The Definitive Guide to Living in the Capital , Cairo , Egypt

في أخر زيارة لينا لمطعم “إل لوفت – IL LOFT” كنا محظوظين واستمتعنا بواحدة من أحلى البيتزات اللي جربناها من فترة. الفكرة إن من ساعتها في حاجات كتير تغيرت. يعني المنيو اللي معظمها أكلات إيطالي حصل فيها تغيير كبير ونزلوا فيها أطباق آسيوية بتشمل أكل ياباني وبرجر.

التغيير الوحيد كان في المنيو، لكن الديكورات وأجواء المكان بدون تغيير. بعد جولة في المنيو طلبنا  شوربة مشروم (45 جنيه) غنية ولها طعم مميز وطبعًا نكهة المشروم القوية مالهاش حل، ونقدر نقول إنها مش مجرد شوربة كريمة فيها شوية مشروم وخلاص. الطبق من غير كلام من أحلى أطباق الشوربة اللي جربناها من فترة طويلة وننصحكم تجربوها.

أما بالنسبة للمقبلات فطلبنا من الأطباق الجديدة سي فوود تمبورا سالاد Seafood Tempura Salad  (ثمنه 89 جنيه) عبارة عن شرائح طماطم وبصل وكرفس وفلفل أحمر لزوم الشطشطة، ومعاهم كزبرة وكاجو وكمية كويسة من صوص التاي المسكّر. كل ده عليه جمبري وكاليماري تمبورا مستويين كويس، وطبعًا قرمشة التمبورا كانت خفيفة ولذيذة. بجد طبق سلاطة مدهش وبرضه من أحسن السلاطات اللي جربناها من فترة.

نروح على الأطباق الرئيسية وندخل على طبق آسيوي تاني وهوChicken Panang Curry Coconut   (ثمنه 87 جنيه). الطبق ببساطة شرائح فراخ مسلوقة رفيعة عايمة في صوص كاري بجوز الهند له قوام مثالي، وطبعًا جوز الهند عمل نكهة قوية والصوص فيه شطشطة لطيفة. الطبق بينزل معاه رز بسمتي بالزنجبيل روعة، وهنا هنقول إننا جربنا طبق جديد تحفة يعرفنا التغييرات اللي عملها إل لوفت.

حاجة واحدة فضلت زي ما هي عند إل لوفت، طبعًا عرفوتها صح؟ البيتزا طبعًا ومين غيرها. طلبنا Gorgonzola Mela Pizza (ثمنه 75 جنيه) بعجينتها الخرافية وصلصة الطماطم المعمولة بمزاج مع جبنة موتزاريلا وجورجونزولا عملوا توازن بطعمهم الحادق القوي مع الطعم المسكر اللاذع لشرائح التفاح الأخضر.

أول لما وصلنا المطعم طلبنا Bread Pudding (ثمنه 49 جنيه) من الأول علشان بيحتاج 25 دقيقة تحضير على حسب المكتوب في المنيو. المهم إن الجرسون وصل ومعاه مافين كبيرة في طبق فخار وبعدين بينقلها على طبق ويقسمها أربع أجزاء، وبعدين يضيف عليها الآيس كريم وصوص الكراميل .طبعًا الكلام لوحده مغري بشكل غير طبيعي، والكيك كان لها أطراف مسكرة لذيذة وفي النص طرية ومش مزيتة، وكمان الآيس كريم وصوص الكراميل أضافوا طعم مميز للأكل من غير ما يطغوا على الطعم.

مشينا من إل لوفت وإحنا محتارين. يعني مافيش شك إن الأطباق الجديدة كانت روعة والحلو كمان إنهم حافظوا على تخصصهم الأصلي. لكن على الناحية التانية المطعم فقد جزء من هويته المميزة وحسينا إن الموضوع فيه حاجة غلط.