The Definitive Guide to Living in the Capital , Cairo , Egypt

مطعم إل تشيكو المكسيكي – El Chico

إل تشيكو: أكل مكسيكي رائع في سيتي ستارز

تم التقييم بواسطة
Waleed Abuarab
قيم
قيم الآن
إل تشيكو: أكل مكسيكي رائع في سيتي ستارز

جربنا الأكل المكسيكي في أكثر من مكان في القاهرة، لكن الحقيقة تجربتنا في «إل
تشيكو» كانت الأفضل لغاية دلوقتي. أول زيارة لفريق كايرو 360 للمطعم ده كانت من سنتين
بالضبط وساعتها برضه قدر يبهرنا بأكلات رائعة من صميم المطبخ المكسيكي.

المطعم موجود في الدور الخامس في المرحلة الأولى من سيتي ستارز، الدور اللي
فوق الفوود كورت القديم، في مكان مش واضح شوية ممكن تكون ما شوفتوش قبل كده، جنب
مطاعم «سبارو» و«إل شارو». مساحته كيبرة ومقسم لجزئين خارجي وداخلي، والديكور من
الداخل رقيق بألوان فاتحة وإضاءة قوية. والقعدات مريحة والجو العام مريح للأعصاب
بعيد عن دوشة المول. وفيه شاشة تليفزيون وأغاني باللغة الأسبانية طول الوقت شغالة
في الخلفية لكن بمستوى صوت معقول.

مكتوب على المنيو أنه مطعم (تكس – مكس) أو بـ يقدم أكلات من الولايات
الجنوبية في أمريكا وأكلات مكسيكية. ومادام قلنا مكسيكان فوود يبقى لازم نفكر في
الناتشوز والتاكو والإنشلاديس والبوريتو، وطبعًا المنيو فيه كل ما لذ وطاب من
الأكل المكسيكي. وهـ نحاول نشرح مكونات كل طبق جربناه علشان لو حد ما كانش جرب
الأكل المكسيكي قبل كده.

شوربة التورتيا (13 جنيه) فيها قطع أفوكادو وخبز التورتيا وجبنة جاك وقطع
دجاج مشوية ومشطشطة، الشوربة المكسيكية قوية جدًا وواضح أنها صحية وبـ تفكرنا شوية
بشوربة العدس أو حمص الشام. من منيو المشهيات طلبنا (فاهيتا ناتشوز) وده عبارة عن
رقائق الذرة المخبوزة عليها جبنة الناتشو السايحة وعليها قطع فاهيتا اللحم والدجاج
(الفاهيتا مكسيكية برضه) ومعاها الكريمة الدلعة أو Sour Cream وفلفل الهالوبينو الحلو، سعر الطبق ده 39 جنيه، وبـ
يفتح النفس بطريقة مش طبيعية، وما ننساش أن زي أي مطعم مكسيكي أول ما بـ تقعد
وقبل ما تطلب أي حاجة بـ ينزل أمامك رقائق الذرة المقرمشة مع صلصة الطماطم الحارة
اللي زي دوريتوس.

التاكو هو الأكلة الشعبية الأهم في المكسيك، عيش تورتيا ملفوف بـ يتحط فيه
شرائح دجاج أو ستيك وجبنة وكسبرة وأفوكادو ومعاه سلاطة البيكو دي جايو Pico
de Gallo بالطماطم والبصل والهالوبينو،
الطعم بـ يبقى حكاية خصوصًا لو المكونات كانت كلها فريش، وده كان الحال في طبق Revolutionary
Steak Tacos اللي طلبناه (49 جنيه) وكان معاه
أرز بالبهارات وفاصوليا بيضاء في صوص أحمر. وجبة مشبعة وغنية جدًا. ثاني طبق رئيسي
كان من منيو مشويات الجريل المكسيكية، وهو Chicken Chipotle (65 جنيه) وفيه شريحة صدور دجاج مغطاة بصوص الفلفل
الحار المدخن اللي اسمه شيبوتلي، وجبنة جاك سايحة، ومعاه أرز وسوتيه أو بطاطس.
الطبق ده في الجول لو عاوز تكتشف خلطة جديدة ممكن تضاف للدجاج أو الستيك.

المنيو لسه مليان أكلات من تكساس والمكسيك كثير زي الكيسدياس والبوريتو
والجواكومولي وأشكال مختلفة من الفاهيتا باللحوم والأسماك وساندويتشات البرجر
والبيكون وأطباق كمان للنباتيين. حتى منيو الحلويات فيه فطيرة التفاح المكسيكية
الخطيرة لكن للأسف كانت خلصانة وقت زيارتنا، وفيه كوكتيلات فواكة متنوعة والبيبسي
هنا Refill  طبعًا زي أي مطعم Tex-Mex.

«إل تشيكو» مطعم عريق بقاله أكثر من 60 سنة في دول كثير، بـ نرشحه بعنف لكل
قراءنا ونوعدكم أنكم هـ تستمتعوا بآكلات شهية وأطباق مشبعة، وهـ تفكروا جديًا
تهاجروا المكسيك بعدها.

نصيحة 360

جرب طبق اسمه Cinco de Mayo اللي فيه 5 أنواع مقبلات مكسيكية، وإحنا بـ نعتبره وجبة كاملة.

أحسن حاجة

من الأكلات التاكو والناتشوز، وفي المكان الخدمة الممتازة.

أسوأ حاجة

مافيش دليـﭭري لأنه مالوش فروع ثانية خارج سيتي ستارز، فيه تيك آواي فقط.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح