The Definitive Guide to Living in the Capital , Cairo , Egypt

مطاعم
إل رانشو – El Rancho

إل رانشو: أكلات تكس- مكس في فندق سوفيتل المعادي

تم التقييم بواسطة
Anne de Groot
قيم
قيم الآن
إل رانشو: أكلات تكس- مكس في فندق سوفيتل المعادي

مطاعم
أكل التكس-مكس أو أكلات تكساس والمكسيك الأصلية لسه تعتبر نادرة في مصر شوية. يعني
غير «تشيليز – Chili’s» و«أون ذا بوردر – On the border» ممكن ما نفتكرش حاجة
ثاني بسهولة. وأخيرًا اكتشفنا أثناء تواجدنا بفندق سوفيتل المعادي مطعم تكس-مكس
جديد وهو «إل رانشو – El Rancho».

الديكور
كأنه تقليد غير جيد لبلاتوهات فيلم «قناع زورو» بكل المسدسات والقبعات اللي على
الجدران. ومن ضمن الإكسسوارات شنطة فلوس (فاضية طبعًا) وصور للهنود الحمر ونبات
الصبار. وقعدنا على البار اللي أمام المطبخ المفتوح، وده كان أكثر مكان مريح
بالنسبة لنا.

المطبخ
يعتبر عالمي أكثر من كونه مكسيكي فقط، لأن كان فيه أطباق زي سلاطة السيزر بالفراخ
(35 جنيه) والسلاطة اليونانية (29 جنيه) وشوربة المشروم (15 جنيه). بدأنا بعيش
التورتيا والجواكمولي (49 جنيه) ودي كانت أول صدمة، لأنها ما كانتش حلوة خالص،
والجواكمولي كان شبه الملوخية وقوامه زي قوام الملوخية! وعيش التورتيا اللي معاه
كان ناشف جدًا وصعب التقطيع. من الآخر ما كانش اختيار موفق ده غير أن الجواكمولي
كان حار جدًا علشان الفلفل اللي عليه من فوق.

في
الأطباق الرئيسية اختارنا “بلاتوس دي لوس كمبيسينوس” وترجمتها (طبق
المزارعين) وهو بـ يتكون من لحم صافي مع البيض المقلي والفاصوليا الحمراء والأرز
والخضار وسعره 120 جنيه. وطلبنا فاهيتا اللحم والفراخ (105 جنيه). الستيك البقري
في الطبق الأول كان مستوي نصف تسوية بناء على طلبنا، لكن اللحم كانت بـ تشد زيادة
عن المفروض، وكانت صعبة في التقطيع والمضغ. البيض المقلي كان زي ما بـ ييجي عادي
في أي ساندويتش برجر بالبيض. أحلى حاجة في الوجبة كانت الأرز والخضار، وحبات
الفاصوليا الحمراء اللي تحولت مع الصوص إلى يخنة حارة لذيذة، مع الذرة والفاصوليا
الخضراء، يعني الطبق الجانبي عجبنا أكثر من المكون الأساسي للوجبة.

الكمية
كانت كبيرة في الفاهيتا، لكن الفراخ كانت أكثر من اللحمة مش نصف ونصف، وقُدمت مع
الجواكمولي والكريمة والجبنة. الفراخ واللحم كانوا متبلين ومشويين كويس على
الجريل، ومعاهم خضار لذيذ. ولثاني مرة المشكلة كانت في الجواكمولي لكنه كان مش
باين قوي هنا لحسن الحظ لأنه كان ممزوج بالكريمة واللحم.

في
الحلويات جربنا البراوني وكان مالوش طعم وما قدرناش نفهم إيه نوع الصوص اللي كان
محطوط عليه، وكان سعره 40 جنيه رغم أن حجم القطعة صغير جدًا.

الخدمة
لطيفة لكن جو المكان نفسه مش مثالي يمكن علشان وجوده داخل طرقات الفندق اللي هي
مملة بطبعها. ومع ذلك لو أنت في المعادي وخلاص هـ تموت على أكل تكس- مكس يبقى «إل
رانشو» لازم يبقى واحد من اختياراتك القليلة في المنطقة.

نصيحة 360

المكان بـ يقدم مشروبات كحولية، لازم تعرف المعلومة دي.

أحسن حاجة

يخنة الفاصوليا باللحم الحارة.

أسوأ حاجة

الجواكمولي والتورتيا.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح