The Definitive Guide to Living in the Capital , Cairo , Egypt

البيك – Al Baik

البيك: وجبات وساندويتشات دجاج في سيتي ستارز

  • سيتي ستارز، المرحلة الثانية، الدور الاول
  • مأكولات سريعة
  • 0224802378
  • 10 صباحاً - منتصف الليل
تم التقييم بواسطة
Waleed Abuarab
قيم
قيم الآن
البيك: وجبات وساندويتشات دجاج في سيتي ستارز

الاسم مألوف وكنا عارفين أن له أكثر من فرع في أماكن كثير لكننا تأكدنا أن
حاليًا مافيش غير الفرع ده اللي في سيتي ستارز، وفروع ثانية داخل نوادي رياضية
خاصة، والفرع الثاني اللي كان فاتح في منطقة هليوبوليس قريب من ميدان تريومف مغلق
دلوقتي لأن بـ يتعمل فيه تجديدات على حد علمنا.

مطعم «البيك» بـ يقدم وجبات دجاج مقلية زي الموجودة في كنتاكي، شبهها كثير
الحقيقة والخلطة كمان عاملة زيها. وعلى خلاف كنتاكي بـ يقدم ساندويتشات كوردون بلو
وجمبري ودجاج مشوي بجانب ساندويتشات الدجاج الكرسبي الحارة الموجودة في كنتاكي.

المطعم موجود في الفوود كورت اللي في الدور الأرضي، يافطة كبيرة مضيئة
باللون الأزرق والأحمر وعليها لوجو ظريف للمحل، المنيو مصور وموجود على الجدار
الخلفي للمحل زي كل مطاعم الفوود كورت ومافيش منيو مطبوع للأسف، أو كان خلصان وقت
زيارتنا.

وجبات الدجاج المقلي هي المسيطرة على المنيو، وفيه 3 وجبات توفير ظاهرين
بشدة وسط باقي الأصناف، واخدين أرقام 1 و2 و3 بأسعار من 30 لـ 38 جنيه. والوجبة
الموفرة بـ يبقى فيها 3 قطاع دجاج (صدور وأجنحة) وطبق أرز بسمتي مبهر وكول سلو
وثومية وقطعتين دجاج ستريبس المخلية ورغيف عيش شامي وبطاطس محمرة، ومش معاها
بيبسي. الوجبة دي بجانب أنها مشبعة وكميتها كبيرة إلا أننا تفاجئنا بالطعم
السبايسي اللذيذ والخلطة الخطيرة اللي مغلفة الدجاج، والأرز المفلفل الغني بالطعم.
الحاجات كلها فريش ورائحتها مغرية، حتى البطاطس كانت مقرمشة والكول سلو والثومية
حلوين بس كان ممكن يبقوا أحلى من كده. حلاوة الأكل كانت جاية من حقيقة أننا غصب
عننا بـ نقارنه بكنتاكي، ولاقينا أن هو مش بـ يقل عنه في حاجة، بالعكس بـ يتفوق
عليه في الكميات وقلة الأسعار.

جربنا ساندويتش الكوردون بلو الكومبو بالحجم الكبير (26 جنيه) وبرضه غصب
عننا قارننا بينه وبين نفس الساندويتش في كوك دوور، بس المرة دي المقارنة كانت في
صالح كوك دوور، بس ده ما يقللش أبدًا من حلاوة الساندويتش عند «البيك» بس حجمه مش
كبير قوي، بس الحشو غني وفيه موتزاريلا كثير، كان لازم نطلب كول سلو (5 جنيه)
إضافية مع البيبسي والبطاطس علشان تضبط الأكلة. فيه وجبة فيها 10 وحدات جمبري مشوي
وسلاطات (38 جنيه) وفيه وجبات دجاج عائلية لـ 4 أو 5 أشخاص بأسعار من 70 لـ 80
جنيه.

الأكل هنا لذيذ ومش غالي وهـ تأخذ الطلب بتاعك بسرعة، 10 دقائق بالكثير،
وهـ تحب الطعم الفريش لكل المكونات، والخدمة كويسة بس تغليف المأكولات شكله مش
عاطفي شوية، بس في النهاية أنت بـ تأخذه علشان تفتحه وتأكله على أقرب ترابيزة في
الفوود كورت. جرب «البيك» في أول زيارة لسيتي ستارز وقول لنا رأيك.

نصيحة 360

اطلب الوجبة العائلية اللي فيها 12 قطعة دجاج وأرز كبير وسلاطات وبيبسي بـ 87 جنيه، اقتصادية بجد وتكفي 4 أشخاص.

أحسن حاجة

قطع الدجاج المخلية (الستريبس) كانت خطيرة.

أسوأ حاجة

الأكل دسم ومش خفيف على المعدة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح