The Definitive Guide to Living in the Capital , Cairo , Egypt

مطاعم
مشويات الرايق

الرايق: ملك المشويات في المعادي الجديدة

  • 14 شارع اللاسلكي
  • مصري
  • 10 صباحاً - 11 مساءً -
تم التقييم بواسطة
Waleed Abuarab
قيم
قيم الآن
الرايق: ملك المشويات في المعادي الجديدة

مش بسهولة هـ تلاقي مطاعم متخصصة في المشويات على الفحم في المعادي، وده عن تجربة، لأننا تعبنا قوي وإحنا بـ ندور على مكان نأكل فيه أكلة كفتة وكباب حلوة في الحي الهادئ. وبعد أول مقال كتبناه من سنتين فاتوا عن مطعم «الرايق» لفينا المعادي ورجعنا ثاني نكتب عنه كواحد من أفضل مطاعم المشويات –النادرة بالفعل– في المعادي الجديدة بالذات.

موجود في شارع اللاسلكي المتفرع من شارع النصر في المعادي الجديدة، واخد ناصية وأضواءه هادئة وعليه يافطة شيك باللون الأحمر. مساحته صغيرة من الداخل وعدد الترابيزات هنا محدود، وهو مش اسم على مسمى على فكرة لأن عمره ما كان “رايق” من غير حسد يعني، بالعكس؛ فيه قائمة انتظار دائمًا وفيه ناس مستنية أماكن تفضى علشان تدخل تأكل. طبعًا من معلومة زي دي سهل تخمن أن الأكل هنا حكاية، مش بس كده، الأسعار كمان مغرية جدًا، والخدمة سريعة ومنتبهة، علشان تأكل بسرعة وتقوم بسرعة وتفضي مكان لغيرك، بس لو حابب تقعد شوية بعد الأكل مافيش مانع طبعًا، خاصة أن الكراسي مريحة والقعدة حلوة وجو المكان عائلي بزيادة، والنظافة في كل التفاصيل هي سمة المكان.

الكباب والكفتة والريش والطرب والشيش طاووق والكبدة والكلاوي في المنيو بالكيلو، أسعار من 120 لـ 170 جنيه، والكيلو المشكل بـ 120 جنيه وفيه أطباق ميكس جريل فيها قطعة من كل حاجة بـ 55 جنيه، والدجاجة المشوية بـ 40 جنيه، وفيه كل أنواع السلاطات الشرقية بسعر 3 أو 4 جنيه للطبق، وممكن جنب الأكل تجيب سباجيتي أو أرز بالخلطة أو فتة بالصلصة والثوم (8 جنيه). ومافيش منيو حلويات أو مشروبات، هو كان البيبسي المتين مع الأكل.

بسرعة كان أمامنا كل طلباتنا اللي راعينا أننا نجرب فيها أصناف مختلفة، الدجاج المشوي لا يعلى عليه، «الرايق» أستاذ ورئيس قسم في الطعم والتتبيلة والقرمشة وطريقة التقديم، مع سلاطة الطحينة والعيش الشامي أنت مش عاوز حاجة ثاني من المطعم ده، وبـ نرشح لك طبق الفتة بالثوم جنب أي لحوم هـ تطلبها. الكباب كمان واخد حقه على الفحم تمام وتسويته ممتازة، والكفتة -رغم أن الصباع ضخم شوية- طعمها لذيذ، يمكن الطرب كان أقل حاجة من حيث الطعم في طبق المشويات اللي طلبناه.

هـ تستمتع بوقتك في «الرايق» زي ما إحنا استمتعنا بوقتنا وبوجبتنا ده أكيد، العاملين هنا محترفين وجودة الأكل هي عنوان نجاح الاسم وانفراده بعرض المشويات في المعادي. ومش بسهولة حد هـ يفتح قريب منه ويقدر ينافسه أو يأخذ منه زبائنه، خاصة مع ارتباط الجودة بالأسعار الحنينة. نتمنى أنكم تزوروه وتقولوا لنا رأيكم.

نصيحة 360

اطلب خدمة التوصيل وهـ ييجي لك بسرعة في أي حتة في المعادي أو طُرة.

أحسن حاجة

الرايق يغرد منفردًا على القمة في المعادي، أقرب منافسيه «أبو شقرة» أسعاره عالية والإقبال عليه مش بنفس الكثافة.

أسوأ حاجة

مش بسهولة هـ تلاقي مكان تقعد، المساحة صغيرة وفيه قائمة انتظار.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح