاءة بالليل، أول أسبوع زي ما أنتم عارفين بـ يكون للعزومات والعائلات وبالتالي وقت ما رحنا ما كانش زحمة أوى، وما حجزناش قبل ما نروح، لكن طبعًا قاعدة رمضان الأولى: "خليك في الـ Safe Side ودايمًا احجز قبل ما تروح.

نظام الإفطار في أوليفتو عبارة عن 2 Packages بـ تختار منهم: الأولى عبارة عن أوبن بوفيه (فيه مشروبات رمضان + شوربة + بار سلاطات) وبـ تختار معاها طبق رئيسي من دول: دجاج مشوي، بيف ستراجانوف، فيل بلانكيت وده بـ 155 جنيه (غير شامل 12% خدمة و10% ضريبة)، والثانية الأوبن بوفيه ومعاها طبق رئيسي تختاره من دول: بيف فيليه مشوي، ميكس سي فوود مشوي، أوسو بوكو، وفيليه بيكاتا، وده بـ 175 جنيه (غير شامل الخدمة والضريبة).

اختارنا من الأولى البيف ستراجانوف، ومن الثانية البيف فيليه معاه صوص فلفل، بـ تختار معاهم طلبين إضافيين كانوا سوتيه وبطاطس مهروسة، وقبل الفطار بـ يطلب منكم الجرسون تتجهوا على البوفيه علشان نختار السلاطات والشوربة ومشروب رمضان، وقت زيارتنا كان متوفر سوبيا وكركدية أخذنا سوبيا، والشوربات كان فيه مشروم بالكريمة وطماطم بالكريمة، السلاطات بقى كانت اختياراتها رائعة ومتنوعة جدًا منها سلاطة كابريس، وتبولة، وباذنجان بجبنة ريكوتا، سلاطة متبل، جريك سلاد، وسلاطات بطاطس وزبادي وسيزر.

طاقم الجرسونات هناك قمة في الذوق والتعاون، على الرغم أننا المفروض نخدم نفسنا في البوفيه كانوا بـ يسألونا نحب إيه وبـ يساعدونا ننقل أطباقنا على الترابيزة، السلاطات كلها كانت فريش وطعمها حلو جدًا، مافيهاش غلطة، الشوربة بس كانت مش سخنة أوي، دافية بس لكن طعمها حلو جدًا وكريمي ومخدومة كويس أوي، وكميتها كمان، والسوبيا كان سكرها مضبوط.. بداية موفقة.

الأطباق الرئيسية ما أخذتش وقت كثير في التحضير، جاءت لنا سخنة وشكلها يفتح النفس، طعم البيف كان رائع وكان معمول Well done زي ما طلبنا، البيوريه كريمي وحلو والسوتيه كمان بس كميته قليلة، الستراجانوف كمان كان الصوص بتاعه مش تقيل زي ما أماكن ثانية بـ تعمله مقدم في طاسة صغيرة شكلها حلو.

وبما أن الحلو مش في Package الإفطار طلبنا بعد الأكل كنافة بالمانجا (38 جنيه)، هي مش أفضل واحدة ذقناها لحد دلوقت، المانجا كانت ناشفة شوية والكريمة اللى فيها مش كثيرة، والكنافة مقرمشة (إحنا بـ نفضلها طرية) لكن بشكل عام طعمها كان حلو.

تجربتنا في "أوليفيتو" كانت حلوة وكانت بداية موفقة لإفطار رمضان اللى بـ يشتهر فيه أن المطاعم مش بـ تكون على نفس المستوى بسبب ضغط الشغل، نتمنى أنهم يكونوا على نفس المستوى لما الدنيا تتزحم شوية على نص الشهر الكريم.

نصيحة 360

أوليفيتو لهم صفحة على الفيسبوك.

أحسن حاجة

بار السلاطات رائع، وطعم البيف كان جامد.

أسوأ حاجة

الشوربة ما كانتش سخنة أوي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح