The Definitive Guide to Living in the Capital , Cairo , Egypt

خلونا نتفق إن فيه مطاعم في القاهرة، مجرد زيارتها بتخلينا نحس بمتعة كبيرة، يمكن لإنها بتقدم لنا أكل مصري شعبي معمول بمزاج، ومن ضمن المطاعم المميزة دي “حواوشي الربيع”، واللي في الأصل هو محل جزارة لكنه بيقدم كمان أكلات مصرية أصيلة أهمها “الحواوشي” اللي مشهور بيه، وخلال السطور الجاية هنقول لكم على تفاصيل تجربتنا الأخيرة في المكان.

المكان كالعادة زحمة ولكن ماوقفناش انتظار كتير، لإن واحد من العاملين هناك وجهنا نطلع فوق في الرووف لأنه فيه أماكن فاضية، وإحنا طالعين لمحنا أماكن تسوية الأكل والمكان بصراحة كان نضيف والعاملين لبسهم نظيف، والفيو بتاع الرووف مميز وكاشف الشارع كله.

بدأنا طلباتنا بحواوشي ساده سعره 35 جنيه، والطعم كان عظيم ويستاهل لقب ملك الحواوشي، التتبيلة بتاعة الرغيف ودرجة التسوية كانوا ممتازين، وكمان الرغيف خفيف ومش تقيل أو مدهنن كده زي أماكن تانية.

طلبنا كمان مكرونة باللحمة المفرومة، بـ25 جنيه، وكانت معمولة بالطماطم مش بصلصة ودي حاجة من زمان ماشوفنهاش، ورغم أن كمية اللحمة قليلة لكن بالنسبة للسعر كويسة طبعًا.

وقررنا اننا نجرب فتة سادة، وخلينا نقول خسارة أنهم مش بيعملوا فتة باللحمة كانت هتبقى عظيمة، التتبيلة والتومية والصلصة اللي على الأرز خلونا نغرق في الفتة، بس نتمنى إنهم يخلوا العيش في الشوربة شوية علشان كان ناشف شوية، ومحتاج يكون طري عن كده.

طلبنا كمان طبق ستيك جريل واللي سعره 75 جنيه، وبصراحة ماكنش أحسن حاجة، وماحسيناش بطعم الـ ستيك فيه اللي هو مفترض بيكون حتة مميزة من اللحمة، وكانت زيها زي اللحمة العادية بس متقطعة رفيع وكمان تقيلة في أكلها وناشفة، وحتى التتبيلة بتاعتها محسيناش بطعمها خالص، ونتمنى المرة الجاية ندوقها بشكل أحسن وأفضل.

مجمل تجربتنا بتأكد على أن مطعم حواوشي الربيع يستحق فعلًا يكون من أهم المطاعم اللي بتنافس بقوة في السوق المصري، وهو حاليًا له زبائن مخصوص زيه زي كبار المنافسين، وبنقولكم روحوا زوروه وأهم حاجة أوعوا تفوتوا رغيف الحواوشي من عنده، فهو عنوان التميز عندهم.

حواوشي الربيع موجود في 17 مدينه التحرير متفرع من شارع الوحدة، خلف فرع فودافون، إمبابة.

وعلشان تعرفوا أكتر عنه تقدروا تزوروا صفحتهم على الفيسبوك من هنا.

أو تطلبوا دليفري من خلال رقم التليفون: 01007273768 – 33127413