The Definitive Guide to Living in the Capital , Cairo , Egypt

أويا لاونج – Oya Lounge

أويا لاونج: مطعم استثنائي في المهندسين

  • 21 ش الكروم – خلف مسجد مصطفى محمود
  • عالمي
  • 01000007473,0237625772
تم التقييم بواسطة
Angie El Batrawy
تقييمك
قيم الآن
أويا لاونج: مطعم استثنائي في المهندسين

المنطقة الموجودة خلف وحول مسجد
مصطفى محمود شهدت ميلاد عدة كافيهات ومطاعم أشهرها على الإطلاق أول فرع لمطعم «سبكترا
– Spectra» اللي كان سبب في شهرته وافتتاح
فروع ثانية له، ومن الأماكن الجديدة اللي فتحت هناك وبالتحديد في شارع الكروم مطعم
اسمه «أويا لاونج – Oya Lounge»
 اللي رشحه لنا أحد قراء
كايرو 360 من خلال مراسلتنا على حسابنا
على تويتر
.

بجد كان أجمد ترشيح اتبعت لنا،
المكان وهمي، أول ما عملنا بحث عنه على الإنترنت وشفنا صور للمكان على الموقع الخاص بهم وجروب الفيسبوك ما صدقناش وما
ترددناش ثانية نروح. وإحنا هناك سألنا الولد اللي كان معانا عن معنى اسم “Oya” وعرفنا أنه اسم جزيرة في
اليونان، والمكان لسه فاتح قريب لأن المنيو كمان مكتوب عليها Soft Opening Menu. المكان بـ يقدم شيشة وبالتالي
مافيش مكان خاص لغير المدخنين.

لما تروح ممكن هـ تتلخبط لأن فيه
بابين، هـ تدخل من الباب الخشبي اللي عند علامة “أويا” الضخمة وبحروف
كبيرة بيضاء، المكان ضخم من الداخل بحوائط عالية فيه جزء من السقف معمول زجاج
علشان يدخل شمس الصبح، وفيه أجزاء ثانية لها سقف وعامة الديكور كله مختلف وكل
منطقة لها روحها الخاصة وشكلها المميز، الملفت بقى في المكان وشد انتباهنا أول ما
دخلنا الكراسي المعلقة زي المرجيحة اللي على شكل نصف دائرة.. رائعة.. وفيها مخدة
كبيرة أول ما شفناها نطينا وقعدنا جواها، لها إحساس مختلف تمامًا عن الكراسي
والكنب العاديين، الصبح فيه شمسيات وبالليل فيه دفايات بـ تشتغل لما الدنيا تسقع،
وكمان بـ يسود المكان في فترة الليل إضاءة خافتة موف وساعات زرقاء عاملة جو حلو
جدًا.

طاقم العمل هناك مهذبين جدًا
ومتعاونين وبـ يعملوا متابعة لو فيه حاجة طلبتها أو فيه حاجات ناقصاك، أول ما تدخل
هـ يسألوك فيه حجز ولا لأ، المكان كله نظيف والديكور رائع ومختلف حتى فى الحمامات!

أول ما بـ تطلب بـ ينزل لك خدمة
الترابيزة وكمان معاها سلة عيش معاها صوص (7 جنيه) من غير ما تطلبها وكمان زجاجة
مياه صغيرة (7 جنيه)، في البداية طلبنا شوربة بيف كانتري جرينز (24 جنيه) وهي
عبارة عن قطع اللحم مخلوطة مع الخضروات زي الجزر والبسلة والبروكلي داخل صوص
اللحم، كانت رائعة وغير متوقعة، قطع اللحم كانت مقطعة قطع صغيرة جدًا ومستوية كويس
والشوربة كانت طعمها رائع مع طعم فلفل واضح جدًا فيه والخضار كمان كان فريش ومش
مهري. بدأنا أكل بمقبلات جولدن فرايد موتزاريلا (24 جنيه) وهي أصابع موتزاريلا
مقلية بـ يقدم معاها صوص المانتيكيتا مكون من الطماطم وقطع الزيتون والفلفل الحار
والبقدونس، أصابع الموتزاريلا كانت مقرمشة من الخارج وطرية من الداخل والجبنة كانت
سايحة ورائعة قعدت تشد معانا كأننا بـ نأكل بيتزا، الصوص كان لطيف لكن ما
استهواناش قوي خاصة أن فيه شطشطة شوية.

في الأطباق الرئيسية طلبنا فيليتو
دي جوردن زولا (69 جنيه) وده عبارة عن فيليه إيطالي (طلبناه يتعمل Well Done) بالجبنة الريكفور وصوص الكريمة
والفلفل الأسود المطحون، وأخذنا معاها بطاطس مهروسة وخضار سوتيه، اللحم كانت رائعة
مع الصوص اللي كان واضح فيه طعم ورائحة الريكفور المميزة وكمان الخضار والبيوريه
ما تتخيرش عنه في جودة الإعداد. اختارنا كمان طبق رئيسي سكالوب بانيه (52 جنيه) وكان
فيه قطعتين لحم بتلو محمر مع صوص إيطالي مخصوص وأرز وبطاطس بيوريه، كان رائع وما
يتخيرش عن اللي فات.

في المشروبات جربنا ليمون
بالنعناع (17 جنيه) كان طازج وساقع بـ يقدم في كوب طويل ورفيع لكن ما كناش حاسين
بطعم النعناع قوي فيه، كمان جربنا أوريو كوكو شيك (24 جنيه) كان حلو جدًا بس عيبه
الوحيد أنه كان ثقيل جدًا جدًا لدرجة طلبنا من الجرسون يضيف عليه لبن علشان يخف
شوية، وبالفعل بقى أخف من الأول إلا أننا ما قدرناش نكمل نصفه وسيبناه.

“أويا” بـ تضيف 12%
خدمة و10% ضريبة على حسابك في الآخر، المكان مناسب لشلة الأصحاب الكبيرة بالليل
والعائلات في وقت الصبح أكثر، بعد التجربة دي أكيد “أويا” بقى على قائمة
الأماكن المفضلة عندنا واللي هـ تيجي على بالنا وقت ما نحب نخرج في مكان حلو.

نصيحة 360

الحجز بـ يكون أيام الخميس والجمعة على: 0237625772 أو 0237625771 لكن نصيحة احجز قبل ما تروح في أي يوم لأن المكان مزدحم جدًا خاصة بالليل وما تضمنش تلاقى مكان.

أحسن حاجة

كل حاجة في المكان مافيهاش غلطة، لكن على قمة اللي عجبنا "الكرسي المرجيحة".

أسوأ حاجة

الأوريو شيك كان ثقيل قوي وكميته كبيرة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح