The Definitive Guide to Living in the Capital , Cairo , Egypt

فول الجحش

الجحش: أجدع سحور فول وفلافل في السيدة زينب

تم التقييم بواسطة
Muhammad Nasr
قيم
قيم الآن
الجحش: أجدع سحور فول وفلافل في السيدة زينب

وجبة السحور من الوجبات اللي بـ تحدد شكل صيامكم هـ يبقى عامل إزاي، يا إما تبقوا في منتهى العصبية والفرهدة أو في منتهى النشاط والصحصحة.

القاهرة القديمة أو الإسلامية والقبطية يعتبروا من أكثر المناطق زحمة وإقبالًا من أهل المحروسة وده بسبب الروحانيات الجميلة والروح المصرية اللي بـ تسيطر على المناطق دي زي: منطقة السيدة زينب وحي الحسين والأزهر وحي مصر القديمة.. وغيرها من مناطق البركة اللي نتمنى أننا نحافظ عليها ونطور منها لأن صعب يبقى فيه منطقة زي مناطقنا الحلوة دي في أي بلد ثانية.

مطعم النهارده من علامات مطاعم السحور في القاهرة القديمة ومن أيقونات الفول والفلافل في منطقة السيدة زينب وبـ ييجي حلقة إضافية من حلقات المطاعم اللي اسمها غريب زي البغل “كائن يجمع صفات الحمار والحصان” وبحة “كفاية اسمه غريب لوحده”، ببساطة هو مطعم “الجحش” (بمعنى الحمار الصغير) للفول والفلافل اللي مشهور بطريقة غير طبيعية لدرجة أن فيه من أصحابنا بـ يقول: “ما ينفعش يعدي رمضان من غير سحور الجحش”.

في ميدان السيدة زينب وعلى صف قسم الشرطة هـ تلاقوا شارع في آخره مطعم الجحش وخلي بالكم أي واحد ثاني قبله ويقولك إحنا “الجحش” الأصلي قولوا له “شكرًا” وكملوا لآخر الشارع هـ تلاقوا محل الجحش واخد ناصية على شمالكم قبل كبابجي “حبايب السيدة“، فيه ترابيزات في الشارع وتقدروا تأكلوا داخل المحل في الدور اللي فوق بس بـ ننصحكم تخليكم في الشارع لأن فوق الحرارة صعبة بالرغم من وجود المراوح وفي الصيف الجميل ده هـ تحسوا كأنكم في ساونا.

استقبلنا واحد من الناس الظريفة قوي بابتسامة طبيعية واختارنا ترابيزة خارج المحل، أول ما قعدنا واحد من العمال فرش لنا ورق جرائد نظيف على الترابيزة كأنكم في البيت بالضبط وبعدها نزل لنا طقم سلاطات وتحابيش عبارة عن “باذنجان مقلي بالدقة” وجرجير وبصل وخيار مخلل وسلاطة خضراء (طماطم وخيار وبصل وبقدونس) وسلاطة طحينة وعيش (قابل للزيادة) كنا ثلاثة أشخاص طلبنا بعددنا فول بالزيت الحار والطحينة مع طبق بيض مقلي بالسمنة البلدي وطبق فلافل (5 وحدات فلافل) وطبق بطاطس محمرة، كل الطلبات دي بـ 35 جنيه يعني تقريبًا 11.50 جنيه للفرد، مش محتاجين نقول لكم، الفول خطير متسوي كويس وعليه كمية طحينة وزيت حار مش زيادة ولا ناقصة، والفلافل برضه كانت مزيتة شوية لكن ساخنة ومقرمشة، أما البيض المقلي ده حكاية ثانية لوحده عبارة عن كمية متوصية بالسمن البلدي مع تقريبًا 2: 3 بيضات كانوا ماليين الطبق وما كناش قادرين نكمله (نصيحة: البيض بـ يعوم على السمن البلدي).

خلصنا وجبتنا وما كناش قادرين نتنفس بسبب هجمة الزيت والسمن البلدي اللي خلتنا ندور على أول علبة لبن رايب تلطف شوية المواضيع، وبعدها اتمشينا لغاية الجامع الأزهر اللي صلاة الفجر فيه لها طعم ثاني.

مطعم الجحش مكان مثالي لو عاوزين تتسحروا سحور على حق بأكلات مصرية “وصاية” والزحام اللي هناك هو أكبر دليل على ده.

نصيحة 360

بلاش تدخلوا الشارع ده بعربيتكم، كل ما هـ تروحوا في موعد قريب من صلاة الفجر فرصكم هـ تقل في أنكم تلاقوا مكان، وخلي بالكم من البيض المقلي (خطير).

أحسن حاجة

المكان المثالي لأحلى سحور فول وفلافل في القاهرة القديمة.

أسوأ حاجة

الزحام في الشارع غير طبيعي وكمية المحلات اللي واخدة الاسم ويقنعك أنه هو الأصلي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح