The Definitive Guide to Living in the Capital , Cairo , Egypt

لو عاوز تاكل أكل بيتي من غير تعب الطبيخ ودوشته، يبقى مطعم الدهان واحد من الاختيارات اللي هتوفر لك ده، مطعم عائلي مصري موجود في المهندسين، هيفكرك بأكل ستي وستك. وبالإضافة لده هو دلوقتي بيمثل إختيار مناسب جدًا لخروجة عائلية ظريفة لسكان الدقي والمهندسين والعجوزة.

المكان مكون من طابقين الطابق الأول هيناسبك لو كنت مدخن، لكن الطابق التاني ممنوع فيه التدخين، دي أول معلومة هتسمعها من الويتر وأنت داخل علشان تحدد إذا كنت هتقعد في الدور الأرضي ولا الدور التاني.

المكان هايل من حيث النظافة والديكورات والكراسي المريحة، بالإضافة للخدمة والاستقبال المميز، وده بيوضح أن القائمين على المكان فاهمين كويس إدارة مطاعم صح.

في البداية حبينا نجرب السلاطات فطلبنا سلطة طحينة وسلطة بابا غنوج والحقيقة كانت لفتة حلوة من المطعم أنه بينزل السلاطات مجانًا، عرفنا المعلومة دى لما استلمنا الشيك.

اللحوم مميزة جدًا في الدهان، ده اللي سمعناه قبل ما نروح، علشان كده حبينا نجرب الطبق الرئيسي واللي كان عبارة عن  موزة ضاني وده سعرها ” 84 جنيه” كان طعمها يجنن ومستوية بشكل مخليها تدوب وأنت بتاكلها، وتوابلها خفيفة ومضبوطة جدًا .

الطبق الثاني كان ستيك مشروم فراخ وده سعره 57 جنيه عبارة عن فراخ بانيه بصوص الطماطم، الحقيقة ماعجبناش، والسبب أن ملحه كان خفيف قوي وتوابله مش مضبوطة.

الأطباق الجانبية حبينا تكون طاجن ورق عنب، وده عجبنا جدًا لأنه كان مطبوخ في طاجن فخار محتفظ بحرارته وطبعًا المحشي معروف أنه لازم يتاكل سخن، كمان طعمه وتوابله مضبوطة قوي، بالإضافة إلى أن سعره مناسب بالنسبة للكمية “17جنيه”.

طلبنا أرز بالخلطة وده عبارة عن أرز بسمتي مضاف إليه قطع كبدة، وكان طعمه حلو لكنه كان ملحه برضه خفيف وده سعره “18 جنيه” .

جنب الأرز اللي بالخلطة حبينا نجرب ملوخية الدهان، وعجبتنا جدًا لأنها برضه مطبوخة في طاجن محتفظ بحرارتها والثوم فيها كان مضبوط والملح كمان كان تمام جدًا، يعني ماكنش لينا أى تحفظات عليها ودى سعرها ” 17جنيه” .

حبينا مانخرجش من التجربة دي إلا وإحنا مجربين فيها أكتر من نوع فطلبنا جنب الملوخية ممبار، ونقدر نقول أنه “عادي” طعمه ما يختلفش كتير عن الممبار في أى مطعم تاني، يعني لا مميز ولا أقل من العادي وده سعره “19 جنيه”

طلبنا كمان طلب بطاطس محمرة وعجبتنا جدًا، بسبب لونها الذهبي، وكانت سخنة ومش شاربة زيت كتير، ودي سعرها “10 جنيه”

 فى النهاية نقدر نقول أن الزيارة كانت ناجحة، وأكيد هنكررها تاني قريب. وطبعًا هنبلغكم بكل جديد.