The Definitive Guide to Living in the Capital , Cairo , Egypt

الدهان

الدهان: إفطار عند ملك المشويات في مصر الجديدة

تم التقييم بواسطة
Waleed Abuarab
قيم
قيم الآن
الدهان: إفطار عند ملك المشويات في مصر الجديدة

في لحظات معينة بـ تبقى مش بـ تدور على مكان تفطر فيه وخلاص، لكن بـ ييجي على بالك أكلة معينة بشكلها وريحتها وتفاصيلها، وتبدأ تفكر فين أحسن مكان ممكن تأكل فيه الأكلة دي، ولأن الحياة بقت صعبة في شوارع القاهرة ومش كل مكان تقرر تروحه هـ تلاقي طريقه سالك، فلازم تحصر اختياراتك في حدود المنطقة الجغرافية اللي أنت موجود فيها، وما تحاولش تبعد لأنك جايز لو رحت ما تعرفش ترجع! قطع الطريق بقى أسلوب حياة وسمة مميزة لشوارع العاصمة، بـ نقول لكم الكلام ده لأننا لما هف علينا نأكل أكلة كباب وكفتة معتبرة وكنا قريبين من مصر الجديدة، فكرنا نروح الحسين أو نروح «المنوفي» اللي في السيدة زينب، لكن للأسباب السالف ذكرها كان لازم نوفق بين رغباتنا والواقع اللي إحنا عايشينه خاصة أن كان فاضل على المغرب ساعة واحدة، ومن هنا قررنا نجرب «الدهان» الموجود في شارع الميرغني في مصر الجديدة، الاسم العريق اللي ما يختلفش عليه اثنين، واللي فرعه الأصلي موجود في الحسين وفتح فرع حديث نسبيًا في مدينة الرحاب. والجزء الأهم في زيارتنا للـ «الدهان» كانت أننا رحنا من غير حجز مسبق، دخلنا المطعم لقينا مكان للجلوس بدون أي ترتيبات، ودي حاجة نادرة في المطاعم الكبيرة وقت الإفطار في رمضان.

تصميم المكان رائع من الخارج ومن الداخل، الواجهة مش كبيرة قوي وعليها زخارف عربية جميلة باللون الأبيض، ومن الداخل المساحة أكبر مما توقعنا، صحيح الترابيزات قريبة من بعضها شويتين، بس بشكل عام المكان معتنى به ونظيف وأنيق جدًا، والديكورات خشبية والقعدات مريحة والإضاءة هادئة وفيه شاشات تليفزيون بـ تشغل برامج رمضان طبعًا، ومافيش مظاهر احتفالية معينة للشهر الكريم، لكن الجو العام حلو وأصيل رغم حداثة التصميمات.

المنيو العادي هو الموجود مافيش منيو مخصوص لرمضان، فيه مشويات وطواجن ووجبات لحوم وخضار وحمام ودجاج ومقبلات ساخنة وشوربات وسلاطات. طلبنا كباب وكفتة بتلو كوجبة أساسية (الكيلو  128 جنيه) وأطباق جانبية متنوعة زي فتة الدهان الشهيرة بالصلصة والثوم (12 جنيه) وأرز بسمتي بالخلطة (11 جنيه) وممبار (12 جنيه) وبعض المشروبات الرمضانية زي الكركاديه وقمر الدين (4 جنيه). بعد 15 دقيقة بالضبط نزل الأكل كله على ترابيزتنا ساخن وملفوف بالفويل، أسرع مما توقعنا بكثير، وده كان الحال مع كل الترابيزات اللي حوالينا اللي نزلت كل طلباتها قبل المغرب بوقت كافي، يعني الخدمة هنا أكثر من ممتازة ودقيقة جدًا، مش فاضل غير أن الأكل يبقى خطير علشان «الدهان» يأخذ العلامة الكاملة.

وفعلاً مع انطلاق مدفع الإفطار كان في انتظارنا مفاجأة سارة بمذاق غير عادي افتقدناه في كثير من مطاعم الكباب، أحلى كباب وكفتة على الطريقة المصرية واللي ريحته بـ تجننك قبل ما تقطم منه، طعم رائع وشواء ممتاز، وبالنسبة للصنعة والكميات، الأسعار معقولة جدًا. الممبار تمام والفتة رائعة، الأرز بالكبدة كان حلو بس مش مخدوم كفاية. والسلاطات كلها عالمية، الطماطم والطحينة والزبادي وبابا غنوج، وكلها بـ تنزل مجانًا بجانب المشويات اللي بـ تطلبها. المشروبات كمان ممتازة وسكرها كويس، مش دائمًا بـ تتعمل مضبوطة كده في أي مطعم. الحقيقة تجربة الأكل كدة اقتربت من الكمال، اتبسطنا جدًا واستمتعنا بها لأقصى درجة، خاصة أن الحساب في الآخر ما كانش كثير خالص.

مشكلة بسيطة بس في الخدمة هي أنهم مش بـ ينظفوا أول بأول بعد ما الناس تخلص أكل، لأنهم بـ يبقوا عاوزين الناس تقوم بعد الأكل علشان بـ يبقى فيه قائمة انتظار، عمومًا ده مش هـ يغير رأينا في أن «الدهان» على رأس قائمة الأفضل وسط جبابرة الكباب في مصر كلها.

نصيحة 360

مش كل مرة هـ تلاقي مكان بسهولة وقت الإفطار، ياريت تتصل وتحجز لزيادة التأكيد.

أحسن حاجة

تجربة شبه متكاملة، كل حاجة حلوة.

أسوأ حاجة

كان نفسنا نقعد ونطلب حاجة حلوة، بس الزحمة أجبرتنا أننا نقوم ونسيب مكان لغيرنا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح